പാലക്കാട്: വാളയാറില്‍ രാസലഹരിയുമായി അമ്മയും മകനും സുഹൃത്തുക്കളും പിടിയിലായ സംഭവത്തില്‍ കൂടുതല്‍ വിവരങ്ങള്‍ പുറത്ത്. കഴിഞ്ഞ ദിവസമാണ് തൃശൂര്‍ സ്വദേശി അശ്വതി (46), മകന്‍ ഷോണ്‍ സണ്ണി (21), കോഴിക്കോട് എലത്തൂര്‍ സ്വദേശികളായ പി മൃദുല്‍ (29), അശ്വിന്‍ ലാല്‍ (26) എന്നിവര്‍ വില്‍പനയ്ക്കായി കാറില്‍ കൊണ്ടുവരികയായിരുന്ന 10.12 ഗ്രാം എംഡിഎംഎയുമായി എക്‌സൈസിന്റെ പിടിയിലായത്. പിടിയിലായ അമ്മയും മകനും ലഹരിക്കടത്ത് ആരംഭിച്ചത് ഒരുവര്‍ഷം മുമ്പാണെന്ന് എക്‌സൈസ് വ്യക്തമാക്കി.
ഭര്‍ത്താവുമായി അകന്നശേഷം കേസിലെ മുഖ്യപ്രതി മൃദുലുമായുണ്ടാക്കിയ സൗഹൃദമാണ് അശ്വതിയെ ലഹരിക്കടത്ത് സംഘത്തിലെ മുഖ്യകണ്ണിയാക്കിയത്. തൃശൂര്‍ സ്വദേശിയായ അശ്വതി ഭര്‍ത്താവുമായി പിരിഞ്ഞ ശേഷമാണ് കോഴിക്കോട് സ്വദേശി മൃദുലുമായി അടുത്ത ബന്ധമുണ്ടാക്കുന്നത്. മൃദുലിന്റെ പ്രേരണയാലാണ് ഇവര്‍ ലഹരി ഉപയോഗം തുടങ്ങിയത്. പിന്നാലെ ഒരു വര്‍ഷം മുമ്പ് ലഹരികടത്തിലേക്ക് കടന്നു.
മുഖ്യപ്രതി മൃദുലാണ് ബംഗലൂരുവില്‍ നിന്ന് ലഹരി എത്തിച്ച് നല്‍കുന്നത്. പിന്നീട് എറണാകുളത്ത് ചില്ലറവില്‍പന നടത്തും. കൂട്ടിന് 21 കാരന്‍ മകനെയും അശ്വതി ഒപ്പം കൂട്ടുകയായിരുന്നു. എംഡിഎംഎയുടെ ഉറവിടവും ഇടപാടിലെ മറ്റ് കണ്ണികളെയും കണ്ടെത്താന്‍ പ്രതികളെ വിശദമായ ചോദ്യം ചെയ്യല്‍ തുടരുകയാണ് അന്വേഷണസംഘം. സംഘം പതിവായി ലഹരി കൈമാറിയിരുന്നവരെക്കുറിച്ചുള്ള വിവരങ്ങള്‍ നാലുപേരുടെയും ഫോണില്‍ നിന്നും അന്വേഷണ സംഘം കണ്ടെത്തിയിട്ടുണ്ട്.
കാറില്‍ നിന്ന് ലഹരിമരുന്ന് ഉപയോഗിക്കുന്നതിനുള്ള സിറിഞ്ചിനും മയക്കുഗുളികക്കും പുറമെ തൂക്കിനല്‍കാനുള്ള ത്രാസ്, പ്ലാസ്‌റിക് കവറുകള്‍ എന്നിവ എക്‌സൈസ് കണ്ടെത്തിയിരുന്നു. കോഴിക്കോട് സ്വദേശിയായ മുഖ്യപ്രതി മൃദുലിന് സമാനമായ നിരവധി ലഹരിക്കേസുകളുണ്ടെന്നും അന്വേഷണ സംഘം പറഞ്ഞു. ബെംഗളൂരുവില്‍നിന്നുള്ള യാത്രയില്‍ ബെംഗളൂരുവിനും വാളയാറിനും ഇടയില്‍ നിരവധി തവണ ലഹരി ഉപയോഗിച്ചിട്ടുണ്ടെന്നും പിടിയിലായവര്‍ മൊഴി നല്‍കിയിട്ടുണ്ട്. പ്രതികള്‍ക്ക് ലഹരി ലഭിക്കുന്ന ഉറവിടവും ഇടപാടിലെ മറ്റ് കണ്ണികളെയുംകണ്ടെത്താല്‍ വിശദമായ ചോദ്യം ചെയ്യല്‍ തുടരുകയാണ് എക്‌സൈസ് സംഘം.
