സൽമാൻ ഖാൻ നായകനായ ഏറ്റവും പുതിയ ചിത്രം കിസീ കാ ഭായ് കിസീ കി ജാനിൻറെ ഒടിടി റിലീസ് തീയതി പ്രഖ്യാപിച്ചു. ഏപ്രിൽ 21 ന് തിയറ്ററുകളിലെത്തിയ ചിത്രം രണ്ട് മാസത്തിനിപ്പുറമാണ് ഒടിടിയിൽ എത്തുന്നത്. പ്രമുഖ പ്ലാറ്റ്ഫോം ആയ സീ 5 ലൂടെ ജൂൺ 23 നാണ് ചിത്രം എത്തുക. ആക്ഷൻ കോമഡി വിഭാഗത്തിൽ പെടുന്ന ചിത്രം സംവിധാനം ചെയ്തിരിക്കുന്നത് ഫർഹാദ് സാംജിയാണ്. പൂജ ഹെഗ്ഡെയാണ് നായിക.
സൽമാൻ ഖാൻറെ മുൻകാല വിജയങ്ങളുടെ പ്രതാപം ഇല്ലെങ്കിലും ചിത്രം ഭേദപ്പെട്ട ബോക്സ് ഓഫീസ് കളക്ഷൻ നേടി. ആഗോള ബോക്സ് ഓഫീസിൽ നിന്ന് 160 കോടിയോളമാണ് ചിത്രം നേടിയ ഗ്രോസ്. 125 കോടി ബജറ്റിൽ എത്തിയ ചിത്രമാണിത്. അജിത്ത് കുമാറിനെ നായകനാക്കി ശിവ ഒരുക്കി, 2014 ൽ പുറത്തെത്തിയ വീരത്തെ ആസ്പദമാക്കിയുള്ള ചിത്രമാണിത്. ഫർഹാദ് സാംജി, സ്പർശ് ഖേതർപാൽ, തഷ ഭംബ്ര എന്നിവർ ചേർന്നാണ് തിരക്കഥ ഒരുക്കിയിരിക്കുന്നത്.
Sab ki aan, sab ki shaan, sab ka ek Bhaijaan! 😎
Prepare to witness the biggest blockbuster of the year!
Catch the World Digital Premiere of #KisiKaBhaiKisiKiJaan on 23rd June only on #ZEE5#BhaijaanOnZEE5 pic.twitter.com/BrZ7rB3v6N— ZEE5 (@ZEE5India) June 16, 2023
ലോകമെമ്പാടുമായി 5700 ൽ അധികം സ്ക്രീനുകളിലാണ് ചിത്രം ഏപ്രിൽ 21 ന് റിലീസ് ചെയ്യപ്പെട്ടത്. സൽമാൻ ഖാൻ ഫിലിംസിൻറെ ബാനറിൽ സൽമാൻ ഖാൻ തന്നെ നിർമ്മിച്ചിരിക്കുന്ന ചിത്രത്തിൻറെ ഛായാഗ്രാഹകൻ വി മണികണ്ഠൻ ആണ്. അസോസിയേറ്റ് പ്രൊഡ്യൂസർ ഷമിറാ നമ്പ്യാർ, സംഗീതം ഹിമേഷ് രഷമിയ, രവി ബസ്‍രൂർ, സുഖ്‍ബീർ സിംഗ്, ദേവി ശ്രീ പ്രസാദ്, സാജിദ് ഖാൻ, പായൽ ദേവ്, അമാൽ മാലിക് എന്നിവരാണ്. വെങ്കടേഷ്, ഭൂമിക ചൗള, ജഗപതി ബാബു, രാഘവ് ജുയൽ, ജാസി ഗിൽ, സിദ്ധാർഥ് നിഗം, ഷെഹ്നാസ് ഗിൽ, പാലക് തിവാരി തുടങ്ങിയവരും അഭിനയിച്ചിരിക്കുന്നു.
