എരുമേലി : ശബരിമല തീർത്ഥാടകർ സഞ്ചരിച്ചിരുന്ന ബസുകൾ തമ്മിൽ കൂട്ടിയിടിച്ച് അഞ്ച് പേർക്ക് പരിക്ക്.
മുന്നിൽ പോയ ബസ് പെട്ടന്ന് ബ്രേക്കിട്ടപ്പോൾ തൊട്ടു പിന്നാലെയുണ്ടായിരുന്ന മറ്റൊരു ബസ് മുന്നിലുണ്ടായിരുന്ന വാഹനത്തിലേക്ക് ഇടിച്ചു കയറിയായിരുന്നു അപകടം.ഇന്ന് രാവിലെ 06 :45 ഓടെ എരുമേലി – മുണ്ടക്കയം റോഡിലെ അമരാവതി ജംഗ്ഷനിലാണ് സംഭവം.
ചെന്നൈയിൽ നിന്നും ശബരിമലയിലേക്ക് പോകുകയായിരുന്ന ബസിന് പുറകിലായി വെല്ലൂരിൽ നിന്നും വന്ന ബസ് ഇടിച്ചാണ് അപകടം.അപകടത്തിൽ പരിക്കേറ്റ ബാലസുബ്രഹ്മണ്യൻ (37), മുരുകൻ (48), സുകുമാർ (45), ബാബുരാജ് (47) എന്നിവരെ കാഞ്ഞിരപ്പള്ളി ജനറൽ ആശുപത്രിയിലും ഗുരുതരമായി പരിക്കേറ്റ ശരവണൻ (48) നെ വിദഗ്ധ ചികിത്സക്കായി കോട്ടയം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. നാട്ടുകാരും പട്രോളിങ് ഡ്യൂട്ടിയിൽ ഉണ്ടായിരുന്ന മോട്ടോർ വാഹന വകുപ്പ് ഉദ്യോഗസ്ഥരും പോലിസും ചേർന്നാണ് രക്ഷാപ്രവർത്തനങ്ങൾ നടത്തിയത്. രണ്ടു വാഹനത്തിലും ഉണ്ടായിരുന്ന തീർത്ഥാടകരെ പിന്നീട് എരുമേലിയിൽ നിന്നും എത്തിച്ച കെഎസ്ആർടിസി ബസിൽ പമ്പയിൽ എത്തിച്ചു.
