”ജീവിതത്തില്‍ മറ്റൊരു ഭാഗ്യം കൂടി; ഞാനൊരു അമ്മയായി; എല്ലാവരുടെയും പ്രാര്‍ത്ഥനകള്‍ക്ക് നന്ദി”
പൊക്കക്കുറവ് ജീവിതത്തില്‍ അത്ര വലിയ പ്രശ്‌നം അല്ലെന്നു തെളിയിച്ച താരമാണ് മഞ്ജു രാഘവ്. സിനിമ, മോഡലിംഗ്, സ്‌പോര്‍ട്‌സ്, നൃത്തം.. തുടങ്ങി മഞ്ജു കൈവയ്ക്കാത്ത മേഖലകളില്ല. മലയാളസിനിമയിലെ ആദ്യത്തെ ഏറ്റവും പൊക്കം കുറഞ്ഞ നായിക എന്ന നിലയിലും മഞ്ജു പ്രേക്ഷകരുടെ പ്രിയങ്കരിയാണ്. ആത്മവിശ്വാസം കൊണ്ടാണ് പാലക്കാടുകാരിയായ മഞ്ജു ജീവിതം കെട്ടിപ്പടുത്തിയത്. ഇപ്പോഴിതാ മഞ്ജുവിന്റെ ജീവിതത്തിലെ പുത്തന്‍ സന്തോഷമാണ് ആരാധകര്‍ ഏറ്റെടുത്തിരിക്കുന്നത്.
താന്‍ ഒരു അമ്മയായി എന്ന് മഞ്ജു തന്നെയാണ് സോഷ്യല്‍ മീഡിയ വഴി അറിയിച്ചത്. ‘അങ്ങനെ എന്റെ ജീവിതത്തില്‍ ഏറ്റവും വലിയ ഒരു ഭാഗ്യവും ദൈവം എനിക്ക് തന്നിരിക്കുന്നു.ഒരു അമ്മയായി ഒരു പെണ്‍കുഞ്ഞിന് ജന്മം നല്‍കാന്‍ കഴിഞ്ഞു. ഒത്തിരി സന്തോഷവും ദൈവത്തോട് ഒത്തിരി നന്ദിയും പറയുന്നു. അതോടൊപ്പം എനിക്ക് വേണ്ടി പ്രാര്‍ത്ഥിച്ച എല്ലാവരോടും ഒത്തിരി നന്ദി പറയുന്നു’, മഞ്ജു കുറിച്ചു.
രണ്ടുവര്‍ഷം മുന്‍പാണ് കൊടുന്തിരപ്പുള്ളി അത്താലൂര്‍ സ്വദേശി വിനുരാജുമായി മഞ്ജുവിന്റെ വിവാഹം നടക്കുന്നത്. അഞ്ചു വര്‍ഷം നീണ്ട പ്രണയത്തിനും എതിര്‍പ്പുകള്‍ക്കും ശേഷമാണ് ഇരുവരും വിവാഹിതരായത്. പാലക്കാട് യാക്കര വിശ്വേശ്വര ക്ഷേത്രത്തില്‍വച്ചായിരുന്നു ഇരുവരുടെയും വിവാഹം.
2018ല്‍ റിലീസ് ചെയ്ത മൂന്നര എന്ന ചിത്രത്തിലൂടെയാണ് മഞ്ജു സിനിമയിലെത്തിയത്. മഞ്ജുവിനെപ്പോലെ തന്നെ ഉയരം കുറഞ്ഞ അറുമുഖന്‍ ആലപ്പുഴയായിരുന്നു ചിത്രത്തിലെ നായകന്‍. സൂരജ് എസ്.കുറുപ്പ് സംവിധാനം ചെയ്ത ചിത്രത്തില്‍ പി.ബാലചന്ദ്രന്‍, കൃഷ്ണ കുമാര്‍, ഹരീഷ് പേരടി, അംബിക മോഹന്‍ എന്നിവരായിരുന്നു ചിത്രത്തിലെ മറ്റ് താരങ്ങള്‍. ഒരു കൊലപാതകവുമായി ബന്ധപ്പെട്ട കഥയാണ് മൂന്നര പറഞ്ഞത്.
