മമ്മൂട്ടിയും മോഹൻലാലും പിന്നെ മലയാള സിനിമയും

ഏകദേശം 1985 – 86 കാലഘട്ടം മുതൽ മമ്മൂട്ടി – മോഹൻലാൽ എന്നീ താരധ്രുവങ്ങളെ കേന്ദ്രീകരിച്ചായിരുന്നു വാണിജ്യപരമായി മലയാള സിനിമയുടെ നിലനിൽപ്പ്.ഇരുവർക്കും പിന്നിലായി പലരും വന്നു പോയെങ്കിലും ഇരുവരുടെയും സ്ഥാനം ഇന്നും അചഞ്ചലമായി തുടരുന്നു.അതേപോലെ ഇരുവരുടെയും കരിയർ നിരവധി ഉയർച്ച താഴ്ച്ചകളിലൂടെ കടന്ന് പോയിട്ടുണ്ടെങ്കിലും പ്രേക്ഷക പിന്തുണയിൽ ഇവർ അധികം പിന്നോട്ട് പോയിട്ടില്ല എന്നതാണ് വാസ്തവം . ഇവരുടെ സമകാലികർ എന്നു പറയാവുന്ന ഇതര ദക്ഷിണേന്ത്യൻ ഭാഷാ താര ദ്വയങ്ങളെല്ലാം തന്നെ നിറം മങ്ങുകയോ പുതിയ തലമുറക്ക് വഴിമാറി കൊടുക്കുകയോ ചെയ്തപ്പോൾ  മമ്മൂട്ടി – മോഹൻലാൽ താരജോടികൾ ഇന്നും തങ്ങളുടെ പ്രഭാവം നിലനിർത്തി പോരുന്നു.