കൊല്ലം: ചാത്തന്നൂരിൽ കെ എസ് ആർ ടി സി ബസും ടൂറിസ്റ്റ് ബസും മത്സരിച്ച് ഓടിയതിൽ മോട്ടോർ വാഹന വകുപ്പ് കേസെടുത്തു. കൊല്ലം ജില്ലയിലെ കൊട്ടിയം മുതൽ ചാത്തന്നൂർ വരെയാണ് രണ്ട് ബസുകളും മത്സരിച്ച് പാ‌ഞ്ഞത്. എന്നാൽ മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗം ബസുകളെ പിന്തുടർന്ന് പിടികൂടി. പിന്നാലെ രണ്ട് ഡ്രൈവർമാർക്കുമെതിരെ കേസെടുക്കുകയായിരുന്നു.
കോട്ടയം വൈക്കത്ത് നിന്ന് ശിവഗിരിയിലേക്ക് തീർത്ഥാടകരുമായി വന്നതാണ് ടൂറിസ്റ്റ് ബസ്. എറണാകുളത്ത് നിന്ന് തിരുവനന്തപുരത്തേക്ക് സർവീസ് നടത്തുകയായിരുന്നു കെഎസ്ആർടിസി ബസ്. അപകടകരമായ നിലയിലാണ് രണ്ട് ബസുകളും ഓടിയതെന്ന് മോട്ടോർ വാഹന വകുപ്പ് അധികൃതർ വ്യക്തമാക്കി.
