ന്യൂഡല്ഹി: കോവിഡ് ചികിത്സിയ്ക്കുള്ള മോള്നുപിരാവിര് ഗുളികയുടെ ഇന്ത്യയിലെ അടിയന്തര ഉപയോഗത്തിന് ഉടന് അനുമതി ലഭിച്ചേക്കുമെന്ന് റിപ്പോര്ട്ടുകള്. ഏതാനും ദിവസങ്ങള്ക്കുള്ളില് ഗുളികയുടെ ഉപയോഗത്തിന് അനുമതി ലഭിക്കുമെന്ന് കോവിഡ് സ്ട്രാറ്റജി ഗ്രൂപ്പായ സി.എസ്.ഐ.ആര് ചെയര്മാന് ഡോ. രാം വിശ്വകര്മയെ ഉദ്ധരിച്ച് എന്.ഡി.ടി.വി റിപ്പോര്ട്ട് ചെയ്തു.
കൊവിഡ് ലക്ഷണമുള്ളവര്ക്ക് ദിവസം രണ്ടുനേരം നല്കാവുന്ന അമേരിക്കന് ഫാര്മ കമ്പനി നിര്മ്മിക്കുന്ന ആന്റിവൈറല് ഗുളികയാണ് ‘മോള്നുപിരവിര്’.ലോകത്ത് ആദ്യമായാണ് ഒരു ആന്റി വൈറല് ഗുളിക കൊവിഡ് ചികില്സയ്ക്കായി ഉപയോഗിക്കാന് അനുമതി ലഭിക്കുന്നത്.
കൊവിഡ് ചികില്സ രംഗത്ത് വലിയ മാറ്റം ഈ ഗുളികയുടെ ഉപയോഗം വരുത്തുമെന്നാണ് ബ്രിട്ടീഷ് ഹെല്ത്ത് സെക്രട്ടറി സാജിദ് ജാവേദ് പറയുന്നത്. ലക്ഷണമുള്ളവര് ഈ ഗുളിക ഉപയോഗിക്കുന്നത്, അവര്ക്ക് ആശുപത്രി വാസം ഒഴിവാക്കാന് കഴിയും എന്നാണ് റിപ്പോര്ട്ടുകള്. അതേ സമയം രോഗലക്ഷണം കാണിച്ചു തുടങ്ങി അഞ്ചു ദിവസത്തിനുള്ളില് ഈ മരുന്ന് കഴിക്കുന്നതാണ് അഭികാമ്യം എന്നാണ് ഡോക്ടര്മാര് പറയുന്നത്.
അമേരിക്കന് ഫാര്മ കമ്പനി എംഎസ്ഡിയാണ് ഈ ഗുളിക നിര്മ്മിക്കുന്നത്. അംഗീകാരം ലഭിച്ചതോടെ ഇവര്ക്ക് വലിയ ഓഡറാണ് ബ്രിട്ടണ് നല്കിയിരിക്കുന്നത്. നവംബര് മാസത്തില് മാത്രം 4,80,000 കോഴ്സ് ‘മോള്നുപിരവിര്’ ബ്രിട്ടനില് ലഭ്യമാകും. അതേ സമയം ആശുപത്രികളിലെ ഡോക്ടര്മാര് നിശ്ചയിച്ചാല് മാത്രമേ ഒരു രോഗിക്ക് ഇത് ഉപയോഗിക്കാന് സാധിക്കൂ. ബ്രിട്ടന് പുറമേ, അമേരിക്ക, ഓസ്ട്രേലിയ, സിംഗപ്പൂര്, ദക്ഷിണകൊറിയ എന്നീ രാജ്യങ്ങളും ഈ ഗുളിക വാങ്ങുവാന് നിര്മ്മാതാക്കളുമായി കരാര് ഉണ്ടാക്കിയെന്നാണ് റിപ്പോര്ട്ട് ചെയ്യുന്നത്.