നിറവും ഉയരവുമില്ല, നടനാകാനുള്ള ഒരു യോഗ്യതയുമില്ലെന്ന് പറഞ്ഞ് അപമാനിച്ചു; വാശികൊണ്ട് തമിഴകത്തിന്റെ ക്യാപ്റ്റനായ വിജയകാന്ത്
സൂപ്പര്‍താരം വിജയകാന്തിന്റെ അന്ത്യത്തോടെ ക്യാപ്റ്റന്‍ യുഗം അവസാനിക്കുകയാണെന്ന് തമിഴ് മക്കള്‍ കണ്ണീരോടെ പറയുന്നു. സിനിമയില്‍ എന്നത് പോലെ രാഷ്ട്രീയത്തിലും സജീവമായിരുന്ന വിജയകാന്ത് ഒരുപാട് സാധാരണക്കാര്‍ക്ക് സഹായമായിരുന്നു. അവഗണിക്കപ്പെട്ട ഇടങ്ങളില്‍ നിന്ന് വാശികാരണം നേടിയെടുത്തതാണ് എല്ലാം. ജീവിതത്തോടുള്ള പോരാട്ടമായിരുന്നു ‘കറുപ്പ് എം.ജി.ആര്‍’ എന്നറിയപ്പെട്ടിരുന്ന നടന്റെ ജീവിതം.
പുരട്ചി തലൈവര്‍ എംജിആറിനെ മാതൃകയാക്കിയാണ് വിജയകാന്ത് സിനിമയെയും രാഷ്ട്രീയത്തെയും സ്വപ്നം കണ്ടത്. ജനങ്ങള്‍ക്ക് സേവനം ചെയ്യണമെങ്കില്‍ രാഷ്ട്രീയത്തിലേക്ക് ഇറങ്ങണം. അതിന് ആദ്യം സിനിമാ നടനാകണം എന്നതായിരുന്നു വിജയകാന്തിന്റെ പ്ലാന്‍. എങ്ങനെയായാലും ഞാന്‍ നടനാകാന്‍ പോകുകയാണ്, പിന്നെ എന്തിന് പഠിക്കണം എന്ന് ചിന്തിച്ച് പത്താം ക്ലാസില്‍ വച്ചു തന്നെ പഠനം നിര്‍ത്തി. സിനിമയിലേക്ക് പോകുകയാണ് എന്ന് പറഞ്ഞപ്പോള്‍ അച്ഛന്‍ ശക്തമായി എതിര്‍ക്കുകയും ചെയ്തു.
എന്നാല്‍ ചെറുപ്പം മുതലേ വാശിക്കാരനാണ് വിജയകാന്ത്. ആരെയും, ഒന്നിനെയും ഭയപ്പെടാറില്ല. തന്റെ നിലപാടുകളില്‍ ഉറച്ചു നില്‍ക്കും. അതുകൊണ്ട് അച്ഛന്റെ എതിര്‍പ്പുകളൊന്നും കാര്യമാക്കി എടുത്തതേയില്ല. സിനിമാ മോഹവുമായി മധുരൈയില്‍ നിന്ന് ചെന്നൈയിലേക്ക് എത്തി. എന്നാല്‍, സിനിമ എന്ന വലിയ ലോകത്തേക്ക് കടക്കുക എന്നത് അത്ര നിസ്സാരമായിരുന്നില്ല. നിറത്തിന്റെയും ഉയരത്തിന്റെയും പേരില്‍ ഒരുപാട് അവഗണനകള്‍ സഹിച്ചു. അവസാനം ഒരു സിനിമയില്‍ അവസരം കിട്ടി, അഭിനയിച്ചുകൊണ്ടിരിക്കുമ്പോള്‍ പുറത്താക്കി.
അതുകൊണ്ടൊന്നും തന്റെ ആഗ്രഹത്തില്‍ നിന്നും പിന്‍തിരിയാന്‍ വിജയകാന്ത് തയ്യാറായിരുന്നില്ല. 1979 ല്‍ പുറത്തിറങ്ങിയ ‘ഇനിയ്ക്കും ഇളമൈ’ എന്ന ചിത്രത്തിലൂടെ വിജയകാന്ത് സിനിമയില്‍ അരങ്ങേറ്റം കുറിച്ചു. ആദ്യ ചിത്രത്തിന് ശേഷം അദ്ദേഹം വിജയകാന്ത് എന്ന പേരിലേക്ക് മാറുകയും ചെയ്തു. തന്റെ പേരിലെ വിജയ- എന്നതും അന്ന് സൂപ്പര്‍സ്റ്റാര്‍ ആയി വളര്‍ന്നുകൊണ്ടിരിക്കുന്ന രജനികാന്തിന്റെ പേരിലെ കാന്ത്- എന്നതും ചേര്‍ത്താണ് വിജയകാന്ത് എന്ന പേര് വച്ചത്.
എന്നാല്‍, തുടക്കത്തില്‍ ചെയ്ത സിനിമകള്‍ എല്ലാം പരാജയമായിരുന്നു. ഒരു ബ്രേക്കിന് വേണ്ടി വര്‍ഷങ്ങള്‍ കാത്തിരിക്കേണ്ടി വന്നു. 1980 ല്‍ റിലീസായ ദൂരത്ത് ഇടിമുഴക്കം എന്ന സിനിമയിലൂടെയാണ് കരിയര്‍ ബ്രേക്ക് കിട്ടുന്നത്. അതിന് ശേഷം വിജയകാന്ത് എന്ന നടന് തിരിഞ്ഞു നോക്കേണ്ടി വന്നില്ല. അതിന് ശേഷം ആക്ഷന്‍ ഹീറോ പരിവേഷത്തിലേക്ക് മാറിയ വിജയകാന്തിന്റെ നൂറാമത്തെ സിനിമയായ ക്യാപ്റ്റന്‍ പ്രഭാകര്‍ ഇന്നും തമിഴ് ക്ലാസിക് ചിത്രങ്ങളില്‍ മുന്നിലാണ്.
നൂറ്റിയന്‍പതില്‍ അധികം സിനിമകളില്‍ അഭിനയിച്ച വിജയകാന്ത് 2010 ല്‍ വിരുദഗിരി എന്ന ചിത്രത്തിലൂടെ സംവിധായകനുമായി. ഏറ്റവും അവസാനം മുഖ്യവേഷത്തില്‍ എത്തിയ സിനിമയും ഇത് തന്നെയാണ്. 2015 ല്‍ മകന്‍ ഷണ്‍മുഖ പാണ്ഡിയന്‍ നായകനായി എത്തിയ സഗാപ്തം എന്ന ചിത്രത്തില്‍ അതിഥി വേഷം ചെയ്തുകൊണ്ട് അഭിനയ ജീവിതത്തിന് ഫുള്‍സ്റ്റോപ് ഇടുകയായിരുന്നു. കലൈമാമണി പുരസ്‌കാരം ഉള്‍പടെ നിരവധി അംഗീകാരങ്ങള്‍ വിജയകാന്തിനെ തേടിയെത്തിയിട്ടുണ്ട്.
