ഇതില്‍ കൂടുതല്‍ എന്തു തെളിവ്? ഇന്ത്യ വധിച്ച അഞ്ച് കൊടും ഭീകരര്‍ക്ക് ഔദ്യോഗിക സംസ്‌കാരം നല്‍കി പാകിസ്താന്‍; ജനറല്‍ മുനീര്‍ അടക്കം ഉന്നത സൈനികര്‍ പങ്കെടുത്തത് യൂണിഫോമില്‍; ശവമഞ്ചം പാക്പതാക പുതപ്പിച്ചു
ഇവരുടെ സംസ്‌കാര ചടങ്ങുകളില്‍ സൈനിക ഉന്നത ഉദ്യോഗസ്ഥര്‍ മിലിട്ടറി യൂണിഫോമില്‍ പങ്കെടുത്തത് സൈന്യവും തീവ്രവാദികളും തമ്മിലുള്ള അടുത്ത ബന്ധമാണു വ്യക്തമാക്കുന്നത്. പഞ്ചാബ് പ്രവിശ്യയുടെ മുഖ്യമന്ത്രി മറിയം നവാസും പങ്കെടുത്തു
ന്യൂഡല്‍ഹി: പഹല്‍ഗാം ഭീകരാക്രമണത്തിനു തിരിച്ചടിയായി പാക്കിസ്ഥാനിലെ 9 ഭീകരകേന്ദ്രങ്ങളില്‍ ഇന്ത്യ നടത്തിയ ഓപ്പറേഷന്‍ സിന്ദൂറില്‍ കൊല്ലപ്പെട്ട ഭീകരരുടെ വിവരങ്ങള്‍ പുറത്തുവിട്ട് സൈനികവൃത്തങ്ങള്‍. ലഷ്‌കറെ തയിബ, ജയ്‌ഷെ മുഹമ്മദ് എന്നീ ഭീകരസംഘടനകളുമായി ബന്ധമുള്ള അഞ്ച് ഭീകരരുടെ വിവരങ്ങളാണ് പുറത്തുവിട്ടത്. മുദാസ്സര്‍ ഖാദിയാന്‍ ഖാസ്, ഹാഫിസ് മുഹമ്മദ് ജമീല്‍, മുഹമ്മദ് യൂസുഫ് അസ്ഹര്‍, ഖാലിദ് (അബു ആകാഷ), മുഹമ്മദ് ഹസ്സന്‍ ഖാന്‍ എന്നിവരെയാണ് സൈന്യം വധിച്ചത്.
ഇവരുടെ സംസ്‌കാര ചടങ്ങുകളില്‍ സൈനിക ഉന്നത ഉദ്യോഗസ്ഥര്‍ മിലിട്ടറി യൂണിഫോമില്‍ പങ്കെടുത്തത് സൈന്യവും തീവ്രവാദികളും തമ്മിലുള്ള അടുത്ത ബന്ധമാണു വ്യക്തമാക്കുന്നത്. പഞ്ചാബ് പ്രവിശ്യയുടെ മുഖ്യമന്ത്രി മറിയം നവാസും പങ്കെടുത്തു. തീവ്രവാദികളുടെ ശവമഞ്ചങ്ങള്‍ പാക് പതാക പുതപ്പിച്ചിട്ടുണ്ട്. ആഗോള തീവ്രവാദ പ്രവര്‍ത്തനങ്ങളില്‍ പാകിസ്താന്റെ പങ്ക് വ്യക്തമാക്കുന്ന ഏറ്റവും ശക്തമായ തെളിവായിട്ടാണ് ഇത് വിലയിരുത്തപ്പെടുന്നത്.
1. മുദാസര്‍ ഖാദിയാന്‍ ഖാസ്
ലഷ്‌കറെ തയിബ പ്രവര്‍ത്തകനായ മുദാസര്‍ ഖാദിയാന്‍ ഖാസിന്റെ (മുദാസര്‍, അബു ജുണ്ടാല്‍ എന്നീ പേരുകളിലും ഇയാള്‍ അറിയപ്പെട്ടിരുന്നു) സംസ്‌കാരത്തിന് ജമാഅത്തുദ്ദ അവ പ്രവര്‍ത്തകനും ആഗോള ഭീകരപ്പട്ടികയില്‍ ഉള്‍പ്പെട്ടയാളുമായ ഹാഫിസ് അബ്ദുല്‍ റൗഫാണ് നേതൃത്വം നല്‍കിയത്. പാക്കിസ്ഥാന്‍ സൈന്യത്തിലെ ഒരു ലഫ്റ്റനന്റ് ജനറലും പാക്ക് പഞ്ചാബ് പൊലീസ് ഐജിയും സംസ്‌കാരച്ചടങ്ങില്‍ പങ്കെടുത്തിരുന്നു. ഇന്ത്യയില്‍നിന്ന് 25 കിലോമീറ്റര്‍ മാത്രം അകലെയുള്ള ലഷ്‌കറെ ആസ്ഥാനമായ മര്‍ക്കസ് തായ്ബയുടെ ചുമതലക്കാരനായിരുന്നു ഇയാള്‍.
2008 ലെ മുംബൈ ആക്രമണത്തില്‍ ജീവനോടെ പിടിക്കപ്പെട്ട ഏക ഭീകരനായ അജ്മല്‍ കസബ്, ഈ ക്യാമ്പില്‍ നിന്നാണ് പരിശീലനം നേടിയതെന്ന് സമ്മതിച്ചിരുന്നു. 26/11 ല്‍ ഉള്‍പ്പെട്ട മറ്റൊരു ഭീകരനായ ഡേവിഡ് ഹെഡ്ലിയും ഇവിടെ പരിശീലനം നേടിയതായി റിപ്പോര്‍ട്ടുണ്ട്.
ഖാസിന്റെ സംസ്‌കാര ചടങ്ങുകള്‍ക്ക് നിയുക്ത ആഗോള ഭീകരനായ ഹാഫിസ് അബ്ദുള്‍ റൗഫ് നേതൃത്വം നല്‍കിയതായി വൃത്തങ്ങള്‍ അറിയിച്ചു. അദ്ദേഹത്തിന്റെ സംസ്‌കാര ചടങ്ങില്‍, പാകിസ്ഥാന്‍ ആര്‍മി ചീഫ് ജനറല്‍ അസിം മുനീര്‍, പഞ്ചാബ് പ്രവിശ്യാ മുഖ്യമന്ത്രി മറിയം നവാസ് എന്നിവരുടെ പേരില്‍ ഉന്നത സൈനിക ഉദ്യോഗസ്ഥര്‍ പുഷ്പചക്രം അര്‍പ്പിച്ചു, പാകിസ്ഥാന്‍ ആര്‍മിയില്‍ ലഫ്റ്റനന്റ് ജനറല്‍ പദവി വഹിക്കുന്ന ഒരു ഉദ്യോഗസ്ഥനും പഞ്ചാബ് പ്രവിശ്യയിലെ പോലീസ് ഇന്‍സ്‌പെക്ടര്‍ ജനറലും അദ്ദേഹത്തിന്റെ പ്രാര്‍ത്ഥനയില്‍ പങ്കെടുത്തു.
2. ഹാഫിസ് മുഹമ്മദ് ജമീല്‍
ജയ്‌ഷെ മുഹമ്മദ് സ്ഥാപകന്‍ മസൂദ് അസ്ഹറിന്റെ മൂത്ത സഹോദരിയുടെ ഭര്‍ത്താവാണ് കൊല്ലപ്പെട്ട ഹാഫിസ് മുഹമ്മദ് ജമീല്‍. അസ്ഹറിന്റെ ഇളയ സഹോദരിയുടെ ഭര്‍ത്താവാണ് മുഹമ്മദ് യൂസുഫ് അസ്ഹര്‍. ഉസ്താദ് ജി, മുഹമ്മദ് സലിം, ഗോസി സാഹബ് എന്നീ പേരുകളിലും മുഹമ്മദ് യൂസുഫ് അസ്ഹര്‍ അറിയപ്പെട്ടിരുന്നു. കാണ്ഡഹാര്‍ വിമാന റാഞ്ചല്‍ കേസില്‍ ഇന്ത്യ തേടുന്ന ഭീകരന്‍ കൂടിയായിരുന്നു ഇയാള്‍.
പാകിസ്ഥാനില്‍ ഏകദേശം 100 കിലോമീറ്റര്‍ ഉള്ളിലുള്ള ബഹവല്‍പൂരിലെ മര്‍കസ് സുബ്ഹാന്‍ അല്ലായുടെ ചുമതല ഇയാള്‍ വഹിച്ചിരുന്നു. ജെയ്ഷെ മുഹമ്മദിലേക്ക് ആളുകളെ ആകര്‍ഷിക്കാന്‍ അദ്ദേഹം സജീവമായി പ്രചോദിപ്പിക്കുകയും ഫണ്ട് സ്വരൂപിക്കാന്‍ സഹായിക്കുകയും ചെയ്തുവെന്ന് വൃത്തങ്ങള്‍ പറഞ്ഞു.
ബഹവല്‍പൂര്‍ ക്യാമ്പ് റിക്രൂട്ട്മെന്റ്, പരിശീലനം, സാധ്യതയുള്ളവരെ പഠിപ്പിക്കല്‍ എന്നിവയ്ക്കായി ഉപയോഗിച്ചിരുന്നു, കൂടാതെ അസ്ഹര്‍ പതിവായി ഇവിടെ എത്തിയിരുന്നു. മെയ് 7 ന് ഭീകര ക്യാമ്പില്‍ നടന്ന ആക്രമണത്തില്‍ അസ്ഹറിന്റെയും അദ്ദേഹത്തിന്റെ നാല് സഹായികളുടെയും കുറഞ്ഞത് 10 കുടുംബാംഗങ്ങള്‍ കൊല്ലപ്പെട്ടുവെന്ന് വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തിട്ടുണ്ട്.
3. അബു ആകാഷ
അബു ആകാഷ എന്നറിയപ്പെടുന്ന ഖാലിദ്, ലഷ്‌കറെ തയിബ പ്രവര്‍ത്തകനാണ്. ജമ്മുകശ്മീരില്‍ നടന്ന വിവിധ ഭീകരാക്രമണങ്ങളിലും അഫ്ഗാനിസ്ഥാനിലേക്കുള്ള ആയുധക്കള്ളക്കടത്തിലും ഇയാള്‍ക്കു പങ്കുണ്ടെന്ന് തെളിഞ്ഞിരുന്നു. ഫൈസലാബാദില്‍ നടന്ന ഇയാളുടെ സംസ്‌കാരച്ചടങ്ങിലും പാക്കിസ്ഥാന്‍ സേനയിലെ ഉന്നത ഉദ്യോഗസ്ഥരും ഫൈസലാബാദ് ഡപ്യൂട്ടി കമ്മിഷണറും പങ്കെടുത്തിരുന്നു.
4. മുഹമ്മദ് ഹസന്‍ ഖാന്‍
ജയ്‌ഷെ മുഹമ്മദ് പ്രവര്‍ത്തകനാണ് കൊല്ലപ്പെട്ട മുഹമ്മദ് ഹസന്‍ ഖാന്‍. പാക്ക് അധിനിവേശ കശ്മീരിലെ ജയ്‌ഷെ മുഹമ്മദിന്റെ ഓപറേഷനല്‍ കമാന്‍ഡര്‍ മുഫ്തി അസ്ഗര്‍ ഖാന്‍ കശ്മീരിയുടെ മകനാണ് ഇയാള്‍. ജമ്മു കശ്മീരില്‍ നടന്ന ഭീകരാക്രമണങ്ങളില്‍ ഇയാള്‍ക്ക് പങ്കുണ്ടെന്ന് തെളിഞ്ഞിട്ടുണ്ട്.
5. മുഹമ്മദ് യൂസഫ് അസ്ഹര്‍
ഉസ്താദ് ജി എന്നും മുഹമ്മദ് സലിം എന്നും വിളിക്കപ്പെടുന്ന യൂസഫ് അസ്ഹറും ജെയ്ഷെയില്‍ അംഗമായിരുന്നു. മസൂദ് അസ്ഹറിന്റെ ഭാര്യാ സഹോദരന്‍ കൂടിയായിരുന്നു അദ്ദേഹം, ജെയ്ഷെ മുഹമ്മദിനായി ആയുധ പരിശീലനം നടത്തിയിരുന്നു. ജമ്മു കശ്മീരിലുടനീളം നിരവധി ഭീകരാക്രമണങ്ങളിലും, 1999-ല്‍ കാണ്ഡഹാര്‍ വിമാന ഹൈജാക്കിംഗ് എന്നറിയപ്പെടുന്ന ഐസി-814 വിമാനം ഹൈജാക്ക് ചെയ്യുന്നതിലും ഇയാള്‍ പങ്കാളിയാണ്. ബന്ദികളെ വിട്ട് മസൂദ് അസ്ഹറിനെ ഇന്ത്യ മോചിപ്പിക്കാന്‍ ഇത് കാരണമായി.
