ഓപ്പറേഷന്‍ സിന്ദൂറിലെ നടപടികള്‍ തുടരുന്നു; വിവരങ്ങള്‍ ചോര്‍ന്നെന്ന സംശയത്തില്‍ ഇന്ത്യയിലെ നിര്‍ണായക വിമാനത്താവളങ്ങള്‍ നിയന്ത്രിക്കുന്ന സെലബി ഏവിയേഷനു ക്ലിയറന്‍സ് നഷ്ടമായി; ഗതികെട്ടു വിശദീകരണവുമായി രംഗത്ത്: ‘തുര്‍ക്കിയുമായോ എര്‍ദോഗന്റെ മകളുമായോ ബന്ധമില്ല; പ്രതിരോധ വിഭാഗത്തിന്റെ ഓഡിറ്റിന് വിധേയം; ഇന്ത്യയോടു പ്രതിജ്ഞാബദ്ധം’
ന്യൂഡല്‍ഹി: ഇന്ത്യയുടെ നിര്‍ണായക വിമാനത്താവളങ്ങളുടെ നിയന്ത്രണമുള്ള തുര്‍ക്കി ഏവിയേഷന്‍ കമ്പനിയുടെ ക്ലിയറന്‍സ് നഷ്ടപ്പെട്ടെന്നു കമ്പനി. എര്‍ദോഗന്റെ മകള്‍ കമ്പനിയുടെ ഉടമയല്ലെന്നും ഞങ്ങള്‍ തുര്‍ക്കിക്കാരല്ലെന്നും വിശദീകരണവുമായി സെലെബി ഏവിയേഷന്‍ രംഗത്തുവന്നതോടെയാണ് ക്ലിയറന്‍സ് നഷ്ടപ്പെട്ടെന്ന വിവരവും പുറത്തുവന്നത്. ഇതോടാപ്പം കമ്പനി ഉടമകളുടെ വിശദാംശങ്ങളും സെലെബി പുറത്തുവിട്ടു. പഹല്‍ഗാം ആക്രമണത്തിനു പിന്നാലെയുണ്ടായ യുദ്ധത്തില്‍ പാകിസ്താനെ പിന്തുണച്ച തുര്‍ക്കിയുടെ നിലപാടിനു പിന്നാലെയാണു ഇന്ത്യയുടെ നടപടിയെന്നാണു വിവരം.
കമ്പനിക്ക് എന്തെങ്കിലും രാഷ്ട്രീയ അഫിലിയേഷന്‍ ഇല്ലെന്നും തുര്‍ക്കിക്കാരായ ആരും ഉടമകളായി ഇല്ലെന്നും കമ്പനി വ്യക്തമാക്കി. സോഷ്യല്‍ മീഡിയയില്‍ കമ്പനിക്കെതിരേ വ്യാപക ആരോപണങ്ങള്‍ പ്രചരിച്ചതോടെയാണു വിശദീകരിക്കുന്നതെന്നും തുര്‍ക്കിഷ് പ്രസിഡന്റ് എര്‍ദോഗന്റെ മകള്‍ സുമെയ് എര്‍ദോഗനുമായി ബന്ധമില്ലെന്നും കമ്പനി പുറത്തുവിട്ട ഔദ്യോഗിക കുറിപ്പില്‍ പറയുന്നു.
‘മാതൃ സ്ഥാപനത്തില്‍ സുമെയ് എന്ന പേരില്‍ ആരും ഓഹരി ഉടമകളായിട്ടില്ല. കമ്പനിയുടെ ഉടമസ്ഥാവകാശം സെലെബിയോഗ്ലു കുടുംബത്തിലെ അംഗങ്ങള്‍ക്ക് മാത്രമായി പരിമിതപ്പെടുത്തിയിരിക്കുന്നു. കാന്‍ സെലെബിയോഗ്ലു, കാനന്‍ സെലെബിയോഗ്ലു എന്നീ രണ്ട് ഉടമകള്‍ക്കും രാഷ്ട്രീയ ബന്ധമില്ല. ഞങ്ങള്‍ പ്രൊഫഷണലായി നിയന്ത്രിക്കപ്പെടുന്ന, ആഗോളതലത്തില്‍ പ്രവര്‍ത്തിക്കുന്ന ഒരു വ്യോമയാന സേവന കമ്പനിയാണെ’ന്നും പ്രസ്താവനയില്‍ പറയുന്നു.
‘ഒരു മാനദണ്ഡം വെച്ചു നോക്കിയാലും ഞങ്ങള്‍ ഒരു തുര്‍ക്കി സംഘടനയല്ല. കൂടാതെ ആഗോളതലത്തില്‍ അംഗീകരിക്കപ്പെട്ട കോര്‍പ്പറേറ്റ് ഭരണം, സുതാര്യത, നിഷ്പക്ഷത എന്നിവ പൂര്‍ണമായും പാലിക്കുന്നു, വിദേശ സര്‍ക്കാരുകളുമായോ വ്യക്തികളുമായോ രാഷ്ട്രീയ ബന്ധങ്ങളോ ബന്ധങ്ങളോ ഇല്ല. കമ്പനിയുടെ കണക്കനുസരിച്ച്, മാതൃ സ്ഥാപനത്തിന്റെ 65 ശതമാനവും കാനഡ, യുഎസ്, യുകെ, സിംഗപ്പൂര്‍, യുഎഇ, പടിഞ്ഞാറന്‍ യൂറോപ്പ് എന്നിവിടങ്ങളില്‍ നിന്നുള്ള സ്ഥാപന നിക്ഷേപകരുടെ ഉടമസ്ഥതയിലാണ്. ജേഴ്സിയില്‍ രജിസ്റ്റര്‍ ചെയ്തിട്ടുള്ള ‘ആക്‌റ്റെറ പാര്‍ട്ണേഴ്സ്-2 എല്‍പി’ക്ക് സെലെബി ഹാവാക് ഹോള്‍ഡിംഗ് എ.എസില്‍ 50 ശതമാനം ഓഹരികളുണ്ട്, അതേസമയം 15 ശതമാനം ഡച്ച് സ്ഥാപനമായ ആല്‍ഫ എയര്‍പോര്‍ട്ട് സര്‍വീസസ് ബിവിയുടെ കൈവശമുണ്ട്.’ – കമ്പനി കൂട്ടിച്ചേര്‍ത്തു.
ദേശീയ സുരക്ഷാ കാരണങ്ങളാല്‍ ഡല്‍ഹി വിമാനത്താവളത്തിന്റെ കാര്‍ഗോ ടെര്‍മിനലില്‍ പ്രവര്‍ത്തിക്കാനുള്ള സെലെബിയുടെ അനുമതി റദ്ദാക്കിയതിനെ തുടര്‍ന്നാണ് വിശദീകരണം. ‘ഞങ്ങളുടെ എല്ലാ സൗകര്യങ്ങളും സിഐഎസ്എഫ്, ബിസിഎഎസ്, എഎഐ എന്നിവയുള്‍പ്പെടെ ഇന്ത്യന്‍ അധികാരികള്‍ പതിവായി ഓഡിറ്റ് ചെയ്യുന്നു. ഇന്ത്യന്‍ വ്യോമയാനം, ദേശീയ സുരക്ഷ, നികുതി ചട്ടങ്ങള്‍ എന്നിവ ഞങ്ങള്‍ പൂര്‍ണമായും പാലിക്കുന്നെ’ന്നും കമ്പനി വ്യക്തമാക്കി.
‘ഇന്ത്യയോട് പൂര്‍ണമായും പ്രതിജ്ഞാബദ്ധമാണ്, ആഗോള വ്യോമയാന കേന്ദ്രമെന്ന നിലയില്‍ രാജ്യത്തിന്റെ പുരോഗതിക്ക് അര്‍ത്ഥവത്തായ സംഭാവന നല്‍കുന്നതില്‍ സെലെബി ഇപ്പോഴും പ്രതിജ്ഞാബദ്ധമാണ്. തെറ്റായ വിവരങ്ങളെക്കാള്‍ വസ്തുതകള്‍, സുതാര്യത, സാമാന്യബുദ്ധി എന്നിവ വിജയിക്കുമെന്ന് ഞങ്ങള്‍ക്ക് ഉറപ്പുണ്ടെന്നും കമ്പനി പറഞ്ഞു.
1958ല്‍ സ്ഥാപിച്ച ടര്‍ക്കിഷ് കമ്പനിയായ സെലെബിയാണ് ഓപ്പറേഷന്‍ സിന്ദൂറിനു പിന്നാലെ കടുത്ത വിമര്‍ശനങ്ങള്‍ നേരിടുന്നത്. പാകിസ്താനു പിന്തുണ പ്രഖ്യാപിച്ച തുര്‍ക്കിയുടെ പ്രധാന കമ്പനിയെ ഇന്ത്യയില്‍നിന്ന് വിരങ്ങള്‍ ചോര്‍ത്തുന്നതിന് ഉപയോഗിച്ചേക്കാം എന്ന ആശങ്കയും ഉയര്‍ന്നിരുന്നു. തുര്‍ക്കിയുടെ ട്രോജന്‍ കുതിരയാണോ സെലെബി എന്നാണ് അന്വേഷണം.
ഡല്‍ഹി, ബെംഗളൂരു, ഹൈദരാബാദ്, ചെന്നൈ, അഹമ്മദാബാദ്, ഗോവ, കൊച്ചി, കണ്ണൂര്‍ എന്നിവയുള്‍പ്പെടെ ഒമ്പത് പ്രധാന ഇന്ത്യന്‍ വിമാനത്താവളങ്ങളില്‍ പ്രവര്‍ത്തിക്കുന്ന സെലെബി ഏവിയേഷന്‍ ആയിരക്കണക്കിന് ആളുകളെ ജോലിക്കെടുക്കുകയും വിമാനത്താവള ലോജിസ്റ്റിക്‌സില്‍ നിര്‍ണായക പങ്ക് വഹിക്കുകയും ചെയ്യുന്നു. സ്വകാര്യ ഉടമസ്ഥതയിലാണെങ്കിലും, റാമ്പ് സര്‍വീസുകള്‍, ഫ്‌ലൈറ്റ് പ്രവര്‍ത്തനങ്ങള്‍, കാര്‍ഗോ മാനേജ്‌മെന്റ്, ബ്രിഡ്ജ് നിയന്ത്രണം തുടങ്ങിയ നിരവധി ഉയര്‍ന്ന സുരക്ഷാ പ്രവര്‍ത്തനങ്ങള്‍ കമ്പനി കൈകാര്യം ചെയ്യുന്നു. ഏറെ സുരക്ഷാ പ്രാധാന്യമുള്ള മേഖലകളില്‍ വിദേശ ഇടപെടലിനെക്കുറിച്ചുള്ള ആശങ്കളാണ് ഉയരുന്നത്. നയതന്ത്ര ബന്ധങ്ങള്‍ വഷളാകുമ്പോള്‍ ഇത് നിര്‍ണായകവുമാണ്.
ഏപ്രില്‍ 22-ന് പഹല്‍ഗാമില്‍ നടന്ന ഭീകരാക്രമണത്തില്‍ 26 പേര്‍ കൊല്ലപ്പെട്ടതിനെത്തുടര്‍ന്ന് തുര്‍ക്കി പാകിസ്താന് ഡ്രോണുകള്‍ നല്‍കിയെന്ന റിപ്പോര്‍ട്ടുകള്‍ ഇന്ത്യയില്‍ വന്‍ രോഷത്തിന് ഇടയാക്കിയിരുന്നു. ആക്രമണത്തിനു പ്രതികാരമായി നിയന്ത്രണ രേഖയ്ക്ക് കുറുകെയുള്ള സൈനിക ആക്രമണം ഓപ്പറേഷന്‍ സിന്ദൂര്‍ ഇന്ത്യ ആരംഭിച്ചു. ദിവസങ്ങള്‍ക്ക് ശേഷം, രണ്ട് ദക്ഷിണേഷ്യന്‍ അയല്‍ക്കാര്‍ക്കിടയില്‍ താല്‍ക്കാലിക വെടിനിര്‍ത്തല്‍ സംബന്ധിച്ച റിപ്പോര്‍ട്ടുകള്‍ പുറത്തുവന്നു. എന്നാല്‍, ഇസ്ലാമാബാദിനുള്ള തുര്‍ക്കി പിന്തുണ ഇന്ത്യയില്‍ പൊതുജനങ്ങളുടെയും രാഷ്ട്രീയത്തിന്റെയും പ്രതിഷേധത്തിനൊപ്പം സോഷ്യല്‍ മീഡിയയില്‍ ‘ബോയ്‌കോട്ട് തുര്‍ക്കി’ എന്ന പ്രചാരണത്തിനും ഇടയാക്കി.
എയര്‍ക്രാഫ്റ്റ് മാര്‍ഷലിംഗ്, ലോഡ് ബാലന്‍സിംഗ്, കാര്‍ഗോ ടെര്‍മിനല്‍ മാനേജ്‌മെന്റ് തുടങ്ങിയ ജോലികള്‍ സെലെബിയുടെ പരിധിയിലാണ്. നിര്‍ണായക സ്ഥാനങ്ങളിലേക്കുള്ള സെലെബിയുടെ പ്രവേശനം തുര്‍ക്കിയുടെ നിലപാടോടെ സംശയാസ്പദമായിട്ടുണ്ട്. 1958 ല്‍ സ്ഥാപിതമായ സെലെബി, തുര്‍ക്കിയിലെ ആദ്യത്തെ സ്വകാര്യ ഉടമസ്ഥതയിലുള്ള ഗ്രൗണ്ട്-ഹാന്‍ഡ്ലിംഗ് കമ്പനിയാണ്. മൂന്ന് ഭൂഖണ്ഡങ്ങളിലായി എഴുപതിലധികം വിമാനത്താവളങ്ങളില്‍ പ്രവര്‍ത്തിക്കുന്ന ഈ സ്ഥാപനം ജനറല്‍ ഏവിയേഷന്‍, വെയര്‍ഹൗസ്, കാര്‍ഗോ മാനേജ്‌മെന്റ്, വിഐപി ലോഞ്ച് മാനേജ്‌മെന്റ് എന്നിവ ഉള്‍പ്പെടുന്ന സേവനങ്ങള്‍ വാഗ്ദാനം ചെയ്യുന്നു. ആഗോളതലത്തില്‍ 15,000 ജീവനക്കാരുമുണ്ട്.
ഗ്രൗണ്ട് ഹാന്‍ഡിലിംഗിനു സെലബി എയര്‍പോര്‍ട്ട് സര്‍വീസ് ഇന്ത്യ പ്രൈവറ്റ് ലിമിറ്റഡ് എന്ന കമ്പനിയും ഡല്‍ഹി എയര്‍പോര്‍ട്ടിലെ കാര്‍ഗോ ഹാന്‍ഡിലിംഗിന് സെലെബി ഡല്‍ഹി കാര്‍ഗോ ടെര്‍മിനല്‍ എന്നാ സ്ഥാപനവും ആരംഭിച്ചു. ഇതിനുശേഷം ഇന്ത്യയിലെ പ്രധാന ഒമ്പത് എയര്‍പോര്‍ട്ടിലേക്കും പ്രവര്‍ത്തനം വ്യാപിപ്പിച്ചു. എന്‍ഡിടിവിയുടെ കണക്കനുസരിച്ച്, സെലെബി ഇപ്പോള്‍ ഇന്ത്യയില്‍ പ്രതിവര്‍ഷം 58,000-ത്തിലധികം വിമാനങ്ങളും 540,000 ടണ്‍ കാര്‍ഗോയും കൈകാര്യം ചെയ്യുന്നു. 7,800 പ്രാദേശിക ജീവനക്കാരും ഇവര്‍ക്കുണ്ട്. ഇവരുടെ പ്രധാന സേവനങ്ങള്‍:
1. റാമ്പ് സേവനങ്ങള്‍ (ടാക്‌സിയിംഗ് സമയത്ത് വിമാനങ്ങളെ നയിക്കല്‍)
2. ലോഡ് നിയന്ത്രണം (വിമാനങ്ങളില്‍ ശരിയായ ഭാരം വിതരണം ഉറപ്പാക്കല്‍)
3. ബ്രിഡ്ജ് ഓപ്പറേഷന്‍ (യാത്രക്കാരുടെ ബോര്‍ഡിംഗ് പാലങ്ങള്‍ കൈകാര്യം ചെയ്യല്‍)
4. ചരക്ക്, വെയര്‍ഹൗസ് കൈകാര്യം ചെയ്യല്‍ (ഉയര്‍ന്ന മൂല്യമുള്ളതും സെന്‍സിറ്റീവ് സാധനങ്ങളും നിരീക്ഷിക്കല്‍)
5. പൊതു വ്യോമയാനം (വിഐപികളും സ്വകാര്യ ചാര്‍ട്ടേഡ് വിമാനങ്ങളും ഉള്‍പ്പെടെ)
സെലെബിയുടെ ഇന്ത്യന്‍ പ്രവര്‍ത്തനങ്ങളും അങ്കാറയുടെ വിദേശനയ തീരുമാനങ്ങളും തമ്മില്‍ നേരിട്ടുള്ള ബന്ധം കണ്ടെത്തിയിട്ടില്ലെങ്കിലും, ഇന്ത്യയുടെ വ്യോമയാന സുരക്ഷാ ചട്ടക്കൂടില്‍ ഒരു തുര്‍ക്കി സ്ഥാപനം ആഴത്തില്‍ ഉള്‍ച്ചേരുന്നതിന്റെ പ്രത്യാഘാതം ആശങ്കകള്‍ ഉയര്‍ത്തുന്നുണ്ട്.
സെലെബിയുടെ കരാറുകളുടെയോ അനുമതികളുടെയോ ഏതെങ്കിലും അവലോകനം സംബന്ധിച്ച് ഉദ്യോഗസ്ഥര്‍ ഇതുവരെ ഒരു ഔദ്യോഗിക പ്രസ്താവന പുറപ്പെടുവിച്ചിട്ടില്ല. എന്നിരുന്നാലും, ദേശീയ സുരക്ഷാ ചര്‍ച്ചകള്‍ വിദേശ നിക്ഷേപ നയത്തില്‍ ആധിപത്യം സ്ഥാപിക്കുന്നതിനാല്‍, വരും ആഴ്ചകളില്‍ സെലെബി കൂടുതല്‍ നിയന്ത്രണ പരിശോധനയ്ക്ക് വിധേയമായേക്കാം.
2020 ലെ ഗാല്‍വാന്‍ വാലി സംഘര്‍ഷത്തെത്തുടര്‍ന്ന് ചൈനീസ് സ്ഥാപനങ്ങളെ സെന്‍സിറ്റീവ് മേഖലകളില്‍നിന്ന് വിലക്കുന്നതില്‍ ഇന്ത്യ തീരുമാനമെടുത്തിരുന്നു. തന്ത്രപരമായ സാന്നിധ്യമുള്ള ടര്‍ക്കിഷ് സ്ഥാപനങ്ങളുടെ കാര്യത്തിലും പ്രതിരോധ വിദഗ്ധര്‍ ഈ പ്രശ്‌നം ചൂണ്ടിക്കാട്ടുന്നു. സെലെബി ഇപ്പോഴും പ്രവര്‍ത്തനക്ഷമമാണെങ്കിലും ഇന്ത്യയില്‍ എത്രകാലം ചുവടുറപ്പിക്കാന്‍ കഴിയുമെന്നത് ഇന്ത്യയുടെ നയതന്ത്ര നിലപാടുകളെ ആശ്രയിച്ചിരിക്കും.
