ജിദ്ദ: ഹജ്ജ് നിര്‍വഹിക്കാനായി സൗദിയിലെത്തി വിരലടയാളം പതിച്ചപ്പോള്‍ വാറന്റായ കേസിലെ പ്രതിയുമായി സാമ്യംതോന്നിയതിനെ തുടര്‍ന്ന് കുരുക്കിലായ ഇന്ത്യന്‍ തീര്‍ത്ഥാടകന്‍ ആസിഫ് ഖാന് (61) നാട്ടിലേക്ക് മടങ്ങി. പ്രത്യേക അനുമതി ലഭിച്ചതിനെ തുടര്‍ന്ന് ജിദ്ദയില്‍ നിന്ന് നാട്ടിലേക്ക് വിമാനം കയറുകയായിരുന്നു. കൂടെയുള്ള ഹാജിമാരെല്ലാം നേരത്തേ മടങ്ങിയിരുന്നു.
ഇന്ത്യന്‍ എംബസിയുടെയും സാമൂഹിക പ്രവര്‍ത്തകരുടെയും ഇടപെടലിനെ തുടര്‍ന്ന് പ്രവാസി മലയാളിയുടെ ജാമ്യത്തില്‍ ആസിഫ് ഖാനെ ഹജ്ജ് ചെയ്യാന്‍ സൗദി അധികൃതര്‍ അനുവദിച്ചിരുന്നു. ഇന്ത്യന്‍ എംബസിയുടെ അന്വേഷണ റിപ്പോര്‍ട്ട് പോലീസ് സ്റ്റേഷനില്‍ ഹാജരാക്കുകയും സൗദി അധികാരികള്‍ വിശദമായ അന്വേഷണം പൂര്‍ത്തിയാക്കുകയും ചെയ്ത ശേഷമാണ് തിരിച്ചുപോകാന്‍ അനുമതി ലഭിച്ചത്.
മധ്യപ്രദേശ് സ്വദേശിയായ ആസിഫ് ഖാന് ഇന്ത്യന്‍ ഹജ്ജ് സംഘത്തോടൊപ്പം ജിദ്ദയിലെത്തിയപ്പോള്‍ തടഞ്ഞുവയ്ക്കപ്പെടുകയായിരുന്നു. സൗദിയിലെ അല്‍ അഹ്സയിലെ പോലീസ് സ്റ്റേഷനില്‍ രജിസ്റ്റര്‍ ചെയ്യപ്പെട്ട കേസിലെ പ്രതിയായ ഷക്കീല്‍ ഖാന് എന്നയാളുമായുള്ള സാമ്യത്തെത്തുടര്‍ന്നായിരുന്നു നടപടി. ഷക്കീല്‍ ഖാന് പുതിയ പാസ്പോര്‍ട്ടില്‍ സൗദിയിലെത്തിയെന്നായിരുന്നു സംശയം. രണ്ടു പേരുടെയും ജനനത്തീയതി ഒരേ ദിവസമായിരുന്നു. ഇരുവരുടെയും പേരിലെ ഖാനും സംശയം വര്‍ധിപ്പിച്ചു. ആഭ്യന്തര മന്ത്രാലയത്തിലെ വെബ്സൈറ്റിലെ രേഖകള്‍ പ്രകാരം മത്ലൂബ് അഥവാ പിടികിട്ടാപ്പുള്ളിയായി തീര്‍ത്ഥാടകന്‍ മാറുകയായിരുന്നു.
ആദ്യമായാണ് സൗദിയിലെത്തുന്നതെന്ന് എംബസി അധികൃതര്‍ ഉള്‍പ്പെടെ അറിയിച്ചെങ്കിലും കുറ്റവിമുക്തനാക്കാന്‍ അത് പര്യാപ്തമായിരുന്നില്ല. അല്‍ അഹ്സയിലെ പോലീസ് സ്റ്റേഷനില്‍ ആസിഫ് ഖാനെ എത്തിച്ച് രേഖകള്‍ പരിശോധിച്ചു. ഇന്ത്യന്‍ എംബസിയുടെ നിര്‍ദേശപ്രകാരം ഇവിടെയുള്ള ജീവകാരുണ്യ പ്രവര്‍ത്തകന്‍ ഹനീഫ മൂവാറ്റുപുഴ സ്വന്തം ജാമ്യത്തില്‍ ഇദ്ദേഹത്തെ പുറത്തിറക്കി. ഹജ്ജിന് ശേഷം തിരികെ എത്തിക്കണമെന്നായിരുന്നു ജാമ്യവ്യവസ്ഥ.
ഈ സമയത്ത് തുടരന്വേഷണം എംബസിയും സൗദി അധികൃതരും പൂര്‍ത്തിയാക്കി. മധ്യപ്രദേശിലെ സര്‍ക്കാര്‍ കോളജില്‍ സീനിയര്‍ ക്ലാര്‍ക്കായിരുന്നു ആസിഫ് ഖാന്. ഇന്ത്യന്‍ എംബസി സെക്കന്‍ഡ് സെക്രട്ടറി മോയിന്‍ അക്തര്‍ ഉള്‍പ്പെടെയുള്ള ഉദ്യോഗസ്ഥര്‍ പിന്തുണയുമായി കൂടെ നിന്നതോടെയാണ് ഹജ്ജിന് ശേഷം മടങ്ങാനായത്. ആദ്യമായി സൗദിയിലെത്തി ചെയ്യാത്ത കുറ്റത്തിന്റെ പേരില്‍ പോലീസ് സ്റ്റേഷന്‍ കയറേണ്ടിവന്നത് ആസിഫ് ഖാന് ഹജ്ജിനൊപ്പം മറക്കാനാവാത്ത അനുഭവമായി. ആസിഫ് ഖാന് വിമാനത്തില്‍ കയറുന്നതു വരെ ആശങ്ക ബാങ്കിയായിരുന്നുവെന്ന് ഹനീഫ മൂവാറ്റുപുഴയും പ്രതികരിച്ചു.
