വി ഡി സതീശന്റെ സത്യപ്രതിജ്ഞ കാണാൻ ചിരിച്ചുകൊണ്ട് സ്റ്റേഡിയത്തിലേക്ക്…കൂകി വിളിച്ച് കളിയാക്കി പ്രവർത്തകർ- വീഡിയോ

തിരുവനന്തപുരം: വി.ഡി. സതീശന്റെ നേതൃത്വത്തിലുള്ള യുഡിഎഫ് സർക്കാരിന്റെ സത്യപ്രതിജ്ഞ കാണാനെത്തിയ യുവനടി റിനി ആൻ ജോർജിനെ കൂകിവിളിച്ച് കളിയകാക്കി ആൾക്കൂട്ടം. ഇന്നലെ സത്യപ്രതിജ്ഞ കാണാൻ തിരുവനന്തപുരം സെൻട്രൽ സ്റ്റേഡിയത്തിലെത്തിയ നടിക്കുനേരേയാണ് ആളുകൾ കൂകിവിളിച്ചത്. സ്ത്രീകൾ ഉൾപ്പെടെ നടന്നുപോവുന്ന റിനിക്കുനേരെ കൂകിവിളിച്ചു. കളിയാക്കുന്ന ആൾക്കൂട്ടത്തെ നോക്കി ചിരിച്ചുകൊണ്ട് പോകുന്ന റിനിയുടെ വീഡിയോ സാമൂഹികമാധ്യമങ്ങൾ പങ്കുവച്ചിട്ടുണ്ട്.

അതേസമയം മുഖ്യമന്ത്രി വി.ഡി. സതീശനുമായി അടുത്ത ബന്ധം സൂക്ഷിക്കുന്ന നടിയും മോഡലുമായ റിനി, മുഖ്യമന്ത്രി പ്രഖ്യാപനത്തിന് പിന്നാലെ അദ്ദേഹത്തെ പ്രശംസിച്ച് കുറിപ്പ് പങ്കുവെച്ചിരുന്നു. കുഴിച്ചുമൂടാൻ നോക്കിയിട്ടും ഉയർന്നുവന്നവന്റെ പട്ടാഭിഷേകമാണ് ഇനിയെന്നായിരുന്നു അന്ന് റിനി സാമൂഹികമാധ്യമങ്ങളിൽ കുറിച്ചത്.

കേരളത്തിലെ ഒരു യുവനേതാവ് മോശമായി പെരുമാറിയെന്നും അശ്ലീല സന്ദേശങ്ങൾ അയച്ചിരുന്നുവെന്നുമുള്ള റിനിയുടെ വെളിപ്പെടുത്തൽ വലിയ ചർച്ചകൾക്ക് വഴിവെച്ചിരുന്നു. റിനിയുടെ വെളിപ്പെടുത്തലിനെത്തുടർന്നാണ് പാലക്കാട് എംഎൽഎയായിരുന്ന രാഹുൽ മാങ്കൂട്ടത്തിലിനെതിരേ കൂടുതൽ ആരോപണങ്ങളും കേസുകളും ഉയർന്നുവന്നതും പാർട്ടിയിൽ നിന്ന് പുറത്താക്കുന്നതിലേക്ക് കാര്യങ്ങൾ കൊണ്ടുചെന്നെത്തിച്ചതും. അതിനിടെ ഇടതുപക്ഷ പരിപാടികളിലും റിനി സജീവ സാന്നിദ്ധ്യമായിരുന്നു.

അതേസമയം യുഡിഎഫ് സർക്കാരിന്റെ സത്യപ്രതിജ്ഞ ആഘോഷമാക്കാൻ പ്രതീക്ഷിച്ചതിനേക്കാൾ പ്രവർത്തകരായിരുന്നു എത്തിയത്. സദസ്സിൽ 15,000-ത്തോളം സീറ്റുകളാണ് ഒരുക്കിയിരുന്നത്. 60,000 പേരാണ് സ്റ്റേഡിയത്തിലേക്ക് കടന്നതെന്നാണ് ഏകദേശ കണക്ക്. ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്കാ ഗാന്ധി എംപി, കോൺഗ്രസ് ദേശീയ അധ്യക്ഷൻ മല്ലികാർജുൻ ഖാർഗെ, മറ്റ് സംസ്ഥാനത്തെ കോൺഗ്രസ് മുഖ്യമന്ത്രിമാർ, മുൻമുഖ്യമന്ത്രി പിണറായി വിജയൻ, രാജീവ് ചന്ദ്രശേഖർ, എംവി ​ഗോവിന്ദൻ ഉൾപ്പെടെയുള്ളവർ ചടങ്ങിൽ പങ്കെടുത്തു.