തിരുവനന്തപുരം: ആണ്സുഹൃത്തായിരുന്ന ഷാരോണ് രാജിനെ കളനാശിനി കലര്ത്തിയ കഷായം കുടിപ്പിച്ച് കൊലപ്പെടുത്തിയ കേസില് തമിഴ്നാട് ദേവിയോട് രാമവര്മന്ചിറ പൂമ്പള്ളിക്കോണം ശ്രീനിലയത്തില് ഗ്രീഷ്മയും അമ്മാവന് നിര്മലകുമാരന് നായരും കുറ്റക്കാരെന്ന് കോടതി. നെയ്യാറ്റിന്കര അഡീഷണല് സെഷന്സ് ജഡ്ജ് എ.എം. ബഷീറാണ് വിധി പ്രസ്താവിച്ചത്.
പ്രോസിക്യൂഷന്റേയും പ്രതിഭാഗത്തിന്റേയും മൂന്നുദിവസം നീണ്ട അന്തിമവാദങ്ങള് നേരത്തേ പൂര്ത്തിയായിരുന്നു. 2022 ഒക്ടോബറിലാണ് കേസിനാസ്പദമായ സംഭവം. ഒക്ടോബര് 14-ന് ഷാരോണ്രാജിനെ ഗ്രീഷ്മ വിഷം കലര്ത്തിയ കഷായം നല്കി കൊലപ്പെടുത്തിയെന്നാണ് കേസ്. ആശുപത്രിയില് ചികിത്സയിലിരിക്കെ ഒക്ടോബര് 25-നാണ് ഷാരോണ്രാജ് മരിച്ചത്.
