കണ്ണൂർ: തലശ്ശേരി ഇരട്ടക്കൊലപാതകത്തില് മൂന്നുപേരെ പൊലീസ് കസ്റ്റഡിയിലെടുത്തു.അക്രമിസംഘത്തില് പെട്ട ജാക്സണ്, നവീന്, സുജിത് എന്നിവരാണ് കസ്റ്റഡിയിലുള്ളതെന്നാണ് റിപ്പോര്ട്ട്.
പ്രധാന പ്രതിയെന്ന് കരുതുന്ന പാറായി ബാബുവിനുവേണ്ടി അന്വേഷണം ഊര്ജിതമാക്കി. ബാബുവും ജാക്സണുമാണ് കുത്തിയതെന്ന മരണമൊഴി പൊലീസിന് ലഭിച്ചിട്ടുണ്ട്.
കത്തിക്കുത്തില് കൊടുവള്ളിയിലെ ഇല്ലിക്കുന്നില് ത്രിവര്ണ്ണയില് ഖാലിദ് ( 52), ഖാലിദിന്റെ ഭാര്യാസഹോദരനും സി.പി.എം നെട്ടൂര് ബ്രാഞ്ച് അംഗവുമായ പൂവനാഴി ഷമീര് (48) എന്നിവരാണ് മരിച്ചത്. ഗുരുതരമായി പരിക്കേറ്റ നെട്ടൂര് സാറാസില് ഷാനിബ്(24) തലശ്ശേരി സഹകരണ ആശുപത്രിയില് ചികിത്സയിലാണ്.
ഖാലിദ് തല്ക്ഷണവും ഷമീര് കോഴിക്കോട് ബേബി മെമ്മോറിയല് ആശുപത്രിയിലുമാണ് മരിച്ചത്. ഖാലിദിന് കഴുത്തിനും ഷമീറിന്റെ പുറത്തും ഷാനിബിന് നെഞ്ചിനുമാണ് കുത്തേറ്റത്.ഇന്നലെ വൈകിട്ട് നാലരയോടെ തലശ്ശേരി സഹകരണ ആശുപത്രി കാന്റീന് സമീപമാണ് അക്രമമുണ്ടായത്.
കഞ്ചാവ് വില്പനയെ ചൊല്ലിയുള്ള തർക്കമാണ് ആക്രമണത്തിൽ കലാശിച്ചത്.
