വയനാട്: ബത്തേരിയില്‍ കടുവയിറങ്ങിയതിന്റെ ദൃശ്യങ്ങള്‍ പുറത്ത്. ബത്തേരി നഗരത്തിനു സമീപം ദൊട്ടപ്പന്‍കുളത്താണ് ബുധനാഴ്ച രാത്രി കടുവയിറങ്ങിയത്. വനപാലകര്‍ സ്ഥലത്തെത്തി കടുവയെ കണ്ട മേഖലയില്‍ തിരച്ചില്‍ നടത്തിയെങ്കിലും കണ്ടെത്താനായില്ല. ജനം ജാഗ്രത പാലിക്കണമെന്ന് വനംവകുപ്പ് മുന്നറിയിപ്പ് നല്‍കി.
കാടുമൂടിയ പ്രദേശത്തുനിന്ന് ഒരു കടുവ റോഡില്‍ പ്രവേശിച്ച് സമീപത്തെ മതില്‍ ചാടിക്കടന്നു പോകുന്നതാണ് വിഡിയോയിലുള്ളത്. ജനവാസമുള്ള പ്രദേശത്തെ ഒരു വീടിന്റെ വളപ്പിലേക്കാണ് കടുവ ചാടിക്കടക്കുന്നത്. ബത്തേരിയുടെ വിവിധ ഭാഗങ്ങളില്‍ അടുത്തിടെ കടുവയിറങ്ങിയിരുന്നു. ജനം കടുവഭീതിയില്‍ കഴിയുന്നതിനിടെയാണ് ദൊട്ടപ്പന്‍കുളത്ത് കടുവയിറങ്ങിയ ദൃശ്യം പുറത്തുവന്നത്.
