ഡോക്ടര്മാരെ നിരീക്ഷിച്ച് ചാരന്മാര് കണ്ടെത്തുമെന്ന് ഭയം; മോജ്തബയെ ചികിത്സയ്ക്കായി റഷ്യന് സൈനിക വിമാനത്തില് രഹസ്യമായി മാറ്റി; നിര്ദേശിച്ചത് പുടിന്; പുറത്തുവന്ന കത്ത് എഴുതിയത് അനുയായി; എല്ലാം അറിയാമെന്ന് നെതന്യാഹു
ന്യൂയോര്ക്ക്: പരമോന്നത പദവിയിലേക്ക് ഉയര്ത്തിയെങ്കിലും മോജ്തബ ഖമേനിയുടെ വിവരങ്ങള് ഇപ്പോഴും നിഗൂഢമായി തുടരുകയാണ്. അദ്ദേഹം ‘ജീവിച്ചിരിപ്പില്ല’ എന്ന് ഞായറാഴ്ച യുഎസ് പ്രസിഡന്റ് ഡൊണാള്ഡ് ട്രംപ് സൂചിപ്പിച്ചപ്പോള്, തങ്ങളുടെ പുതിയ നേതാവിന് ‘പ്രശ്നങ്ങളൊന്നുമില്ലെന്ന്’ ഇറാന്റെ വിദേശകാര്യമന്ത്രി അബ്ബാസ് അരാഗ്ചി ശക്തമായി വാദിച്ചു. ആദ്യഘട്ട ആക്രമണങ്ങളില് ഏറ്റ ഗുരുതരമായ പരിക്കുകള്ക്ക് ചികിത്സ തേടി ഖമേനി ഇപ്പോള് റഷ്യയിലുണ്ടെന്നാണു റിപ്പോര്ട്ട്.
മൊജ്താബ ഖമേനിയെ അതീവ രഹസ്യമായി റഷ്യന് സൈനിക വിമാനത്തില് മോസ്കോയിലേക്ക് കൊണ്ടുപോയെന്നാണു കുവൈത്തി പത്രമായ അല്-ജരീദ റിപ്പോര്ട്ട് ചെയ്തത്. മാര്ച്ച് 12-ന് അദ്ദേഹം ഇറാന് വിട്ടതായും യുഎസ്-ഇസ്രായേല് ആക്രമണത്തിന്റെ ആദ്യ തരംഗത്തില് കാലിനേറ്റ ഗുരുതരമായ പരിക്കുകള്ക്ക് ‘വിജയകരമായ’ ശസ്ത്രക്രിയയ്ക്ക് വിധേയനായതായും പത്രം റിപ്പോര്ട്ട് ചെയ്തു. ഇറാനിയന് പ്രസിഡന്റ് മസൂദ് പെസെഷ്കിയാനുമായുള്ള ഫോണ് സംഭാഷണത്തിനിടെ റഷ്യന് പ്രസിഡന്റ് വ്ളാഡിമിര് പുടിന് നേരിട്ട് വൈദ്യസഹായം വാഗ്ദാനം ചെയ്തിരുന്നതായി ‘പരമോന്നത നേതാവിനോട് അടുത്ത ഉന്നത സ്രോതസിനെ’ ഉദ്ധരിച്ച് റിപ്പോര്ട്ട് കൂട്ടിച്ചേര്ക്കുന്നു.
ഖമേനിയുടെ കാലിന് ഗുരുതരമായി പരിക്കേറ്റുവെന്ന് സൂചിപ്പിക്കുന്ന വിവിധ പ്രസിദ്ധീകരണങ്ങളില് നിന്നുള്ള മുന്കാല റിപ്പോര്ട്ടുകളുമായി ഈ അവകാശവാദം യോജിക്കുന്നു. എന്നാല് അധികാരികളില് നിന്ന് ഔദ്യോഗിക സ്ഥിരീകരണമൊന്നുമില്ല ‘പുതിയ പരമോന്നത നേതാവിന് യാതൊരു പ്രശ്നവുമില്ല’ എന്ന് ഇറാന് ആവര്ത്തിച്ചു പറയുന്നു.
അദ്ദേഹത്തിന്റെ പിതാവിനെയും നിരവധി കുടുംബാംഗങ്ങളെയും വധിച്ച ആദ്യഘട്ട ആക്രമണങ്ങളില് അദ്ദേഹത്തിന് പരിക്കേറ്റതായി ഇസ്രായേല്, അമേരിക്കന് പ്രസിദ്ധീകരണങ്ങള് ആവര്ത്തിച്ച് അവകാശപ്പെട്ടിരുന്നു. ഇറാന് ഈ അവകാശവാദങ്ങളെ ശക്തമായി എതിര്ക്കുകയും പുതിയ നേതാവിനു സുഖമാണെന്നു വ്യക്തമാക്കുകയും ചെയ്തു. എന്നാല്, തിരഞ്ഞെടുപ്പിന് തൊട്ടുപിന്നാലെ ഇറാനിയന് സ്റ്റേറ്റ് ടെലിവിഷന് മൊജ്താബ ഖമേനിയെ ‘റമദാന് യുദ്ധത്തിലെ പരിക്കേറ്റ പോരാളി’ എന്ന് വിശേഷിപ്പിച്ചതിന് ശേഷമാണ് അദ്ദേഹത്തിന്റെ ആരോഗ്യത്തെക്കുറിച്ചുള്ള ചര്ച്ചകള് ആദ്യം തുടങ്ങിയതെന്നത് ശ്രദ്ധേയമാണ്. ആയത്തുള്ള അലി ഖമേനി കൊല്ലപ്പെട്ട ആക്രമണത്തിനിടെ അദ്ദേഹത്തിന് പരിക്കേറ്റുവെന്നതിന്റെ സൂക്ഷ്മമായ അംഗീകാരമാണിതെന്ന് ചില വിശകലന വിദഗ്ധര് വിശ്വസിക്കുന്നു.
മൊജ്താബ ഖമേനിക്ക് പരിക്കേറ്റോ?
തന്റെ പിതാവ് കൊല്ലപ്പെട്ട ഫെബ്രുവരി 28-ലെ ആക്രമണത്തില് മൊജ്താബ ഖമേനിക്ക് ഗുരുതരമായി പരിക്കേറ്റതായി ഇസ്രായേല് മാധ്യമങ്ങള് അടുത്തിടെ സൂചിപ്പിച്ചു. വൈനെറ്റ് ന്യൂസ് (Ynet News) പ്രകാരം, ‘ഓപ്പറേഷന് റോറിംഗ് ലയണിന്റെ’ പ്രാരംഭ ആക്രമണത്തില് മൊജ്താബയ്ക്ക് പരിക്കേറ്റതായി ഇസ്രായേല് ഇന്റലിജന്സ് ഉദ്യോഗസ്ഥര് വിശ്വസിക്കുന്നു. ഖമേനിക്ക് കാലിന് ഗുരുതരമായ പരിക്കേറ്റതായി ഇന്റലിജന്സ് സൂചിപ്പിക്കുന്നതായി രണ്ട് ഇസ്രായേല് സൈനിക ഉദ്യോഗസ്ഥര് പിന്നീട് ദ ന്യൂയോര്ക്ക് ടൈംസിനോട് പറഞ്ഞു.
പരമോന്നത നേതാവിന് ഒരു കാല് നഷ്ടപ്പെട്ടുവെന്നും അദ്ദേഹം കോമയില് തുടരുകയാണെന്നും ‘ഇന്റര്നെറ്റ് വിച്ഛേദിച്ച സമയത്ത് ടെഹ്റാനില് നിന്ന് സന്ദേശങ്ങള് പുറത്തെത്തിച്ച’ ഒരു സ്രോതസിനെ ഉദ്ധരിച്ച് യുകെ ആസ്ഥാനമായുള്ള ടാബ്ലോയിഡ് ദ സണ് (The Sun) റിപ്പോര്ട്ട് ചെയ്തിരുന്നു. അദ്ദേഹത്തിന് ‘വയറിനോ കരളിനോ ഗുരുതരമായ കേടുപാടുകള് സംഭവിച്ചിട്ടുണ്ടെന്നും’ ദ സണ് ഉദ്ധരിച്ച സ്രോതസ്സുകള് അവകാശപ്പെട്ടു. സിന യൂണിവേഴ്സിറ്റി ഹോസ്പിറ്റലിലെ അതീവ സുരക്ഷയുള്ള, അടച്ചിട്ട ട്രോമ വാര്ഡിലാണ് അദ്ദേഹത്തെ പാര്പ്പിച്ചിരിക്കുന്നതെന്ന് പ്രസിദ്ധീകരണം അവകാശപ്പെട്ടെങ്കിലും എപ്പോഴാണ് അല്ലെങ്കില് എങ്ങനെയാണ് അദ്ദേഹത്തിന് ‘പരിക്കേറ്റത്’ എന്ന് വ്യക്തമാക്കിയിട്ടില്ല.
ഖമേനി എവിടെയെന്നു കണ്ടെത്തുമെന്ന് ഭയം
ചികിത്സിക്കുന്ന ഡോക്ടര്മാരെയും വിദഗ്ധരെയും നിരീക്ഷിച്ചാല് ഖമേനി എവിടെയെന്ന വിവരം ചോരുമെന്നതിനാലാണ് റഷ്യയില് ചികിത്സ തേടാനുള്ള ശിപാര്ശ അംഗീകരിച്ചതെന്ന് അല്-ജരീദയുടെ റിപ്പോര്ട്ടില് പറഞ്ഞു. കഴിഞ്ഞ വ്യാഴാഴ്ച ഇറാനിയന് പ്രസിഡന്റ് മസൂദ് പെസെഷ്കിയാനുമായുള്ള ഫോണ് സംഭാഷണത്തിനിടെ റഷ്യന് പ്രസിഡന്റ് വ്ളാഡിമിര് പുടിന് തന്നെയാണ് മൊജ്തബയുടെ ചികിത്സ റഷ്യയില് നടത്താമെന്ന നിര്ദ്ദേശം മുന്നോട്ടുവെച്ചത്. ഖമേനി ഉള്പ്പെടെയുള്ള ഇറാനിയന് ഉദ്യോഗസ്ഥര് ഈ നിര്ദ്ദേശം വിശദമായി ചര്ച്ച ചെയ്യുകയും അംഗീകരിക്കുകയും ചെയ്തു. തുടര്ന്ന് വ്യാഴാഴ്ച വൈകുന്നേരം തന്നെ മൊജ്താബയെ അവിടേക്ക് മാറ്റി. റഷ്യന് ഡോക്ടര്മാരും അദ്ദേഹത്തോടൊപ്പമുണ്ടായിരുന്ന ഏതാനും ഇറാനിയന് ഡോക്ടര്മാരും ചേര്ന്നാണ് ചികിത്സ നല്കിയത്.
ജൂനിയര് ഖമേനി (മോജ്തബ)യുടെ പേരില് പുറത്തുവന്ന ആദ്യ കത്ത് എഴുതിയത് സുപ്രീം നാഷണല് സെക്യൂരിറ്റി കൗണ്സില് സെക്രട്ടറി ജനറല് അലി ലാരിജാനിയാണെന്നും അല്-ജരീദ വെളിപ്പെടുത്തുന്നു. ഈ കത്തിന് ലാരിജാനി മുന്പ് നടത്തിയ പല പ്രസ്താവനകളുമായും സാമ്യമുണ്ട്. മോജ്തബ ആ പ്രസംഗം കണ്ടിട്ട് പോലുമില്ല. അദ്ദേഹം പൊതുവേദിയില് പ്രത്യക്ഷപ്പെടാത്തതും പ്രസംഗത്തിന്റെ ഓഡിയോ റെക്കോര്ഡിംഗ് ഇല്ലാത്തതും ഈ സംശയങ്ങളെ ബലപ്പെടുത്തുന്നു.
മൊജ്താബ എവിടെയാണെന്നും അദ്ദേഹത്തിന്റെ അവസ്ഥ എന്താണെന്നും ഇസ്രായേലിന് വിവരമുണ്ടെന്നും എന്നാല് അത് വെളിപ്പെടുത്താന് ആഗ്രഹിക്കുന്നില്ലെന്നും ഇസ്രായേല് പ്രധാനമന്ത്രി ബെഞ്ചമിന് നെതന്യാഹു സൂചന നല്കി. യുദ്ധസമയത്തെ തന്റെ ആദ്യ പത്രസമ്മേളനത്തില്, ഇറാന്റെ പുതിയ പരമോന്നത നേതാവിന്റെ അവസ്ഥയെക്കുറിച്ചുള്ള ചോദ്യത്തിന് മറുപടിയായി, ‘ഞാന് അദ്ദേഹത്തിന് ലൈഫ് ഇന്ഷുറന്സ് നല്കാന് പോകുന്നില്ല’ എന്ന് നെതന്യാഹു പറഞ്ഞു. ടെല് അവീവിന് മൊജ്താബയെക്കുറിച്ച് സ്വകാര്യ ഇന്റലിജന്സ് വിവരങ്ങള് ഉണ്ടെന്നാണ് ഇതില് നിന്ന് മനസിലാക്കുന്നത്.
ജെറുസലേമിലെ സോഴ്സുകള് നല്കുന്ന വിവരമനുസരിച്ച്, മൊജ്താബയുടെ പരിക്ക് ആദ്യം പ്രതീക്ഷിച്ചതിനേക്കാള് ഗുരുതരമാകാനാണ് സാധ്യതയെന്ന് ഇസ്രായേല് രഹസ്യാന്വേഷണ വിഭാഗം വിശ്വസിക്കുന്നു. എന്നാല് അദ്ദേഹം ഇറാന് വിട്ടതിനെക്കുറിച്ച് സ്ഥിരീകരിച്ച വിവരങ്ങളൊന്നും ടെല് അവീവിനില്ലെന്നും അവര് കൂട്ടിച്ചേര്ത്തു.
ടെഹ്റാനിലെ പരമോന്നത നേതാവിന്റെ വീടും ഓഫീസും സ്ഥിതി ചെയ്യുന്ന കോമ്പൗണ്ടിന് നേരെയുണ്ടായ ആക്രമണത്തില്, കെട്ടിടാവശിഷ്ടങ്ങള് ശരീരത്തിന് സമീപം പതിച്ചതിനെത്തുടര്ന്ന് മൊജ്താബയുടെ ശരീരത്തിന്റെ ഇടതുഭാഗത്ത് തല മുതല് പാദം വരെ പരിക്കേറ്റ വിവരം ആദ്യമായി വെളിപ്പെടുത്തിയത് ‘അല്-ജരീദ’ ആയിരുന്നു.
#MojtabaKhamenei, #IranNews, #BreakingNews, #MiddleEastUpdate, #IranCrisis, #SupremeLeader, #InternationalNews, #WorldNews, #Geopolitics, #IranIsraelConflict, #Tehran, #RussiaIran, #Moscow, #VladimirPutin, #DonaldTrump, #Netanyahu, #GlobalNews, #NewsAlert, #DailyNews, #CurrentAffairs #Dailyhunt, #DailyhuntNews, #ViralNews, #TrendingNow, #TrendingNews, #IndiaNews, #MalayalamNews, #FlashNews, #LatestUpdates, #WorldEvents, #PoliticalNews, #DefenseNews, #IntelligenceReport #IsKhameneiAlive, #KhameneiInjury, #AlJaridaReport, #IsraelStrikes, #USIranRelations, #OperationRoaringLion, #MiddleEastTensions, #HealthUpdate, #ForeignPolicy
