മഴക്കുറവിലും ചീയപ്പാറ വെള്ളച്ചാട്ടം ഒരുക്കുന്നത് മനോഹര കാഴ്ച തന്നെ

ഇടുക്കിയുടെ പ്രവേശന കവാടമായ നേര്യമംഗലത്ത് നിന്നും അടിമാലിയിലേക്കുള്ള യാത്രമധ്യേയാണ് ചീയപ്പാറ വെള്ളച്ചാട്ടം സ്ഥിതി ചെയ്യുന്നത്. വനമേഖലയിലൂടെ ഹൈറേഞ്ചിലേക്കുള്ള യാത്രകളില്‍ പലരും ചീയപ്പാറയെ വിശ്രമകേന്ദ്രമെന്ന നിലയിലാണ് കണക്കാക്കുന്നത്. മലമുകളില്‍ നിന്ന് ഒഴുകിയെത്തുന്ന കുത്തനെയുള്ള വെള്ളച്ചാട്ടവും കാടിന്റെ വശ്യതും വാനരക്കൂട്ടങ്ങളുമെല്ലാം ചീയപ്പാറയിലെ പതിവ് കാഴ്ചകളാണ്.

മൂന്നാറിലേക്കുള്ള വിനോദ സഞ്ചാരികളിലേറെപേരും ഇവിടെ എത്തിയാണ് മടങ്ങാറ്.അടിമാലി ഗ്രാമപഞ്ചായത്തിലെ കമ്പിലൈന്‍ എന്ന ചെറു ഗ്രാമത്തില്‍ നിന്നും ഒഴുകിയെത്തുന്ന വെള്ളമാണ് ഇവിടെ സഞ്ചാരികളെ ആകര്‍ഷിപ്പിക്കുന്നത്.കാട്ടുച്ചോലകള്‍ താണ്ടിയെത്തുന്ന വെള്ളം പാറക്കെട്ടുകളെ തലോടി താഴെക്കൊഴുകി ദേവിയാര്‍ പുഴയോട് ചേരുന്നു. തുടര്‍ന്ന് നേര്യമംഗലത്തുവെച്ച് പെരിയാറിനോടും ചേരുന്നു.