ടിപ്പുവും മുഗളന്മാരും നടത്തിയ കൊള്ളയ്ക്കു തുല്യം; പിണറായി സര്ക്കാര് ദേവസ്വം ബോര്ഡിനെ പിരിച്ചുവിടണം; കേരളത്തിലെ മുഴുവന് ക്ഷേത്രങ്ങളിലും ആസ്തികള് പരിശോധിക്കണം; ദേവസ്വം ഭരണം ഭക്തര്ക്കു വിട്ടു നല്കണമെന്നും രാജീവ് ചന്ദ്രശേഖര്
ന്യൂഡല്ഹി: ശബരിമലയിലെ മാത്രമല്ല ദേവസ്വം ബോര്ഡുകള്ക്ക് കീഴിലുളള കേരളത്തിലെ മുഴുവന് ക്ഷേത്രങ്ങളുടേയും സ്വത്തുക്കള് പരിശോധിച്ച് രേഖപ്പെടുത്തണമെന്ന് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്. സമഗ്രമായ പരിശോധന ക്ഷേത്ര ഭൂമിയിലും സ്വര്ണ്ണ ശേഖരത്തിലും ആവശ്യമാണ്. ശബരിമലയില് മാത്രമാണോ മറ്റു ക്ഷേത്രങ്ങളിലും മോഷണം നടന്നിട്ടുണ്ടോ എന്ന സംശയം ശക്തമാണ്. ഇതുവരെ 25,000 ഏക്കര് ക്ഷേത്രഭൂമി കേരളത്തിലെ ദേവസ്വങ്ങള്ക്ക് നഷ്ടമായിട്ടുണ്ടെന്നും ഇതു തിരിച്ചു പിടിക്കാന് ബോര്ഡുകള് യാതൊന്നും ചെയ്യുന്നില്ലെന്നും രാജീവ് ചന്ദ്രശേഖര് ഡല്ഹിയില് പറഞ്ഞു. ദേവസ്വം ബോര്ഡുകള് ക്ഷേത്രങ്ങളോട് ചെയ്യുന്നത് മുഗളന്മാരും ടിപ്പുവും നടത്തിയ കൊള്ളയ്ക്ക് തുല്യമാണെന്നും രാജീവ് ആരോപിച്ചു.
നിരവധി അഴിമതികള് നടത്തിയ പിണറായി സര്ക്കാര് അമ്പലങ്ങളുടെ സ്വത്തിലും കണ്ണുവെച്ചിരിക്കുകയാണ്. ദേവസ്വം ഭരണം ഭക്ത ജനങ്ങള്ക്ക് വിട്ടുനല്കണം എന്ന ആവശ്യത്തെ കമ്യൂണിസ്റ്റ് സര്ക്കാര് ശക്തമായി എതിര്ക്കുന്നതിന് കാരണം അവരുടെ കണ്ണ് ക്ഷേത്ര സ്വത്തുക്കളിലായതുകൊണ്ടാണ്. ദേവസ്വം ബോര്ഡുകള് സര്ക്കാരിന്റെ നിയന്ത്രണത്തില് തന്നെ തുടരും എന്ന നിലപാടാണ് അയ്യപ്പ സംഗമത്തിലും മുഖ്യമന്ത്രി സ്വീകരിച്ചത്. അതിന് കാരണം ഇപ്പോള് എല്ലാവര്ക്കും മനസിലായിട്ടുണ്ട്. ശബരിമലയിലെ സ്വര്ണ്ണം മോഷണം പോയ സംഭവത്തില് കുറ്റക്കാരെ സംരക്ഷിക്കുന്ന മുഖ്യമന്ത്രി പിണറായി വിജയനെതിരെ ഒക്ടോബര് 8 ന് ബിജെപി ക്ളിഫ് ഹൗസിലേക്ക് മാര്ച്ച് നടത്തുമെന്നും അദ്ദേഹം അറിയിച്ചു.
മുഖ്യമന്ത്രി പിണറായി വിജയന് തന്നെയാണ് ശബരിമലയിലെ പ്രശ്നങ്ങള്ക്ക് ഉത്തരവാദി. ശബരിമലയിലെ കൊള്ള പുറത്തു വന്നിട്ടും തിരുവിതാംകൂര് ദേവസ്വം ബോര്ഡിനെ പിരിച്ചുവിടാതെ സംരക്ഷിക്കുക മാത്രമല്ല കാലാവധി നീട്ടി നല്കാനും സര്ക്കാര് ശ്രമിക്കുന്നത് ദുരൂഹമാണ്. പിണറായിയുടെ കീഴിലുള്ള ഏതെങ്കിലും ഏജന്സിയല്ല, സ്വതന്ത്ര ഏജന്സി തന്നെ അന്വേഷിക്കണം. കേന്ദ്ര ഏജന്സിയുടെ അന്വേഷണമാണ് ശബരിമലയില് ആവശ്യം. ശബരിമലയിലെ തട്ടിപ്പുകള് എന്നു തുടങ്ങി, ആരു തുടങ്ങി എന്നത് അന്വേഷണ പരിധിയില് കൊണ്ടു വരണം. കിലോക്കണക്കിന് സ്വര്ണ്ണമാണ് കാണാതായിരിക്കുന്നത്.
ശബരിമല സംഭവത്തിന്റെ ഉത്തരവാദിത്വം ഏറ്റെടുത്ത് ദേവസ്വംമന്ത്രിയും ദേവസ്വം ബോര്ഡ് പ്രസിഡന്റും രാജിവയ്ക്കണം. കേരളത്തിലെ മുഴുവന് ക്ഷേത്രങ്ങളിലും ആസ്തികള് പരിശോധിക്കണം. ഭൂമിയും സ്വര്ണ്ണാഭരണങ്ങളുമടക്കം എന്തൊക്കെ നഷ്ടമായി എന്ന് ഭക്തര്ക്ക് അറിയണം. ക്ഷേത്രങ്ങള് സഖാക്കന്മാരുടേയും കോണ്ഗ്രസുകാരുടേയുമൊന്നും സ്വകാര്യ സ്വത്തല്ല, ഹിന്ദു വിശ്വാസികളുടേതാണ് എന്നോര്മ വേണം. ശബരിമലയില് ഇത്രയും നടന്നിട്ടുണ്ടെങ്കില് മറ്റു ക്ഷേത്രങ്ങളിലും വലിയ മോഷണം നടന്നിട്ടുണ്ട് എന്നുറപ്പാണ്. നിരവധി പേരാണ് ക്ഷേത്രങ്ങള് കൊള്ളയടിക്കുന്ന ബോര്ഡ് ഭാരവാഹികള്ക്കെതിരെ പരാതിപ്പെടുന്നത്. ക്ഷേത്ര സ്വത്ത് കൊള്ളയടിക്കുന്ന വാര്ത്തകള് പുറത്തു വരുമ്പോള് തങ്ങള്ക്ക് പങ്കില്ല എന്ന സംസ്ഥാന സര്ക്കാര് നിലപാട് അപഹാസ്യമാണ്.
ഹമാസും പാലസ്തീനുമല്ല ജനങ്ങളെ ബാധിക്കുന്ന വിഷയം. തൊഴിലില്ലായ്മയും വില കയറ്റവും അടക്കമുള്ള ജനകീയ വിഷയങ്ങളാണ് ജനങ്ങളെ ബാധിക്കുന്നത്. അഴിമതിക്കാരായ ഇടതു വലതുമുന്നണികള് വേണമോ വേണ്ടയോ എന്നത് കേരളത്തിലെ ജനങ്ങള് തീരുമാനിക്കും. 2014 ല് രാജ്യത്തെ ജനങ്ങള് അഴിമതിക്കാരായ കോണ്ഗ്രസിനെ പുറത്താക്കി നരേന്ദ്രമോദി സര്ക്കാരിനെ അധികാരത്തിലെത്തിച്ചതു പോലെ വരുന്ന തെരഞ്ഞെടുപ്പില് കേരളത്തില് പിണറായി സര്ക്കാരിനെ തള്ളി ജനം ബിജെപിയെ പിന്തുണയ്ക്കുമെന്നും ബിജെപി സംസ്ഥാന പ്രസിഡന്റ് കൂട്ടിച്ചേര്ത്തു.
