കല്പറ്റ: പിതാവിനൊപ്പം നടന്നുപോകവേ പ്രായപൂര്‍ത്തിയാവാത്ത പെണ്‍കുട്ടിയെ കയറിപ്പിടിച്ച യുവാവിനെയും പ്രതിയെ രക്ഷപ്പെടുത്താന്‍ ശ്രമിച്ചയാളെയും കല്പറ്റ പോലീസ് അറസ്റ്റുചെയ്തു. പുത്തൂര്‍വയല്‍ സ്വദേശിയായ തേങ്ങിന്‍തൊടിയില്‍ നിഷാദ് ബാബു (38), പുത്തൂര്‍വയല്‍ മാങ്ങവയല്‍ സ്വദേശി കാരടിവീട്ടില്‍ അബു (51) എന്നിവരാണ് അറസ്റ്റിലായത്.
നിഷാദ് ബാബുവിനെ സംഭവസ്ഥലത്തുനിന്ന് നാട്ടുകാരാണ് പിടികൂടിയത്. പ്രതിയെ സ്റ്റേഷനിലേക്ക് കൊണ്ടുപോകാമെന്നുപറഞ്ഞ് ഓട്ടോറിക്ഷയില്‍ കയറ്റി രക്ഷപ്പെടുത്താന്‍ ശ്രമിച്ചതിനാണ് അബുവിനെ അറസ്റ്റുചെയ്തത്.
രക്ഷപ്പെടാന്‍ ശ്രമിക്കുന്നതിനിടെ പുത്തൂര്‍വയലില്‍വെച്ചാണ് ഇവരെ പിടികൂടിയത്. ഇവരുടെപേരില്‍ പോക്സോ നിയമപ്രകാരം കേസെടുത്തു. കോടതിയില്‍ ഹാജരാക്കി റിമാന്‍ഡ് ചെയ്തു.
