പാലക്കാട് മുതലമടയിൽ വിദ്യാർത്ഥിനിയും യുവാവും തൂങ്ങി മരിച്ചു. പത്തി ചിറയില് അയ്യപ്പന്റെ മകള് അര്ച്ചനയെ (15) വീടിന്റെ ജനലില് തുങ്ങി മരിച്ച നിലയിലാണ് കണ്ടെത്തിയത്. മുതലമട സ്കൂളില് 10-ാം ക്ലാസ് വിദ്യാര്ഥിനിയാണ്. അര്ച്ചനയുടെ ബന്ധുവായ കൃഷ്ണന്റെ മകന് ഗിരീഷിനെ (22) പിന്നീട് ചുള്ളിയാര് ഡാം മിനുക്കം പാറയിൽ വീടിന് സമീപത്തെ മരത്തിൽ തൂങ്ങി മരിച്ച നിലയിൽ കണ്ടെത്തി.
ഇന്നലെ (വ്യാഴം)വൈകിട്ട് 6 മണിയോടെ ആയിരുന്നു സംഭവം. ഗിരീഷ് തന്നെ ശല്യം ചെയ്യുന്നതായി അര്ച്ചന രണ്ടു ദിവസം മുന്പ് കൊല്ലങ്കോട് പൊലീസില് പരാതി നല്കിയിരുന്നു. തുടര്ന്ന് പൊലീസ് ഗിരീഷിനേയും രക്ഷിതാക്കളേയും വിളിച്ചുവരുത്തി താക്കീത് നല്കി വിട്ടയച്ചു. ഇതിനുശേഷം വീണ്ടും ഒരു തവണ ഗിരീഷിനെ പെണ്കുട്ടിയുടെ വീട്ടു പരിസരത്തു കണ്ടിരുന്നതായി സമീപവാസികള് പറയുന്നു.
മാതാപിതാക്കള് ജോലിക്കായി പുറത്തു പോയിരുന്നു. ചിറ്റൂര് ഡിവൈ.എസ്.പി. കൃഷ്ണദാസ്, കൊല്ലങ്കോട് എസ്.എച്ച്.ഒ. സി.കെ. രാജേഷ് എന്നിവര് വിദ്യാര്ഥിനി മരിച്ച വീട്ടിലെത്തി അന്വേഷണം നടത്തി. വിരലടയാള വിദ്ധഗ്ദരും സംഭവ സ്ഥലത്തെത്തി തെളിവെടുപ്പ് നടത്തി. ഇന്ന് പോസ്റ്റ്മോര്ട്ടം നടപടികള് പൂര്ത്തിയായാലേ അര്ച്ചനയുടെ മരണകാരണം സ്ഥിരീകരിക്കാനാവൂ എന്ന് പൊലീസ് പറഞ്ഞു.
അജ്ഞലി,അനിത എന്നിവര് അര്ച്ചനയുടെ സഹോദരിമാണ്. പുഷ്പാവതിയാണ് ഗിരീഷിന്റെ അമ്മ.
