അഹമ്മദാബാദ്: ഗുജറാത്തിലെ ഖേഡയില്‍ നവരാത്രി ആഘോഷത്തിനിടെ കല്ലേറില്‍ ആറ് പേര്‍ക്ക് പരുക്ക്. തിങ്കളാഴ്ച രാത്രി ഉന്ധേല ഗ്രാമത്തിലെ നവരാത്രി ആഘോഷത്തിനിടെയാണ് ആക്രമണമുണ്ടായത്. ആറു പേരെ പോലീസ് കസ്റ്റഡിയിലെടുത്തതായി അധികൃതര്‍ അറിയിച്ചു.
ക്ഷേത്രവും പള്ളിയും അടുത്തടുത്ത് സ്ഥിതി ചെയ്യുന്ന പ്രദേശത്താണ് ആക്രമണം നടന്നത്. പ്രദേശത്ത് വന്‍ പൊലീസ് സന്നാഹത്തെ വിന്യസിച്ചിട്ടുണ്ട്.
പ്രദേശവാസികളായ ഇതര വിഭാഗത്തില്‍പ്പെട്ട യുവാക്കളാണ് പ്രശ്നങ്ങളുണ്ടാക്കിയതെന്നു പോലീസ് പറഞ്ഞു. പരിപാടിക്കിടെ ആദ്യം ശല്യമുണ്ടാക്കാന്‍ തുടങ്ങിയ സംഘം പിന്നീട് കല്ലേറു നടത്തുകയായിരുന്നു. എല്ലാ പ്രതികളെയും തിരിച്ചറിഞ്ഞെന്നും കര്‍ശന നടപടിയെടുക്കുമെന്നും പോലീസ് അറിയിച്ചു.
