രാജപുരം: 10 വയസുകാരനെ കിണറ്റിൽ മരിച്ച നിലയിൽ കണ്ടെത്തി. ബളാന്തോട് ചാമുണ്ഡിക്കുന്നിലെ പ്രഭാകരന്റെ മകനും പനത്തടി ഗവ. ഹൈസ്കൂളില അഞ്ചാം ക്ലാസ് വിദ്യാർഥിയുമായ അർജുൻ എന്ന കണ്ണനെ (10) യാണ് കിണറ്റിൽ മരിച്ച നിലയിൽ കണ്ടെത്തിയത്. ഞായറാഴ്ച രാത്രി എട്ടര മണിയോടെയാണ് സംഭവം.
അമ്മ വിനീത വൈകുന്നേരം സമീപത്തെ കുടുബ വീട്ടിൽ പോയിരുന്നു. തിരിച്ചെത്തിയപ്പോഴാണ് കളിക്കാൻ പോയ മകനെ കാണാതായ വിവരം അറിഞ്ഞത്. തുടർന്ന് പരിസരവാസികളും പ്രദേശവാസികളും നടത്തിയ തിരച്ചിലിനൊടുവിലാണ് ആൾമറയില്ലാത്ത കിണറ്റിൽ വീണ നിലയിൽ കുട്ടിയെ കണ്ടെത്തിയത്. പെട്ടെന്ന് തന്നെ തൊട്ടടുത്ത ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.
പോസ്റ്റ് മോർട്ടത്തിനായി കാഞ്ഞങ്ങാട് ജില്ലാ ആശുപത്രിയിലേക്ക് മാറ്റിയ മൃതദേഹം പോസ്റ്റ് മോർട്ടത്തിന് ശേഷം തിങ്കളാഴ്ച ബന്ധുക്കൾക്ക് വിട്ടുകൊടുത്തു. രാജപുരം പൊലീസ് അന്വേഷണം ആരംഭിച്ചു. സഹോദരങ്ങൾ: ദേവിക പ്രഭാകർ, മഹേശ്വർ പ്രഭാകർ. സഹപാഠികൾക്കും പ്രദേശവാസികൾക്കും അർജുൻ്റെ മരണം നൊമ്പരമായി.
