കൊച്ചി: വീടിനു പുറത്തിറങ്ങാത്ത ദിവസം ബൈക്കില്‍ ഹെല്‍മെറ്റ് വെക്കാതെ സഞ്ചരിച്ചു എന്ന് ചൂണ്ടിക്കാട്ടി 62 വയസുകാരന് പിഴ ചുമത്തിയതായി പരാതി. എറണാകുളം വള്ളുവള്ളി സ്വദേശി അരവിന്ദാക്ഷ പണിക്കര്‍ക്കാണ് സിറ്റി ട്രാഫിക് പോലീസ് അഞ്ഞൂറ് രൂപ പിഴയിട്ടത്.
എന്നാല്‍ നോട്ടീസില്‍ പറയുന്ന ദിവസം തന്റെ വിവാഹ വാര്‍ഷികം ആയിരുന്നെന്നും അന്ന് പുറത്തിറങ്ങിയിട്ടില്ലെന്നും അരവിന്ദാക്ഷന്‍ പറഞ്ഞു. കൂടാതെ പോലീസ് അയച്ചു തന്ന ചിത്രത്തില്‍ കാണുന്നത് തന്റെ വാഹനമല്ല. അടുത്ത കാലത്തൊന്നും താന്‍ ആ പ്രദേശത്ത് പോയിട്ടില്ലെന്നും അരവിന്ദാക്ഷന്‍ കൂട്ടിച്ചേര്‍ത്തു.
ഏപ്രില്‍ 9ന് കൊച്ചിന്‍ ഷിപ്യാര്‍ഡിന് സമീപം ഹെല്‍മെറ്റ് വക്കാതെ വണ്ടിയോടിച്ചെന്ന് കാണിച്ചാണ് എറണാകുളം സൗത്ത് സ്റ്റേഷനിലെ ട്രാഫിക് വിഭാഗം അരവിന്ദാക്ഷപ്പണിക്കര്‍ക്ക് നോട്ടീസ് അയച്ചത്. നോട്ടീസിലുള്ള ചിത്രത്തില്‍ വണ്ടി മാത്രമേയുള്ളൂ. ഹെല്‍മെറ്റില്ലാത്ത ആളെപ്പറ്റി ഒരു സൂചനയുമില്ല.
ചിത്രത്തിലുള്ള വാഹനം തന്റേതല്ലെന്നാണ് അരവിന്ദാക്ഷ പണിക്കര്‍ പറയുന്നത്. ചെയ്യാത്ത തെറ്റിന് പിഴ അടക്കില്ലെന്ന നിലപാടിലാണ് മുന്‍ തപാല്‍ ജീവനക്കാരന്‍ കൂടിയായ അരവിന്ദാക്ഷ പണിക്കര്‍. പിഴയിട്ട നടപടി പോലീസ് പിന്‍വലിച്ചില്ലെങ്കില്‍ കോടതിയെ സമീപിക്കാനാണ് തീരുമാനം.
