പറവൂർ : നിയന്ത്രണം വിട്ട മൊബൈല്‍ പൈലിംഗ് ട്രക്ക് വ്യാപാര സമുച്ചയത്തിലേക്ക് ഇടിച്ചു കയറി ചേന്ദമംഗലം കവലയിലെ പഴയ കെട്ടിട സമുച്ചയം തകർന്നു.
സംഭവത്തിൽ സൈക്കിളില്‍ യാത്ര ചെയ്തിരുന്ന പത്ര വിതരണക്കാരൻ മരിച്ചു. മന്ദം നന്തികുളങ്ങര കുറുപ്പംതറ വീട്ടില്‍ വിജയൻ മകൻ സോമൻ (72) ആണ് മരിച്ചത്. വ്യാഴാഴ്ച പുലർച്ചെ മൂന്നരക്കാണ് അപകടം നടന്നത്. അപകടത്തില്‍ വ്യാപാര സമുച്ചയം പൂർണമായും തകർന്ന നിലയിലാണ്.
ഇവിടെ പ്രവർത്തിക്കുന്ന ഒരു ഹോട്ടല്‍, ഫാസ്റ്റ് ഫുഡ് സ്ഥാപനം, ചെരുപ്പ് കട, പലചരക്ക് കട, ഹെല്‍മറ്റ് ഷോപ്പ് എന്നിവ ഉള്‍പ്പടെ രണ്ട് നില കെട്ടിടമാണ് തകർന്നിട്ടുള്ളത്. പകല്‍ സമയത്ത് ആയിരുന്നു അപകടം നടന്നിരുന്നുവെങ്കില്‍ ദുരന്തത്തിന്റെ വ്യാപ്തി വലുതാകുമായിരുന്നുവെന്ന് പറയുന്നു. നഗരത്തിലെ ഏറെ തിരക്കുള്ള കവലയിലെ പ്രധാന കേന്ദ്രമാണ് ചേന്ദമംഗം കവല.
