മുംബൈ: ബോളിവുഡ് താരം കരീനാ കപൂറിന് കോവിഡ് ബാധിച്ചതിനു പിന്നാലെ ഇവര്‍ താമസിക്കുന്ന വസതി ബ്രിഹന്‍ മുംബൈ മുനിസിപ്പല്‍ കോര്‍പറേഷന്‍ (ബിഎംസി) അടച്ചുപൂട്ടി. കരീനയുടെ വസതി സീല്‍ ചെയ്തതിനൊപ്പം, അതേ കെട്ടിടത്തില്‍ താമസിക്കുന്ന മറ്റുള്ള ആളുകളുടെ ആര്‍ടിപിസിആര്‍ പരിശോധന നടത്താനുള്ള ഒരുക്കത്തിലാണ് അധികൃതര്‍.
‘കഭി ഖുഷി കഭി ഗം’ ചിത്രത്തിന്റെ 20ാം വാര്‍ഷിക ആഘോഷത്തിന്റെ ഭാഗമായി, സംവിധായകന്‍ കരണ്‍ ജോഹറിന്റെ വസതിയില്‍ നടത്തിയ വിരുന്നില്‍ പങ്കെടുത്തതിനു ശേഷം താന്‍ കോവിഡ് പോസിറ്റീവായ വിവരം കരീനതന്നെയാണ് ഇന്‍സ്റ്റഗ്രാം സ്റ്റോറിയിലൂടെ പങ്കുവച്ചത്. ‘ഞാന്‍ കോവിഡ് പോസിറ്റീവായിരിക്കുകയാണ്. എല്ലാവിധ മുന്‍കരുതലുകളും പാലിച്ച് മറ്റുള്ളവരില്‍നിന്ന് അകലം പാലിച്ചു കഴിയുകയാണ്. ഞാനുമായി സമ്പര്‍ക്കത്തില്‍ ഏര്‍പ്പെട്ട എല്ലാവരും കോവിഡ് പരിശോധനയ്ക്കു വിധേയരാകാന്‍ അഭ്യര്‍ഥിക്കുകയാണ്’ തിങ്കളാഴ്ച ഇന്‍സ്റ്റഗ്രാം സ്റ്റോറിയില്‍ കരീന കുറിച്ചിരുന്നു.
വിരുന്നില്‍ പങ്കെടുത്ത കരീനയുടെ ഉറ്റ സുഹൃത്തും ബോളിവുഡ് താരവുമായ അമൃത അറോറയും കോവിഡ് പോസിറ്റീവായിരുന്നു. അമൃതയുടെ വസതിയും സീല്‍ ചെയ്തിട്ടുണ്ട്. അതിനിടെ, കരണ്‍ ജോഹറിന്റെ കോവിഡ് പരിശോധനാഫലം നെഗറ്റീവായതായും റിപ്പോര്‍ട്ടുകള്‍ പുറത്തുവന്നു.
