ദില്ലി: പ്രതിപക്ഷ ഐക്യമായ ഇന്ത്യ സഖ്യത്തിന് വിജയിക്കാൻ തന്ത്രം പറഞ്ഞുകൊടുത്ത് അഖിലേന്ത്യ ഹിന്ദു മഹാസഭ അധ്യക്ഷൻ സ്വാമി ചക്രപാണി മഹാരാജ്. ഹിന്ദുക്കളുടെ വിജയിക്കണമെങ്കിൽ ഗോമൂത്ര പാർട്ടികൾ സംഘടിപ്പിക്കണമെന്നും നേതാക്കൾ ഗോമൂത്രം കുടിക്കണമെന്നും അഖിലേന്ത്യ ഹിന്ദു മഹാസഭ അധ്യക്ഷൻ സ്വാമി ചക്രപാണി മഹാരാജ് പറഞ്ഞു. സഖ്യമുണ്ടാക്കാൻ ഒന്നിച്ച പാർട്ടികളെല്ലാം ഹിന്ദു വിരുദ്ധരാണെന്നും ചക്രപാണി പറഞ്ഞു.
ഹിന്ദു ആഘോഷങ്ങൾക്ക് ബിഹാർ സർക്കാർ അവധി നൽകുന്നത് നിർത്തിവെച്ചു. പശ്ചിമ ബംഗാളിൽ ഹിന്ദുക്കൾ കൊല്ലപ്പെടുകയാണ്. എസ് പി നേതാവ് പ്രസാദ് മൗര്യ ഹിന്ദുമതത്തിനെതിരെ സംസാരിക്കുന്നു. രാഹുൽ ഗാന്ധി നിരന്തരം സനാതന ധർമത്തിനെതിരെ സംസാരിക്കുന്നു. ദില്ലിയിൽ മൗലവിമാർക്ക് ശമ്പളം നൽകുമ്പോൾ പൂജാരിമാരെ തഴയുകയാണ്. ഇക്കാരണങ്ങൾ കൊണ്ട് ഹിന്ദുക്കൾക്ക് സഖ്യത്തെ വിശ്വസിക്കാൻ കഴിയില്ല. അതുകൊണ്ടുതന്നെ വിശ്വാസം ആർജിക്കാൻ ഇന്ത്യ സഖ്യത്തിലെ നേതാക്കൾ ഗോമൂത്രം കുടിക്കുന്ന പാർട്ടികൾ നടത്തണമെന്നും ചക്രപാണി മഹാരാജ് പറഞ്ഞു. നിങ്ങൾ നിരവധി ഇഫ്താർ പാർട്ടികൾ നടത്തുകയും പങ്കെടുക്കുകയും ചെയ്യുന്നു. പിന്നെ, എന്തുകൊണ്ട് ഒരു ഗോമൂത്ര പാർട്ടി നടത്തിക്കൂടായെന്നും അദ്ദേഹം ചോദിച്ചു. കൊവിഡ് കാലത്ത് ചക്രപാണി മഹാരാജ് ഗോമൂത്ര പാർട്ടികൾ സംഘടിപ്പിച്ചിരുന്നു. ഏത് രോഗത്തിൽ നിന്നും സംരക്ഷിക്കാൻ ഗോമൂത്രത്തിന് ശക്തിയുണ്ടെന്നായിരുന്നു അദ്ദേഹത്തിന്റെ വാദം.
പശു നമ്മുടെ അമ്മയും ലോകത്തിന്റെ മുഴുവൻ അമ്മയുമാണ്. പശുവിൽ നമ്മുടെ എല്ലാ ദേവന്മാരും ദേവന്മാരും വസിക്കുന്നു. ലോകം കൊവിഡിൽ നിന്ന് മുക്തി നേടിയത് പശുവിന്റെ അനുഗ്രഹങ്ങൾ കൊണ്ടാണെന്നും ചക്രപാണി പറഞ്ഞു. രാമക്ഷേത്രത്തിനായി നിങ്ങൾ എന്താണ് ചെയ്തത്. ഞങ്ങൾ ലക്ഷ്യത്തിനായി പോരാടി. നിങ്ങൾ അധികാരത്തിൽ വന്നാൽ മുസ്ലീങ്ങളെ പ്രീണിപ്പിക്കില്ലെന്ന് ഹിന്ദുക്കൾ എങ്ങനെ വിശ്വസിക്കും. അഥവാ ഇന്ത്യാ സഖ്യം അധികാരത്തിലെത്തിയാൽ ഉടൻ പശു സംരക്ഷണ നിയമം രൂപീകരിക്കുമെന്ന് പ്രതിജ്ഞയെടുക്കണമെന്നും ചക്രപാണി ആവശ്യപ്പെട്ടു.
