തിരുവനന്തപുരം: പൂജപ്പുരയ്ക്ക് അടുത്ത് തമലത്ത് പടക്ക കടയ്ക് തീപിടിച്ചു. കട പൂര്‍ണമായി കത്തി നശിച്ചു. ചെങ്കല്‍ചൂളയില്‍ നിന്നും മൂന്ന് യൂണിറ്റ് ഫയര്ഫോഴ്സ് എത്തിയാണ് തീ അണച്ചത്. തീപൊള്ളലേറ്റ മൂന്ന് പേരെ ആശുപത്രിയിലേക്ക് മാറ്റി. കടയിലെ രണ്ട് ജീവനക്കാര്‍ക്കാണ് പരിക്കേറ്റത്. കടയില്‍ പടക്കം വാങ്ങാന്‍ എത്തിയ ഒരാള്‍ക്കും പൊള്ളലേറ്റു. പരിക്ക് സാരമുള്ളതല്ല.
പുറത്ത് നിന്ന് കടയിലേക്ക് തീപ്പൊരി വീണതാണ് തീപിടുത്തത്തിന് കാരണമായതെന്നാണ് പ്രാഥമിക വിവരം. കടയ്ക്ക് സമീപം നിര്‍ത്തിയിട്ടിരുന്ന രണ്ട് ബൈക്കുകള്‍ അപകടത്തില്‍ കത്തി നശിച്ചു. കൂടുതല്‍ നാശനഷ്ടങ്ങള്‍ ഉണ്ടായിട്ടില്ല. തീപടര്‍ന്നതോടെ കടയിലുണ്ടായിരുന്ന പടക്കങ്ങളെല്ലാം ഒന്നാകെ പൊട്ടിത്തെറിച്ചെങ്കിലും സംഭവം നടന്നയുടനെ സ്ഥലത്തുനിന്ന് ആളുകള്‍ മാറിയതിനാല്‍ വലിയ ദുരന്തമാണ് ഒഴിവായത് എന്ന് ദൃസാക്ഷികള്‍ പറഞ്ഞു.
കുറെയെറെ പടക്കങ്ങള്‍ ഒന്നിച്ച് പൊട്ടിത്തെറിച്ചതോടെ സ്ഥലത്ത് ചെറിയ സ്‌ഫോടനമുണ്ടായ പ്രതീതിയായിരുന്നു. പടക്കങ്ങള്‍ കൂട്ടാമായി പൊട്ടിതെറിച്ച പ്രദേശത്ത് വലിയരീതിയിലുള്ള തീഗോളം തന്നെയുണ്ടാകുകയായിരുന്നുവെന്നും നാട്ടുകാര്‍ പറഞ്ഞു.
തീപടരാനുണ്ടായ കാരണം വ്യക്തമല്ലെന്നും കൂടുതല്‍ പരിശോധനക്കുശേഷമെ ഇക്കാര്യം വ്യക്തമാകുകയുള്ളുവെന്നും ഫയര്ഫോഴ്സ് അറിയിച്ചു. തീപിടിത്തത്തില്‍ കടയ്ക്കു മുന്നില്‍ നിര്‍ത്തിയിട്ട രണ്ട് ബൈക്കുകളാണ് കത്തിനശിച്ചത് എന്നും ഉദ്യോഗസ്ഥര്‍ അറിയിച്ചു. തമലം സ്വദേശി രാധാകൃഷ്ണന്‍ നായരുടെ ഉടമസ്ഥതയിലുള്ള ദീപാവലി ആഘോഷങ്ങള്‍ക്കായി സൂക്ഷിച്ച പടക്ക കടയിലാണ് തീപിടിത്തം ഉണ്ടായത്.
