ഉജ്ജയിനില്‍ മഹാകല്‍ ലോക് പദ്ധതിയുടെ ഭാഗമായി മഹാകലാശ്വേര്‍ ക്ഷേത്ര വളപ്പില്‍ സ്ഥാപിച്ച കൂറ്റൻ പ്രതിമകള്‍ ഏഴു മാസത്തിനകം തകര്‍ന്നുവീണിരുന്നു. 850 കോടിയില്‍പ്പരം രൂപ ചെലവിട്ട പദ്ധതിയുടെ ഭാഗമായി സ്ഥാപിച്ച സപ്‌തര്‍ഷികളുടെ പ്രതിമകളില്‍ ആറെണ്ണമാണ്‌ മെയ് 28ന് ഉണ്ടായ കാറ്റില്‍ നിലംപതിച്ചത്‌. കഴിഞ്ഞ വര്‍ഷം ഒക്ടോബര്‍ 11ന് പ്രധാനമന്ത്രി നരേന്ദ്ര മോദിയാണ്‌ പ്രതിമകള്‍ അനാച്ഛാദനം ചെയ്തത്.
പ്ലാസ്റ്റിക്കും ഫൈബറും കലര്‍ന്ന പദാര്‍ഥം (എഫ്‌ആര്‍പി) ഉപയോഗിച്ചാണ്‌ പ്രതിമകള്‍ നിര്‍മിച്ചതെന്ന്‌ പരിശോധനയില്‍ വ്യക്തമായി. കോണ്‍ക്രീറ്റോ ഉരുക്കോ ഉപയോഗിച്ച്‌ ബലപ്പെടുത്തിയില്ല. ഉള്ള്‌ പൊള്ളയായിരുന്നു.ഗുജറാത്ത്‌ ആസ്ഥാനമായ കമ്ബനിയാണ്‌ പ്രതിമകള്‍ സ്ഥാപിച്ചത്‌.സപ്തര്‍ഷി പ്രതിമകളില്‍ ഒരെണ്ണമൊഴികെ ബാക്കി ആറെണ്ണവും തകര്‍ന്നിരുന്നു. മഹാകാള്‍ ക്ഷേത്രത്തിനു ചുറ്റുമുള്ള ഇടനാഴിയിലാണ് പ്രതിമകള്‍ സ്ഥാപിച്ചിരുന്നത്.
