ജയ്പുര്‍: മകള്‍ പ്രണയവിവാഹം കഴിച്ചതിന്റെ പേരില്‍ പെണ്‍കുട്ടിയുടെ മാതാപിതാക്കള്‍ യുവാവിന്റെ മൂക്കറത്തു. രാജസ്ഥാനിലെ ജോധ്പൂര്‍ ജില്ലയില്‍ വ്യാഴാഴ്ച രാത്രിയാണ് സംഭവം. യുവാവിന്റെ സഹോദരന്റെ പരാതിയെ തുടര്‍ന്ന് വെള്ളിയാഴ്ച കേസ് രജിസ്റ്റര്‍ ചെയ്തതായി പൊലീസ് പറഞ്ഞു.
ഈ വര്‍ഷം മാര്‍ച്ചിലായിരുന്നു ചേലാറാം എന്ന യുവാവ് തന്റെ ഗ്രാമത്തിലെ പെണ്‍കുട്ടിയെ വിവാഹം കഴിച്ചത്. എന്നാല്‍, മാര്‍ച്ച് 30ന് പെണ്‍കുട്ടിയെ കാണാനില്ലെന്ന് ബന്ധുക്കള്‍ പരാതി നല്‍കി. ഇരുവരെയും പൊലീസ് അറസ്റ്റ് ചെയ്തപ്പോള്‍ കോടതിയില്‍ വച്ച് വിവാഹം കഴിച്ചതായി സമ്മതിച്ചു. ഇരുവരും പ്രായപൂര്‍ത്തിയായതിനാല്‍ പിന്നീട് അവരെ വിട്ടയച്ചു. പിന്നീട് ചേലാറാം പാലിയില്‍ ഭാര്യയോടൊപ്പം വാടകവീട്ടില്‍ താമസം തുടങ്ങി. സഹോദരന്‍ സുജാറാം സമീപത്തെ വീട്ടിലാണ് താമസിച്ചിരുന്നത്.
വ്യാഴാഴ്ച യുവതിയുടെ കുടുംബം ചേലാറാമിനെ കാണുകയും മകള്‍ക്കൊപ്പം വീട്ടിലേക്ക് വരാന്‍ ആവശ്യപ്പെടുകയും ചെയ്തു. പിന്നീട്, പാലി-ജോധ്പൂര്‍ ഹൈവേയില്‍ വെച്ച് യുവതിയുടെ മാതാപിതാക്കള്‍ ചേലാറാമിനെ ആക്രമിക്കുകയും ഝാന്‍വാറിലെത്തുന്നതുവരെ ആക്രമണം തുടരുകയും ചെയ്തു. കയ്യും കാലും തല്ലിയൊടിക്കുകയും മൂക്ക് മുറിക്കുകയും ചെയ്തു. സംഭവത്തില്‍ അന്വേഷണം പുരോഗമിക്കുകയാണെന്ന് പോലീസ് പറഞ്ഞു.
