കൊച്ചി: പോലീസുകാരന്‍ സുഹൃത്തിന്‍െ്‌റ വീട്ടില്‍ മോഷണം നടത്തിയത് ഓണ്‍ലൈന്‍ റമ്മി കളിച്ചുണ്ടായ ബാധ്യത തീര്‍ക്കാന്‍! അരൂര്‍ സ്വദേശിയും എറണാകുളം എ.ആര്‍ ക്യാംപിലെ പോലീസുകാരനുമായ അമല്‍ദേവിനെ സംഭവത്തില്‍ ഞാറയ്ക്കല്‍ പോലീസ് അറസ്റ്റു ചെയ്തിരുന്നു. ഞാറയ്ക്കല്‍ പെരുമ്പിള്ളിയില്‍ താമസിച്ചിരന്ന ഇയാള്‍ സുഹൃത്തിന്റെ വീട്ടില്‍ വിരുന്നിന് എത്തിയപ്പോഴാണ് 10 പവന്‍ മോഷ്ടിച്ചത്. കഴിഞ്ഞ 13 നാണ് മോഷണമെന്നു വീട്ടുകാര്‍ പറയുന്നു.
സ്ഥിരമായി സുഹൃത്തിന്റെ വീട്ടില്‍ വരുമായിരുന്ന അമല്‍ അലമാരയില്‍ സൂക്ഷിച്ചിരുന്ന സ്വര്‍ണം മോഷ്ടിക്കുകയായിരുന്നു. സുഹൃത്തിന്റെ മകന്റെ ഭാര്യയുടെ സ്വര്‍ണമാണ് മോഷ്ടിച്ചത്. മരുമകള്‍ വീട്ടില്‍ ഇല്ലാതിരുന്നതിനാല്‍ മോഷണവിവരം അറിഞ്ഞിരുന്നില്ല. കഴിഞ്ഞ ദിവസം മരുമകള്‍ എത്തിയപ്പോഴാണ് സംഭവം അറിയുന്നത്. തുടര്‍ന്നു പോലീസില്‍ പരാതി നല്‍കി.
ഈ ദിവസങ്ങളില്‍ വീട്ടില്‍ വന്നവരെക്കുറിച്ചു നടത്തിയ അന്വേഷണത്തിലാണ് സംശയം പോലീസുകാരനിലേക്കു നീണ്ടത്. ഇയാള്‍ക്ക് റമ്മി കളിച്ചു കാര്യമായ സാമ്പത്തിക ബാധ്യത ഉണ്ടായിട്ടുണ്ടെന്നു സുഹൃത്തുക്കള്‍ പറയുന്നു. ഇതിനായി മറ്റൊരാളോടു പണം കടം ചോദിച്ചിരുന്നെങ്കിലും ലഭിച്ചില്ല. ഇതോടെയാണ് മോഷണമെന്നാണു നിഗമനം. അമല്‍ദേവിനെ ഇന്നു വീട്ടിലെത്തിച്ചു തെളിവെടുപ്പു നടത്തും. തുടര്‍ന്നു കോടതിയില്‍ ഹാജരാക്കുമെന്നു ഞാറയ്ക്കല്‍ പോലീസ് പറഞ്ഞു. ഇതിനിടെ കേസ് ഒത്തുതീര്‍പ്പാക്കാന്‍ കൊണ്ടുപിടിച്ചുള്ള ശ്രമം നടക്കുന്നുണ്ട്.
