62 വര്ഷത്തെ സേവനം: മിഗ്-21ന്റെ അവസാന ‘പ്രവൃത്തിദിനം’ കഴിഞ്ഞു; ഇനി വിടവാങ്ങല്, ഇന്ന് ചണ്ഡീഗഢില് നടക്കുന്ന ചടങ്ങില് സേന ഔദ്യോഗിക യാത്രയയപ്പ് നല്കും
ബികാനേര് (രാജസ്ഥാന്): 62 വര്ഷം ഇന്ത്യന് വ്യോമസേനയെ സേവിച്ച മിഗ്-21ന്റെ അവസാന പ്രവൃത്തിദിനം കഴിഞ്ഞു. എയര് ചീഫ് മാര്ഷല് എ.പി സിങ് തന്നെയാണ് മിഗ്-21ന്റെ അവസാന ഔദ്യോഗിക പറക്കലില് പൈലറ്റായത്. ഈ മാസം 18 നും 19 നുമായിരുന്നു അത്.
ഇന്ന് ചണ്ഡീഗഢില് നടക്കുന്ന ചടങ്ങില് അവയ്ക്ക് സേന ഔദ്യോഗിക യാത്രയയപ്പ് നല്കും. റഷ്യന്നിര്മിത മിഗിന്റെ സ്ഥാനം ഇന്ത്യ സ്വന്തമായി വികസിപ്പിച്ച തേജസ് ഏറ്റെടുക്കും.
”1960-കളില് വ്യോമസേനയിലെത്തിയപ്പോഴേ ഒരു പണിക്കുതിരയെപ്പോലെയായിരുന്നു മിഗ്-21. അത് അങ്ങനെത്തന്നെ തുടര്ന്നു. 1985-ലാണ് എന്റെ ആദ്യത്തെ മിഗ്-21 അനുഭവം. അന്ന് തേജ്പുരില് മിഗ്ഗിന്റെ ടൈപ്പ്-77 ഞാന് പറത്തി. പറപ്പിക്കാന് സുഖമുള്ള ഗംഭീരവിമാനമാണത്. അതു പറത്തിയവര്ക്കെല്ലാം മിഗിന്റെ നഷ്ടം അനുഭവപ്പെടും” -സിങ് പറഞ്ഞു.
വ്യോമസേനാ വക്താവ് വിങ് കമാന്ഡര് ജയ്ദീപ് സിങ് യുദ്ധമുന്നണിയില് മിഗ്-21 നല്കിയ ചരിത്രസംഭാവനകള് അനുസ്മരിച്ചു. 1965 ലേയും 71 ലേയും യുദ്ധത്തില് തിളങ്ങുന്ന പ്രകടനമാണ് ആ വിമാനം നടത്തിയത്. 1999 ല് കാര്ഗിലില് മിഗിന്റെ പ്രകടനം നാം കണ്ടു. ഇന്ത്യയില് കടന്നുകയറിയ പാക് അറ്റ്ലാന്റിക് വിമാനം അതു വെടിവെച്ചിട്ടു. 2019 ല് എഫ് 16നെ വീഴ്ത്തി വാര്ത്തകളില് നിറഞ്ഞുവെന്നും അദ്ദേഹം കൂട്ടിച്ചേര്ത്തു. 36 മിഗ് വിമാനങ്ങളാണ് ഇപ്പോള് ഇന്ത്യക്കുള്ളത്.
