ആരാണ് സ്വപ്‌നസുന്ദരിയുടെ കാമുകന്‍? കൈയില്‍ പൂക്കളും ചൊടിയില്‍ നാണവുമായി തൃഷ; പോസ്റ്റിന്റെ പൊരുള്‍ തേടി ആരാധകര്‍
ഇന്നലെ ലോകമെമ്പാടുമുള്ള കമിതാക്കള്‍ എല്ലാം പ്രണയം ആഘോഷിക്കുകയായിരുന്നു. അതിന്റെ അലയടി ഇങ്ങ് സോഷ്യല്‍ മീഡിയയിലും ശക്തമായി പ്രതിഫലിച്ചു. പ്രണയിക്കുന്നവരും പ്രണയം മനസ്സില്‍ സൂക്ഷിക്കുന്നവരും എല്ലാം അനുഭവങ്ങളും ആശംസകളും പങ്കുവച്ച് സോഷ്യല്‍ മീഡിയയില്‍ എത്തി. ചില സെലിബ്രിറ്റികള്‍ മറച്ചുവച്ച ചില പ്രണയങ്ങള്‍ ഇന്നലെ വെളിപ്പെടുത്തിയിരുന്നു. അതും ആരാധകര്‍ ഏറ്റെടുത്തു.
എന്നാല്‍ നടി തൃഷ കൃഷ്ണയുടെ പോസ്റ്റാണ് ആരാധകരെ മൊത്തതില്‍ കണ്‍ഫ്യൂഷനിലാക്കിയിരിക്കുന്നത്. പ്രണയത്തിലാണ് എന്ന സൂചന നല്‍കി തൃഷ കൃഷ്ണ പങ്കുവച്ച പോസ്റ്റ് ആരാധകര്‍ എറ്റെടുത്തിരിക്കുകയാണ്. കൈ നിറയെ റോസാപ്പൂക്കള്‍ കൊണ്ടുള്ള ബൊക്കയും, മുഖത്ത് ചെറിയൊരു നാണവുമൊക്കെയായിട്ടുള്ള ചിത്രങ്ങളാണ് തൃഷ തന്റെ ഇന്‍സ്റ്റഗ്രാമില്‍ പങ്കുവച്ചിരിയ്ക്കുന്നത്.
അത് കണ്ടതും, തൃഷയുടെ കാമുകനെ തിരക്കി ഇറങ്ങിയിരിക്കുകയാണ് സോഷ്യല്‍ മീഡിയ. ഇത്രയധികം പൂച്ചെണ്ടുകള്‍ തന്ന്, നിന്നെ ഇത്രയധികം ലജ്ജാവതിയാക്കിയത് ആരാണെന്ന് ചോദിച്ച് കമന്റുകള്‍ എത്തിയിട്ടുണ്ട്. ആരായിരുന്നാലും ഈ ബന്ധം വിവാഹം വരെ എത്തട്ടെ, തൃഷയ്ക്ക് നല്ലൊരു ജീവിതം ഉണ്ടാവട്ടെ എന്നൊക്കെയാണ് ആരാധകരുടെ ആശംസകളും പ്രശംസകളും എല്ലാം.
നാല്‍പത് വയസ്സായിട്ടും ഇന്നും അവിവാഹിതയായി തുടരുകയാണ് തൃഷ കൃഷ്ണ. പല പ്രണയ ഗോസിപ്പുകളും ഇന്റസ്ട്രിയില്‍ പരക്കെ പറഞ്ഞുകേട്ടുവെങ്കിലും ഒന്നിനോടും തൃഷ പ്രതികരിച്ചിരുന്നില്ല. അതിനിടയില്‍ ഒരു ബന്ധം വിവാഹം വരെ എത്തി മുടങ്ങിപ്പോയി.
വരുണ്‍ മണിയന്‍ എന്നയാളുമായി തൃഷയുടെ വിവാഹ നിശ്ചയം കഴിഞ്ഞിരുന്നു. എന്നാല്‍ പിന്നീട് പുറത്ത് വന്നത് ആ വിവാഹത്തില്‍ നിന്നും തൃഷ പിന്മാറിയെന്നാണ്. അതിന് ശേഷം വിവാഹമേ ഇനി വേണ്ട എന്ന രീതിയിലായിരുന്നു തൃഷയുടെ പ്രതികരണങ്ങള്‍. അപ്പോഴും ഗോസിപ്പുകള്‍ സജീവമായിരുന്നു. അതിനിടയിലാണ് ഇപ്പോള്‍ വാലന്റൈസ് ഡേയില്‍ തൃഷയുടെ ഈ പോസ്റ്റ്. ഇതോടെ നടനാണോ, ബിസിനസ്സ് മാനാണോ കാമുകന്‍ എന്നൊക്കെ ചോദിച്ച് ആരാധകര്‍ പരക്കം പായുന്നുണ്ട്.
