ഏറെക്കാലമായി തമിഴ് സിനിമാസ്വാദകർ ഒന്നടങ്കം കാത്തിരിക്കുന്ന സിനിമയാണ് ‘ലിയോ’. ദളപതി വിജയ് നായകനായി എത്തുന്ന ചിത്രം എന്നത് തന്നെയാണ് അതിന് കാരണം. ലോകേഷ് കനകരാജ് സംവിധാനം ചെയ്യുന്ന ചിത്രവുമായി ബന്ധപ്പെട്ട് വരുന്ന അപ്ഡേറ്റുകൾ എല്ലാം തന്നെ പ്രേക്ഷകർ ഒന്നടങ്കം ഏറ്റെടുക്കാറുണ്ട്. ഇപ്പോഴിതാ ചിത്രത്തിൽ പ്രതിനായക വേഷത്തിൽ എത്തുന്ന സഞ്ജയ് ദത്തിന്റെ ഗ്ലിംപ്‍സ് വീഡിയോ പുറത്തുവിട്ടിരിക്കുകയാണ് അണിയറ പ്രവർത്തകർ.
സഞ്ജയ് ദത്തിന്റെ പിറന്നാൾ ആണിന്ന്. ഇതുമായി ബന്ധപ്പെട്ടാണ് സ്പെഷ്യൽ ഗ്ലിംപ്‍സ് വീഡിയോ പുറത്തു വന്നിരിക്കുന്നത്. ആന്റണി ദാസ് എന്നാണ് സഞ്ജയ് ദത്ത് അവതരിപ്പിക്കുന്ന കഥാപാത്രത്തിന്റെ പേര്. മാസ് ലുക്കിലാണ് വീഡിയോയിൽ സഞ്ജയ് പ്രത്യക്ഷപ്പെടുന്നത്. അതേസമയം, വീഡിയിൽ ബാബു ആന്റണിയെ ആരാധകർ കണ്ടെത്തിയിട്ടുണ്ട്. സഞ്ജയ് ദത്തിന്റെ ഗ്യാങ്ങിലെ ഒരാളാണ് ബാബു ആന്റണി എന്നാണ് സോഷ്യൽ മീഡിയ പറയുന്നത്.
വിജയുടെ പാൻ ഇന്ത്യൻ ചിത്രം കൂടിയാണ് ലിയോ. എല്ലാ ഭാഷകളിൽ നിന്നുള്ള നടി നടന്മാർ ചിത്രത്തിൽ പ്രവർത്തിക്കുന്നുണ്ട്. മലയാളത്തിൽ നിന്ന് മാത്യു, ബാബു ആന്റണി എന്നിർ അഭിനയിക്കുന്നു. ചിത്രത്തിൽ പ്രധാന വേഷത്തിൽ സഞ്ജയ് ദത്ത് എത്തുന്നുണ്ട്. ആക്ഷൻ കിംഗ് അർജുനും ചിത്രത്തിൽ അഭിനയിക്കുന്നു. തൃഷയാണ് നായിക. ഒരിടവേളയ്ക്ക് ശേഷം തൃഷയും വിജയിയും ഒന്നിക്കുന്നു എന്ന പ്രത്യേകതയും ലിയോയ്ക്ക് ഉണ്ട്.
സെവൻ സ്‌ക്രീൻ സ്റ്റുഡിയോസിന്റെ ബാനറിൽ എസ്. ലളിത് കുമാർ ആണ് ചിത്രം നിർമ്മിക്കുന്നത്. കമൽ ഹാസന്റെ “വിക്രമി” ന് ശേഷം ലോകേഷ് ഒരുക്കുന്ന ചിത്രമെന്ന പ്രത്യേകത കൂടി ലിയോയ്ക്ക് ഉണ്ട്. അനിരുദ്ധാണ് ചിത്രത്തിന് സംഗീതം ഒരുക്കുന്നത്. തുടക്കം മുതൽ തന്നെ കേരളത്തിലെ വിതരണാവകാശത്തിന് വൻ ഡിമാൻറ് ഉണ്ടായിരുന്ന ചിത്രമാണ് ലിയോ. 5 പ്രധാന വിതരണക്കാരാണ് കേരളത്തിലെ വിതരണാവകാശത്തിനായി മത്സരിച്ചിരുന്നത്. ഏറ്റവും ഒടുവിൽ ഗോകുലം ഗോപാലൻ കേരളത്തിലെ വിതരണാവകാശം സ്വന്തമാക്കുക ആയിരുന്നു.
