ചാലക്കുടി: രണ്ടര വര്‍ഷം മുമ്പ് അബുദാബിയില്‍ മരിച്ച ചാലക്കുടി സ്വദേശി ഡെന്‍സിയുടെ മൃതദേഹം പുറത്തെടുത്ത് റീ പോസ്റ്റ്‌മോര്‍ട്ടം ഇന്ന് നടത്തും. നോര്‍ത്ത് ചാലക്കുടി സെന്റ് ജോസഫ്‌സ് പള്ളി സെമിത്തേരിയില്‍ സംസ്‌കരിച്ച മൃതദേഹം രാവിലെ ഒന്‍പതരയോടെ പുറത്തെടുക്കും. തൃശ്ശൂര്‍ മെഡിക്കല്‍ കോളേജിലാണ് റീ പോസ്റ്റ് മോര്‍ട്ടം. നിലമ്പൂരിലെ പാരമ്പര്യ വൈദ്യന്‍ കൊലക്കേസിലെ മുഖ്യ പ്രതി ഷൈബിന്‍ അഷ്‌റഫാണ് ഡെന്‍സിയേയും അബുദാബിയിലെ സ്ഥാപന ഉടമ ഹാരിസിനെയും കൊലപ്പെടുത്തിയതെന്നാണ് പൊലീസ് സംശയിക്കുന്നത്.
ഷൈബിന്‍ അഷ്‌റഫിന്റെ ബിസിനസ് പങ്കാളിയായിരുന്നു ഹാരിസ്. 2020 മാര്‍ച്ച് 5 -നാണ് ഹാരിസും ഡെന്‍സിയും കൊല്ലപ്പെടുന്നത്. ഡെന്‍സിയെ കൊന്നശേഷം, ഹാരിസ് ആത്മഹത്യ ചെയ്തു എന്നായിരുന്നു അബുദാബി പൊലീസ് കരുതിയിരുന്നത്. എന്നാല്‍ കടുതല്‍ വെളിപ്പെടുത്തലുകളും മൊഴിയും വന്നതോടെയാണ് മൃതദേഹം പുറത്തെടുത്ത് പോസ്റ്റ് മോര്‍ട്ടം നടത്താന്‍ പൊലീസിന് ഇരിങ്ങാലക്കുട ആര്‍ഡിഒ അനുമതി തേടിയത്.
കേസ് അന്വേഷിക്കുന്ന നിലമ്പൂര്‍ ഡിവൈഎസ്പി സാജു കെ. ഏബ്രഹാം നല്‍കിയ അപേക്ഷയിലായിരുന്നു നടപടി. ചാലക്കുടി സെന്റ് ജോസഫ് പള്ളിയില്‍ സംസ്‌കരിച്ച മൃതദേഹം പുറത്തുനിന്നുള്ള ഒരാളുടെ സഹായത്തോടെയാണ് പൊലീസ് പുറത്തെടുക്കുക. 2020 മാര്‍ച്ചിലായിരുന്നു അബുദാബിയില്‍ ഇരട്ടക്കൊലപാതകം നടന്നത്. ഡെന്‍സിയെ കൊന്ന് ഹാരിസ് ആത്മഹത്യ ചെയ്തു എന്നായിരുന്നു കേസില്‍ അബുദാബി പൊലീസ് കണ്ടെത്തിയത്.
എന്നാല്‍ അത് അങ്ങനെ വരുത്തി തീര്‍ക്കുകയായിരുന്നു എന്നാണ് പൊലീസിന്റെ പുതിയ നിഗമനം. ഇരട്ട കൊലപാതകമായിരുന്നു അതെന്ന് ഷൈബിന്റെ സംഘത്തിലെ അംഗവും കൂട്ടാളിയുമായ നൗഷാദ് സെക്രട്ടേറിയറ്റിനു മുന്നിലെത്തി ഉദ്യോഗസ്ഥര്‍ക്കും മാധ്യമപ്രവര്‍ത്തകര്‍ക്കും മുന്‍പില്‍ വെളിപ്പെടുത്തുകയായിരുന്നു. ഇതോടെയാണ് പൊലീസ് അന്വേഷണം തുടങ്ങിയതും ഷൈബിന്റെ കൂടുതല്‍ കുറ്റകൃത്യങ്ങളിലേക്ക് പൊലീസിന് സംശയങ്ങള്‍ ഉയര്‍ന്നതും.
