ബെംഗളുരു: രാഹുൽ ഗാന്ധിയുടെ കോലാർ സന്ദർശന തീയതി വീണ്ടും മാറ്റി. ഏപ്രിൽ 10-ന് നടത്താനിരുന്ന പരിപാടി ഏപ്രിൽ 16-ലേക്ക് മാറ്റിയതായി കോൺഗ്രസ് വൃത്തങ്ങൾ അറിയിച്ചു. സിദ്ധരാമയ്യ, ഡി കെ ശിവകുമാർ പക്ഷങ്ങൾ തമ്മിൽ 25 സീറ്റുകളുടെ പേരിൽ തർക്കം തുടരുകയാണ്. സിദ്ധരാമയ്യ കോലാറിൽ മത്സരിക്കണോ എന്ന കാര്യത്തിൽ ഇപ്പോഴും അന്തിമ തീരുമാനമായിട്ടില്ല. ഈ ആശയക്കുഴപ്പങ്ങളുടെ പശ്ചാത്തലത്തിലാണ് രാഹുലിൻറെ സന്ദർശനത്തീയതി മാറ്റിയിരിക്കുന്നത്.
കർണാടകയിലെ കോലാറിൽ നടത്തിയ പ്രസംഗത്തിലെ പരാമർശത്തെ തുടർന്നാണ് രാഹുലിനെതിരെ മാനനഷ്ടക്കേസെടുത്തതും പിന്നീട് തടവ് ശിക്ഷയ്ക്ക് വിധിക്കപ്പെട്ടതും. ഈ പശ്ചാത്തലത്തിലായിരുന്നു സ്പീക്കർ രാഹുലിനെ അയോഗ്യനായി പ്രഖ്യാപിച്ചത്. ഏപ്രിൽ 5 ന് രാഹുൽ ഗാന്ധി സത്യമേവജയതേ യാത്രക്കായി കോലാറിലെത്തുമെന്നാണ് കർണാടക പി സി സി അധ്യക്ഷൻ ഡി കെ ശിവകുമാർ ആദ്യം പ്രഖ്യാപിച്ചിരുന്നത്. പിന്നീട് അത് ഏപ്രിൽ 10 ലേക്ക് മാറ്റി. ഇപ്പോൾ വീണ്ടും തീയതി മാറ്റിയിരിക്കുകയാണ്.
