വാഹനാപകടത്തെത്തുടർന്ന് ഗുജറാത്തിലെ വഡോദര നഗരത്തിൽ സാമുദായിക സംഘർഷം. മൂന്നു പേർക്കു പരിക്കേറ്റു. സംഘർഷവുമായി ബന്ധപ്പെട്ട് 19 പേരെയും വാഹനാപകടവുമായി ബന്ധപ്പെട്ട് മൂന്നു പേരെയും പോലീസ് അറസ്റ്റ് ചെയ്തു.
ഇരുവിഭാഗങ്ങൾ തമ്മിൽ കല്ലേറുണ്ടായി. ഏതാനും വാഹനങ്ങൾ തകർക്കപ്പെട്ടു. ഒരു ദേവാലയം ആക്രമിക്കപ്പെട്ടു. ഉടനെ തന്നെ ഇടപെട്ടത് കൂടുതല്‍ രംഗം വഷളാക്കിയില്ല.
രാത്രി നഗരത്തിലെ റാവുപുര മേഖലയിൽ ഇരു സമുദായങ്ങളിൽപ്പെട്ട രണ്ടു പേരുടെ ഇരുചക്രവാഹനങ്ങൾ കൂട്ടിയിടിച്ചതിനെത്തുടർന്നായിരുന്നു സംഘർഷം ഉടലെടുത്തത്. ഉടൻതന്നെ ഇരു സമുദായങ്ങളിൽപ്പെട്ടവർ പ്രദേശത്ത് തടിച്ചുകൂടി കല്ലേറ് ആരംഭിച്ചു. റോഡരികിലുള്ള ദേവാലയത്തിലെ വിഗ്രഹം അക്രമികൾ തകർത്തു. പ്രദേശത്തു വൻ പോലീസ് സംഘത്തെ വിന്യസിച്ചിട്ടുണ്ട്.
