എറണാകുളം: പെരുമ്പാവൂരില്‍ പ്ലൈവുഡ് കമ്പനിയില്‍ വന്‍തീപിടിത്തം. ഇന്നു പുലര്‍ച്ചെ മൂന്ന് മണിയോടെയാണ് വായിക്കരയിലെ സ്ഥാപനത്തില്‍ തീപിടിത്തമുണ്ടായത്. തീ നിയന്ത്രണവിധേയമാക്കിയിട്ടുണ്ട്.
പെരുമ്പാവൂര്‍ സ്വദേശി ഹാഫിസിന്റെ ഉടമസ്ഥതയിലുള്ള കമ്പനിയിലാണ് തീപ്പിടുത്തമുണ്ടായത്. കമ്പനിയിലെ ജീവനക്കാരാണു തീപ്പടരുന്നതു കണ്ടത്. തുടര്‍ന്ന് ഫയര്‍ഫോഴ്സിനെ വിവരം അറിയിക്കുകയായിരുന്നു. ആറ് ഫയര്‍ഫോഴ്സ് യൂനിറ്റ് എത്തിയാണ് തീയണച്ചത്.
പ്ലൈവുഡ് നിര്‍മാണത്തിന് ഉപയോഗിക്കുന്ന വസ്തുക്കള്‍ സൂക്ഷിച്ചിരുന്ന സ്ഥലത്താണു തീപിടിത്തമുണ്ടായത്. പിന്നീട് തീ മറ്റു ഭാഗങ്ങളിലേക്കും പടരുകയായിരുന്നു. അപകടത്തില്‍ വന്‍ നാശനഷ്ടമാണ് റിപ്പോര്‍ട്ട് ചെയ്യുന്നത്. കമ്പനിയുടെ ഒരു ഭാഗം പൂര്‍ണമായി കത്തിനശിച്ചു.
