തെൻമല: കൊല്ലം – ചെങ്കോട്ട പാതയില്‍ പാറവീണ് റയിൽവെ ട്രാക്ക് തകര്‍ന്നു. ട്രെയിൻ കടന്നുപോയി സെക്കൻഡുകള്‍ക്കുള്ളിലാണ് ഉയരത്തില്‍നിന്ന് പാറ ഉരുണ്ട് ട്രാക്കിലേക്ക് വീണത്.
കഴുതുരുട്ടിക്കും തെന്മലയ്ക്കും ഇടയില്‍ വെള്ളി പുലര്‍ച്ചെ അഞ്ചിന് ചെന്നൈ എഗ്മോര്‍– -കൊല്ലം എക്സ്പ്രസ് കടന്നുപോയ ഉടനെയാണ് സംഭവം.സെക്കന്റുകളുടെ വിത്യാസത്തിലാണ് വൻ അപകടം ഒഴിവായത്.പാറവീണ് ട്രാക്ക് വളഞ്ഞിട്ടുണ്ട്.
തെന്മല റെയില്‍വേ സ്റ്റേഷനില്‍നിന്ന് ട്രാക്ക് പരിശോധനയ്ക്കു പോയ കീമാൻ ആണ് സംഭവം കാണുന്നത്. ഉടനെ വിവരം അറിയിച്ചതിനെ തുടര്‍ന്ന് ചെങ്കോട്ട, തെന്മല സ്റ്റേഷനുകളില്‍നിന്ന് എൻജിനിയര്‍മാര്‍ എത്തി പാളം മാറ്റി പുതിയത് സ്ഥാപിച്ചു.
