ന്യൂഡൽഹി: കായിക താരങ്ങളുടെ സമരപ്പന്തൽ സന്ദർശിച്ച പി ടി ഉഷയ്ക്കെതിരെ ഇന്നലെയുണ്ടായ പ്രതിഷേധത്തിന് പിന്നാലെ ജന്തർമന്ദറിൽ പോലീസ് തേർവാഴ്ച.
ഇന്നലെ രാത്രിയായിരുന്നു സംഭവം.പോലീസ് മർദ്ദനത്തിൽ ഒരു ഗുസ്തി താരത്തിന്‍റെ തലയ്ക്ക് പരിക്കേറ്റിട്ടുണ്ട്.വനിതാ കായിക താരങ്ങള്‍ അടക്കമുള്ളവരോട് പൊലീസ് മോശമായാണ് പെരുമാറിയതെന്ന് സമരക്കാര്‍ ആരോപിച്ചു. ഞങ്ങള്‍ ഇന്ത്യക്കായി മെഡലുകള്‍ നേടിയത് ഇതിനാണോയെന്നും ബിജെപി സർക്കാർ ഇതിന് മറുപടി പറയണമെന്നും കായിക താരങ്ങൾ ആവശ്യപ്പെട്ടു.താന്‍ നേടിയ എല്ലാ മെഡലുകളും തിരിച്ചെടുക്കണമെന്ന് ബജ്‍റംഗ് പുനിയ എന്നൊരു കായികതാരം സര്‍ക്കാരിനോട് അഭ്യര്‍ഥിച്ചു.
ലൈംഗിക പീഡന പരാതിയില്‍ ഗുസ്തി ഫെഡറേഷന്‍ അധ്യക്ഷനും ബി.ജെ.പി എം.പിയുമായ ബ്രിജ് ഭൂഷനെ അറസ്റ്റ് ചെയ്യണമെന്ന് ആവശ്യപ്പെട്ടുള്ള താരങ്ങളുടെ രാപ്പകല്‍ സമരം പതിമൂന്നാം ദിവസവും തുടരുകയാണ്.
