ദുബായ്: മലയാളത്തിലടക്കം നിരവധി ആരാധകരുള്ള നടനാണു വിവേക് ഒബ്‌റോയ്. ബോളിവുഡിലും തെന്നിന്ത്യന്‍ സിനിമയിലുമെല്ലാം വില്ലനായും നായകനായുമൊക്കെ വിവേക് തിളങ്ങി. എന്നാല്‍ അതിലുമപ്പുറം 10-ാം വയസുമുതല്‍ ബിസിനസുമായി ബന്ധം പുലര്‍ത്തുകയും കോടികളുടെ ബിസിനസ് സാമ്രാജ്യം പടുത്തുയര്‍ത്തുകയും ചെയ്ത ഒരു വിവേക് ഒബ്‌റോയിയെക്കുറിച്ച് അധികമാര്‍ക്കും അറിവുണ്ടാകില്ല. ദുബായില്‍ ഒരു യൂട്യൂബ് ചാനലിനു നല്‍കിയ അഭിമുഖത്തിലാണ് താരം തന്റെ ബിസിനസ് നേട്ടങ്ങളെക്കുറിച്ചും അച്ഛന്‍ നല്‍കിയ പ്രചോദനത്തെക്കുറിച്ചുമുള്ള അനുഭവങ്ങള്‍ പങ്കുവെച്ചത്.
നടനും രാഷ്ട്രീയപ്രവര്‍ത്തകനുമായിരുന്ന വിവേകിന്റെ അച്ഛന്‍ സുരേഷ് ഒബ്‌റോയ് ഒരു കോടീശ്വരനായിരുന്നു. എന്നാല്‍ മകന്‍ സ്വന്തമായി അധ്വാനിച്ച് സാമ്രാജ്യങ്ങള്‍ പടുത്തുയര്‍ത്തുന്നത് കാണാനാണ് ആ അച്ഛന്‍ ആഗ്രഹിച്ചത്. അതുകൊണ്ടുതന്നെ സാമ്പത്തികമായി അച്ഛന്‍ തന്നെ സഹായിച്ചിരുന്നില്ല. ‘ഞാന്‍ ധനികനാണ്, പക്ഷേ നീയല്ല, നിനക്കതിലേക്ക് എത്താന്‍ പറ്റും, പക്ഷേ നീ സ്വന്തം നിലയിലെത്തണം’ എന്നാണ് അച്ഛന്‍ തന്നോട് പറഞ്ഞതെന്നും ജീവിതത്തില്‍ അത് വലിയ പാഠമായിരുന്നെന്നും വിവേക് ഒബറോയ് പറയുന്നു.
പത്താം വയസില്‍ അച്ഛന്‍ വിവേകിനെ ബിസിനസ് പഠിപ്പിച്ചു തുടങ്ങിയതാണ്. കൗമാരക്കാലം മുഴുവന്‍ സ്റ്റോക്ക് മാര്‍ക്കറ്റിനെക്കുറിച്ച് മനസിലാക്കാന്‍ ശ്രമിച്ചു. ഇപ്പോള്‍ ദുബായില്‍ റിയല്‍ എസ്റ്റേറ്റ് ബിസിനസ് നടത്തുകയാണ് അദ്ദേഹം. ”എന്റെ നിക്ഷേപകര്‍ക്കും എനിക്കും വേണ്ടി ഞാന്‍ ധാരാളം പണം സമ്പാദിച്ചു, 23 വയസായപ്പോഴേക്കും ഞാന്‍ കമ്പനി വിറ്റു. ആ വര്‍ഷങ്ങളിലെല്ലാം കഠിനാധ്വാനം ചെയ്തില്ലായിരുന്നെങ്കില്‍, ഇതൊന്നും ഒരിക്കലും സാധ്യമാകുമായിരുന്നില്ല. ഇപ്പോള്‍ ഇന്ത്യന്‍ ഓഹരി വിപണിയില്‍ ഒമ്പത് കമ്പനികളെ ലിസ്റ്റ് ചെയ്യാന്‍ എനിക്കായി, ഇനിയും നാലെണ്ണം കൂടി ചെയ്യാന്‍ പദ്ധതിയുണ്ട്’ വിവേക് പറഞ്ഞു.
2002-ല്‍ രാം ഗോപാല്‍ വര്‍മ്മയുടെ ‘കമ്പനി’ യിലൂടെ സിനിമയിലെത്തിയ വിവേക് ഒബ്‌റോയ് അറിയപ്പെടുന്ന താരമായി ഉയര്‍ന്നെങ്കിലും സിനിമയില്‍ നിന്നുള്ള വരുമാനത്തെ മാത്രം ആശ്രയിക്കുന്നത് ബുദ്ധിയല്ലെന്ന് തിരിച്ചറിഞ്ഞതോടെയാണ് 2009-ല്‍ ബിസിനസിലേക്ക് കൂടുതല്‍ ശ്രദ്ധിച്ചുതുടങ്ങിയത്. ‘ഒരു ലോബിക്ക് നമ്മുടെ ഭാവി തീരുമാനിക്കാന്‍ കഴിയുന്ന ഒരു അവസ്ഥയിലെത്താന്‍ ഞാനാഗ്രഹിച്ചില്ല. ആര്‍ക്കും ഭീഷണിപ്പെടുത്തി എന്തെങ്കിലും ചെയ്യിപ്പിക്കാന്‍ കഴിയരുത് എന്ന് ഞാന്‍ ആഗ്രഹിച്ചു.’-ഒബ്‌റോയ് പറഞ്ഞു. ഇന്ത്യ വിട്ട് ദുബായിലേക്ക് താമസം മാറിയതോടെ വിവേക് ഒബ്റോയിയുടെ ജീവിതം തന്നെ മാറി.
തന്റെ സമ്പത്ത് വര്‍ധിപ്പിക്കാന്‍ സഹായിച്ച ദുബായിലെ നല്ല അന്തരീക്ഷത്തെക്കുറിച്ചും വിവേക് സംസാരിച്ചു. ഫോര്‍ബ്‌സ് ഇന്ത്യയുടെ കണക്കനുസരിച്ച്, 2025 ഏപ്രില്‍ വരെ വിവേക് ഒബ്റോയിയുടെ ആസ്തി 1,200 കോടിയായിരുന്നു.
