കൊളംബോ: ട്വന്റി20 ലോകകപ്പില് ന്യൂസിലന്ഡിനോടേറ്റ 61 റണ്സിന്റെ കനത്ത തോല്വിയോടെ പുറത്തായ ശ്രീലങ്കന് ക്യാപ്റ്റന്റെ സര്ക്കാരിനോടുള്ള അഭ്യര്ഥന വൈറല്. ദേശീയ ക്രിക്കറ്റ് താരങ്ങളെ പൊതുജനങ്ങളുടെയും സോഷ്യല് മീഡിയയുടെയും വിമര്ശനങ്ങളില് നിന്ന് സംരക്ഷിക്കണമെന്ന് ആവശ്യപ്പെട്ട് ശ്രീലങ്കന് ക്യാപ്റ്റന് ദാസുന് ഷനക സര്ക്കാരിനോട് അഭ്യര്ഥന നടത്തിയതാണ് ചര്ച്ചയാകുന്നത്. ഇംഗ്ലണ്ടിനോടും ന്യൂസിലന്ഡിനോടും തുടര്ച്ചയായി പരാജയപ്പെട്ട ആതിഥേയര്ക്ക് സൂപ്പര് എയ്റ്റ് ഘട്ടത്തില് തന്നെ പുറത്താകേണ്ടി വന്നു. വിമര്ശനങ്ങള് ടീമിന്റെ ‘മാനസികാരോഗ്യത്തെ’ ദോഷകരമായി ബാധിക്കുന്നുവെന്ന് ഷനക പറഞ്ഞു.
സര്ക്കാര് ഇടപെടലിനായുള്ള അഭ്യര്ത്ഥന
പുറത്തുനിന്നുള്ള വിമര്ശനങ്ങള് സൃഷ്ടിക്കുന്ന ‘നെഗറ്റീവ് അന്തരീക്ഷം’ ദ്വീപ് രാഷ്ട്രത്തിലെ കായിക മേഖലയ്ക്ക് വലിയ തിരിച്ചടിയായി മാറിയിട്ടുണ്ടെന്ന് ഷനക വാദിച്ചു. ‘അത്തരം വിമര്ശനങ്ങള് തടയാന് സര്ക്കാരിന് ഇടപെടാന് കഴിയുമെങ്കില്, അത് മെച്ചപ്പെട്ട മാനസികാരോഗ്യത്തിന് വലിയ സഹായമാകുമെന്ന് ഞാന് വിശ്വസിക്കുന്നു. ഞങ്ങള്ക്ക് ഈ കളി മാത്രമേയുള്ളൂ, ഇത്തരത്തില് നെഗറ്റീവിറ്റി പ്രചരിക്കുകയാണെങ്കില് ഇതിനെ രക്ഷിക്കാന് കഴിയുമെന്ന് ഞാന് കരുതുന്നില്ല’ ഷനക പറഞ്ഞു. നിലവിലെ കളിക്കാര്ക്ക് ‘കളിച്ച് പോകാന്’ കഴിയുമെങ്കിലും, നിരന്തരമായ ‘പുറത്തുനിന്നുള്ള ബഹളം’ വളര്ന്നുവരുന്ന അടുത്ത തലമുറയിലെ ക്രിക്കറ്റ് താരങ്ങള്ക്ക് ഭീഷണിയാണെന്ന് ക്യാപ്റ്റന് ഊന്നിപ്പറഞ്ഞു.
കായികക്ഷമതയും പരിക്കുകളും
മാനസികാഘാതത്തിന് പുറമെ, ശ്രീലങ്കയുടെ ശാരീരിക നിലവാരം അന്താരാഷ്ട്ര എതിരാളികളേക്കാള് വളരെ പിന്നിലാണെന്നും ഷനക പറഞ്ഞു.. ആതിഥേയരുടെ മത്സരയാത്രയെ ‘അര ഡസനോളം പരിക്കുകള്’ വലച്ചു, നിര്ണ്ണായക ഘട്ടങ്ങളില് പ്രധാന താരങ്ങളെ അവര്ക്ക് നഷ്ടമായി. പേസ് സെന്സേഷന് മതീഷ പതിരണയെ ഹാംസ്ട്രിംഗ് പരിക്ക് മൂലം തുടക്കത്തിലേ നഷ്ടമായി. ഇതിന് പിന്നാലെ സമാനമായ ഫിറ്റ്നസ് പ്രശ്നങ്ങള് കാരണം സ്റ്റാര് ഓള്റൗണ്ടര് വാനിന്ദു ഹസരംഗയും ഇഷാന് മലിംഗയും പുറത്തായി.
ഫിറ്റ്നസ് വിടവ്: കണ്ടീഷനിംഗിന്റെ കാര്യത്തില് മറ്റ് രാജ്യങ്ങള് ‘വളരെ മുന്നിലാണെന്ന്’ ഷനക പറഞ്ഞു.. ‘ഒരു രാജ്യത്തിന് വേണ്ടി കളിക്കുമ്പോള് ഫിറ്റ്നസിനായിരിക്കണം ഒന്നാം സ്ഥാനം എന്ന് ഞാന് കരുതുന്നു, കാരണം അതില് വിട്ടുവീഴ്ച ചെയ്യാന് കഴിയില്ല,’ അദ്ദേഹം അഭിപ്രായപ്പെട്ടു.
ഗ്രൂപ്പ് ഘട്ടത്തില് ഓസ്ട്രേലിയയെ പുറത്താക്കി ശ്രീലങ്ക ശ്രദ്ധേയമായ പ്രകടനം കാഴ്ചവെച്ചെങ്കിലും, സൂപ്പര് എയ്റ്റിലെ അവരുടെ തകര്ച്ച ദയനീയമായിരുന്നു. ഇംഗ്ലണ്ടിനോടേറ്റ 51 റണ്സിന്റെ തോല്വിയെക്കുറിച്ച് സംസാരിക്കവെ, ‘വിവേകപൂര്ണ്ണമായ’ (sensible) ക്രിക്കറ്റിന്റെ അഭാവം ജയിക്കാമായിരുന്ന ഒരു മത്സരം നഷ്ടപ്പെടുത്തിയെന്ന് ഷനക സൂചിപ്പിച്ചു.
തന്റെ ക്യാപ്റ്റന്സി സ്ഥാനത്തിന്റെ ഭാവിയെക്കുറിച്ച് ഷനക വ്യക്തമായ മറുപടി നല്കിയില്ല, ശ്രീലങ്ക ക്രിക്കറ്റ് (SLC) സെലക്ടര്മാരായിരിക്കും തന്റെ വിധി തീരുമാനിക്കുകയെന്ന് അദ്ദേഹം പറഞ്ഞു..
‘ഒരു ക്യാപ്റ്റന് എന്ന നിലയില് എത്ര കാലം ഞാന് ക്യാപ്റ്റനായി തുടരുമെന്ന് എനിക്ക് അറിയില്ല… എനിക്ക് പല നല്ല തീരുമാനങ്ങളും എടുക്കാന് കഴിഞ്ഞു, അതുപോലെ ഞാന് തെറ്റുകളും വരുത്തിയിട്ടുണ്ട്. വാസ്തവത്തില്, ഒരു ലോകകപ്പില് ക്യാപ്റ്റനായി കളിക്കാന് കഴിഞ്ഞതില് ഞാന് സന്തോഷവാനാണ്,’ ഷനക ഉപസംഹരിച്ചു.
#Dailyhunt, #BreakingNews, #CricketNews, #SportsUpdates, #LatestNews, #T20WorldCup2026, #SriLankaCricket, #DasunShanaka, #CricketControversy, #LKA, #TrendingNews
#T20WorldCup, #SriLankaNews, #CricketAnalysis, #WorldCup2026, #DasunShanakaSpeech, #MentalHealthInSports, #SLC, #SportsTrends, #NewZealandVsSriLanka, #CricketFans
#SriLanka, #Cricket, #T20WC, #LankanLions, #SupportOurLions, #CricketLife, #MentalHealthMatters, #StopOnlineAbuse, #SportsNewsIndia, #CricketCommunity
