ന്യൂഡല്‍ഹി: റെസ്‌ലിങ് ഫെഡറേഷന്‍ ദേശീയ പ്രസിഡന്റ് ബ്രിജ് ഭൂഷണ്‍ ശരണ്‍ സിങ്ങിനെതിരെ ലൈംഗികാരോപണമുന്നയിച്ച് സമരം ചെയ്ത് പ്രതിഷേധിച്ച ഗുസ്തിക്കാര്‍ക്കെതിരെ കേസെടുക്കണമെന്നാവശ്യപ്പെട്ട് ഹൈക്കോടതിയിൽ ഹർജി. സമരം ചെയ്ത വനിതാ ഗുസ്തി താരങ്ങളടക്കമുള്ളവര്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്യണമെന്നാവശ്യപ്പെട്ടാണ് വിക്കി എന്നയാള്‍ ഡല്‍ഹി ഹൈക്കോടതിയെ സമീപിച്ചത്. ഗുസ്തി താരങ്ങള്‍ ബ്രിജ് ഭൂഷന്റെ രാജി ആവശ്യപ്പെട്ട് ബ്ലാക്ക് മെയില്‍ ചെയ്തുവെന്നും അതിനുവേണ്ടി നിയമനടപടികളെ ദുരുപയോഗം ചെയ്തുവെന്നുമാണ് ഹർജിയില്‍ ആരോപിക്കുന്നത്.
എന്നാല്‍, ഹർജിക്കു പിന്നിൽ താനല്ലെന്നു ബ്രിജ് ഭൂഷണ്‍ വ്യക്തമാക്കി. ‘ഡല്‍ഹിയിൽ പ്രതിഷേധിച്ച ഗുസ്തിക്കാര്‍ക്കും വാര്‍ത്താ ചാനലുകള്‍ക്കുമെതിരെ ഞാനോ എന്നോട് ബന്ധപ്പെട്ട ഏതെങ്കിലും അംഗീകൃത വ്യക്തിയോ ഒരു ഹർജിയും സമര്‍പ്പിച്ചിട്ടില്ല. കോടതിയില്‍ ഹർജി നല്‍കാന്‍ ഞാന്‍ ഏതെങ്കിലും അഭിഭാഷകനെയോ ഏജന്‍സിയെയോ പ്രതിനിധിയെയോ അധികാരപ്പെടുത്തിയിട്ടില്ല,”- ബി.ജെ.പി എം.പി കൂടിയായ ബ്രിജ് ഭൂഷണ്‍ ട്വീറ്റ് ചെയ്തു. ബ്രിജ് ഭൂഷണ്‍ വനിതാ ഗുസ്തി താരങ്ങളെ ലൈംഗികമായി പീഡിപ്പിച്ചിരുന്നുവെന്ന് പ്രശസ്ത ഗുസ്തി താരം വിനേഷ് ഫൊഗട്ടായിരുന്നു വെളിപ്പെടുത്തിയത്. കഴിഞ്ഞ ബുധനാഴ്ച മുതല്‍ ബ്രിജ് ഭൂഷന്റെ രാജി ആവശ്യപ്പെട്ടുകൊണ്ട് ഗുസ്തി താരങ്ങള്‍ ജന്തര്‍ മന്തറില്‍ പ്രതിഷേധിക്കുകയായിരുന്നു. പിന്നീട് കേന്ദ്ര കായിക മന്ത്രി അനുരാഗ് ഠാക്കൂറുമായുള്ള ചര്‍ച്ചക്ക് ശേഷമാണ് ഇവര്‍ സമരമവസാനിപ്പിച്ചത്.
