ശബരിമല: മണ്ഡല വിളക്ക് 2022-2023 മഹോത്സവത്തോടനുബന്ധിച്ച് ശക്തമായ പോലീസ് സന്നാഹം ഒരുക്കി അയ്യപ്പഭക്തർക്ക് സുഗമവും സുരക്ഷിതവുമായ ദർശന സാഹചര്യമൊരുക്കിയതിന് ദേവസ്വം വകുപ്പ് മന്ത്രി കെ രാധാകൃഷ്ണനില്‍ നിന്നും ജില്ലാ പോലിസിനുവേണ്ടി കോട്ടയം ജില്ലാ പോലീസ് മേധാവി കെ.കാർത്തിക് പുരസ്‌കാരം ഏറ്റുവാങ്ങി. മുൻ വർഷങ്ങളിൽ നിന്നും വ്യത്യസ്തമായി ഇത്തവണ ശബരിമല നട തുറക്കുന്നതിന് മുൻപേ തന്നെ ഭക്തജന തിരക്ക് അനുഭവപ്പെട്ടുവെങ്കിലും പൊതുവേ ഭക്തജനങ്ങൾക്ക് വളരെ സുഗമമായ രീതിയിലാണ് ഇത്തവണ ദർശന സാഹചര്യം ഒരുക്കിയത്.
കാൽനടയാത്രക്കാരായ അയ്യപ്പഭക്തർ കൂടുതലായി പോകുന്ന വഴികളായ അഴുത, കാളകെട്ടി, കോയിക്കക്കാവ് മുതലായ സ്ഥലങ്ങൾ കേന്ദ്രീകരിച്ച് പോലീസിന്റെ പ്രത്യേക നിരീക്ഷണവും കുടാതെ അയ്യപ്പ ഭക്തർ വിശ്രമിക്കുന്ന ഇടത്താവളങ്ങൾ കേന്ദ്രീകരിച്ച് സുരക്ഷ ശക്തമാക്കുകയും, ഭക്തർക്ക് വേണ്ട സൗകര്യങ്ങൾ ഉറപ്പുവരുത്തുകയും ചെയ്തിരുന്നു. കാൽനടയാത്രക്കാരായ അയ്യപ്പഭക്തന്മാർക്കായി റിഫ്ലക്റ്റിംഗ് സ്റ്റിക്കർ സംവിധാനങ്ങളും, അയ്യപ്പഭക്തരെ കയറ്റിവരുന്ന വാഹനങ്ങളിലെ ഡ്രൈവർമാർക്ക് പ്രത്യേക ബോധവൽക്കരണ ക്ലാസും നല്‍കിയിരുന്നു.കൂടാതെ പ്രധാന തീർത്ഥാടന കേന്ദ്രമായ എരുമേലിയിൽ ശക്തമായ സുരക്ഷാസംവിധാനം ഇത്തവണ ഒരുക്കിയിരുന്നു.
മോഷണവും മറ്റ് സാമൂഹ്യവിരുദ്ധ പ്രവർത്തനങ്ങളും തടയുന്നതിനായി പ്രത്യേകം സജ്ജമാക്കിയിരിക്കുന്ന കൂടുതൽ ക്യാമറകളും അതിനായി സജ്ജീകരിച്ചിരിക്കുന്ന സ്പെഷ്യൽ കൺട്രോൾ റൂം തുടങ്ങി നിരവധി നൂതന സാങ്കേതിക വിദ്യകളാണ് ജില്ലാ പോലീസ് ഇത്തവണത്തെ മണ്ഡലകാലത്തിനായി ഒരുക്കിയിരുന്നത്. അതിനാൽ തന്നെ ഇത്തവണ മുൻവർഷങ്ങളെ അപേക്ഷിച്ച് മോഷണങ്ങളോ, കുറ്റകൃത്യങ്ങളോ ഇല്ലാതെയാണ് എരുമേലിയിൽ മണ്ഡലകാലം സമാപിച്ചത്. പമ്പയിൽ വച്ച് നടന്ന ചടങ്ങിൽ എ.ഡി.ജി.പി എം. അജിത്‌കുമാര്‍ ഐ.പി.എസ്, മറ്റു മുതിർന്ന പോലീസ് ഉദ്യോഗസ്ഥർ, ദേവസ്വം, പൊതുമരാമത്ത്, റവന്യു, തുടങ്ങിയ വിവിധ വകുപ്പുകളിലെ പ്രതിനിധികള്‍ തുടങ്ങിയവർ പങ്കെടുത്തു.
