കോഴിക്കോട്: സുപ്രഭാതം ദിനപത്രത്തില്‍ വീണ്ടും എല്‍.ഡി.എഫ് പരസ്യം. കഴിഞ്ഞ ദിവസം എല്‍.ഡി.എഫ് പരസ്യം വന്നത് സമസ്ത അണികള്‍ക്കിടയില്‍ വ്യാപക വിമര്‍ശത്തിനിടയായിരുന്നു.
മലപ്പുറത്ത് പത്രം കത്തിച്ചത് തര്‍ക്കം രൂക്ഷമാക്കി. ചില സമസ്ത നേതാക്കളുടെ എല്‍.ഡി.എഫ് അനുകൂല പ്രസ്താവന തള്ളി സമസ്ത നേതൃത്വം രംഗത്തെത്തിയിരുന്നു. ഇതിന് പിന്നാലെയാണ് ഇന്നത്തെ പത്രത്തിലും എല്‍.ഡി.എഫ് പരസ്യം വന്നത്. സമസ്ത പ്രവര്‍ത്തകരുടെ വാട്ട്‌സാപ്പ് ഗ്രൂപ്പുകളില്‍ ഇത് വീണ്ടും വലിയ ചര്‍ച്ചയായിട്ടുണ്ട്.
കഴിഞ്ഞ ദിവസവും എല്‍.ഡി.എഫിന് വോട്ട് അഭ്യര്‍ഥിച്ച് പരസ്യം നല്‍കിയിരുന്നു. സുപ്രഭാതം പത്രത്തിന്റെ ഒന്നാം പേജിലാണ് എല്‍.ഡി.എഫിന് വോട്ട് അഭ്യര്‍ഥിച്ച് പരസ്യം പ്രസിദ്ധീകരിച്ചത്.’ന്യൂനപക്ഷ വിഭാഗങ്ങള്‍ രണ്ടാംകിട പൗരന്‍മാരാകും…ഇടതില്ലെങ്കില്‍… ഇടതുണ്ടെങ്കിലേ നമ്മുടെ ഇന്ത്യയുള്ളൂ’ എന്നാണ് പരസ്യവാചകം. മുഖ്യമന്ത്രിയുടെ ഫോട്ടോ അടക്കമാണ് പരസ്യം പ്രസിദ്ധീകരിച്ചത്.
