കോട്ടയം: കടുത്തുരുത്തിയില്‍ സൈബര്‍ ആക്രമണത്തിന് ഇരയായി പെണ്‍കുട്ടി ജീവനൊടുക്കിയതിനു പിന്നാലെ സൈബര്‍ ഇടങ്ങളിലെ സ്ത്രീ സുരക്ഷ കാര്യക്ഷമമല്ലെന്നാണ് കണക്കുകളും വ്യക്തമാക്കുന്നത്. പരാതികള്‍ വര്‍ധിക്കുമ്പോഴും നിയമനടപടികള്‍ എങ്ങുമെത്താറില്ല. രാജ്യത്തെ സൈബര്‍ ഇടങ്ങളില്‍ സത്രീകള്‍ക്കെതിരെയുള്ള അതിക്രമങ്ങള്‍ കൂടുകയാണ്. ഓരോ വര്‍ഷവും അഞ്ഞൂറിലധികം പരാതികളാണ് ദേശിയ വനിതാ കമ്മിഷനു മുമ്പിലെത്തുന്നത്.ലോക്ഡൗണ്‍ കാലയളവ് മുതലാണ് സൈബര്‍ ഇടങ്ങളില്‍ സത്രീകള്‍ക്കെതിരേയുള്ള അതിക്രമം വര്‍ധിച്ചതെന്നാണ് റിപോര്‍ട്ട്.
ലോക്ഡൗണ്‍ ആരംഭിച്ച മാര്‍ച്ച് മുതല്‍ അണ്‍ലോക് പ്രഖ്യാപിച്ച ജൂലൈയ് വരെയുള്ള കാലയളവില്‍ 378 കേസുകളാണ് ദേശീയ വനിതാ കമ്മിഷന്റെ മുമ്പിലെത്തിയത്. കേരളത്തില്‍ നിന്നു ആറെണ്ണമായിരുന്നു റിപ്പോര്‍ട്ട് ചെയ്തത്. മോര്‍ഫ് ചെയ്ത് ചിത്രങ്ങള്‍ പ്രചരിപ്പിക്കുക, സ്വകാര്യ ദൃശ്യങ്ങള്‍ പകര്‍ത്തി ഭീക്ഷണിപ്പെടുത്തല്‍, ചാറ്റ് വഴി സൗഹൃദം സ്ഥാപിച്ച് അതുവഴി കംപ്യൂട്ടറിലെയും ഫോണിയെലും വ്യക്തി വിവരങ്ങള്‍ ചോര്‍ത്തുക തുടങ്ങിയ നിരവധി പരാതികളാണ് സത്രീകള്‍ ഉന്നയിക്കുന്നത്. സൈബര്‍ ഇടങ്ങളില്‍ സജീവമായ സ്ത്രീകള്‍ നിരന്തരം സൈബര്‍ ആക്രണത്തിന് ഇരയാകുകയാണ്.
സാമൂഹിക-രാഷ്ട്രീയ-സാഹിത്യ-സിനിമാ മേഖലയില്‍ പ്രവര്‍ത്തിക്കുന്ന സ്ത്രീകള്‍ സമീപകാലങ്ങളില്‍ വലിയ സൈബര്‍ അറ്റാക്ക് നേരിടേണ്ടി വന്നിട്ടുണ്ട്. എന്നാല്‍, ഇവരുടെ പരാതികളില്‍ പോലും തീര്‍പ്പുണ്ടാക്കാന്‍ പോലീസ് നിയമ സംവിധാനങ്ങള്‍ക്ക് സാധിച്ചിട്ടില്ല. അതിനാല്‍ സാധാരണക്കാരുടെ പരാതികള്‍ പോലും പ്രഹസനമായി മാത്രം മാറുകയാണ്. വ്യാജ ഐ.ഡി വഴിയാണ് ഇത്തരക്കാര്‍ സൈബര്‍ ഇടങ്ങളില്‍ വിലസുന്നത്. അതിനാല്‍ കുറ്റവാളികളെ കണ്ടെത്തുക എന്നത് പോലീസിന് മുമ്പില്‍ വലിയ പ്രതിസന്ധിയാണ്.
സംസ്ഥാനത്ത് ഓരോവര്‍ഷവും നൂറോളം കേസുകളാണ് അധികം റിപ്പോര്‍ട്ട് ചെയ്യുന്നത്. ക്രൈം റെക്കോര്‍ഡ് ബ്യൂറോയുടെ കണക്കുപ്രകാരം കഴിഞ്ഞവര്‍ഷം 815 കേസുകളാണ് റിപ്പോര്‍ട്ട് ചെയ്തത്. ആറുവര്‍ഷത്തെ കണക്കുകള്‍ പരിശോധിക്കുമ്പോള്‍ ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തതും കഴിഞ്ഞ വര്‍ഷമാണ്. ഈവര്‍ഷം രണ്ടുമാസത്തെ കണക്കുകള്‍ മാത്രം പരിശോധിക്കുമ്പോള്‍ 268 കേസുകള്‍ രജിസ്റ്റര്‍ ചെയ്തിട്ടുണ്ട്.
വര്‍ഷം, സൈബര്‍ കേസുകളുടെ എണ്ണം
2016- 283
2017- 320
2018- 340
2019 -307
2020- 426
2021 -626
2022- 815
2023(ഫെബ്രുവരി വരെ-) 268
