ഭോലാരി വ്യോമതാവളത്തിലെ തകര്ന്ന കെട്ടിടങ്ങള് പാകിസ്താന് പുനര്നിര്മിക്കുന്നു; ഉപഗ്രഹ ചിത്രങ്ങള് പുറത്തുവിട്ട് മാധ്യമങ്ങള്; മേല്ക്കൂര പൊളിച്ചുമാറ്റി; മറ്റു താവളങ്ങളിലും അറ്റകുറ്റപ്പണി
ന്യൂഡല്ഹി: 2025 മെയ് 10-ന് ഇന്ത്യന് വ്യോമസേന (IAF) നടത്തിയ ആക്രമണത്തില് തകര്ന്ന ഭോലാരി വ്യോമതാവളത്തിലെ ഹാങ്ങര് പുനര്നിര്മ്മിക്കാനോ അറ്റകുറ്റപ്പണികള് നടത്താനോ ഉള്ള പ്രാരംഭ ഘട്ടത്തിലാണ് പാകിസ്ഥാനെന്നു റിപ്പോര്ട്ടുകള്. 88 മണിക്കൂര് നീണ്ട യുദ്ധം അവസാനിപ്പിക്കാന് പാകിസ്ഥാന് വെടിനിര്ത്തല് ചര്ച്ചയ്ക്ക് തയ്യാറാകുന്നതിന് മണിക്കൂറുകള്ക്ക് മുമ്പാണ് ഈ ആക്രമണം നടന്നത്. SAAB 2000 ‘Erieye’ വിഭാഗത്തില്പ്പെട്ട പാകിസ്ഥാന്റെ ഏര്ളി വാണിംഗ് ആന്ഡ് കണ്ട്രോള് വിമാനം ഈ ആക്രമണത്തില് തകര്ത്തതായി ഇന്ത്യന് വ്യോമസേന അവകാപ്പെട്ടിരുന്നു.
ജനുവരി 28-ന് ഉപഗ്രഹങ്ങള് പകര്ത്തിയ ചിത്രങ്ങള് പ്രകാരം ഹാങ്ങറിന്റെ തകര്ന്ന പച്ച മേല്ക്കൂരയുടെ ഭാഗങ്ങള് നീക്കം ചെയ്തതായി കാണാം. നാശനഷ്ടങ്ങള് ഇപ്പോഴും വ്യക്തമാണെങ്കിലും, മേല്ക്കൂര ഭാഗികമായി പൊളിച്ചുനീക്കുന്നത് പുനര്നിര്മ്മാണ പ്രവര്ത്തനങ്ങളുടെ സൂചനയാണ്. ഇന്ത്യന് വ്യോമസേന ആക്രമിച്ച മറ്റ് പാകിസ്ഥാന് താവളങ്ങളിലും സമാനമായ അറ്റകുറ്റപ്പണികള് നടക്കുന്നുണ്ട്. പുതിയ മേല്ക്കൂര സ്ഥാപിക്കല്, ഘടനാപരമായ ബലപ്പെടുത്തല്, അവശിഷ്ടങ്ങള് നീക്കം ചെയ്യല് എന്നിവയാണ് പൂര്ണ്ണമായ അറ്റകുറ്റപ്പണിയില് ഉള്പ്പെടുക. തകര്ന്ന കെട്ടിടം ഉപേക്ഷിക്കാതെ അറ്റകുറ്റപ്പണികളില് പുരോഗതിയുണ്ടെന്ന് പുതിയ ചിത്രം വ്യക്തമാക്കുന്നു.
നേരത്തേ പുറത്തുവന്ന റിപ്പോര്ട്ടുകള് പ്രകാരം മുരീദ് (Murid), സുക്കൂര് (Sukkur), നൂര് ഖാന് (Nur Khan) എന്നീ വ്യോമതാവളങ്ങളിലും അറ്റകുറ്റപ്പണികള് നടക്കുന്നുണ്ട്. മുരീദില് തകര്ന്ന മേല്ക്കൂര ചുവന്ന ടാര്പോളിന് ഉപയോഗിച്ച് മറച്ച നിലയിലും സുക്കൂറില് തകര്ന്ന യുഎവി (UAV) ഹാങ്ങറും നൂര് ഖാനില് തകര്ന്ന കമാന്ഡ് ആന്ഡ് കണ്ട്രോള് സെന്ററും കാണപ്പെട്ടിരുന്നു.
മെയ് 10-ന് രാവിലെ 10-നും 12-നും ഇടയിലാണ് ഭോലാരിയില് ആക്രമണം നടന്നത്. ഇന്ത്യയുടെ സൈനിക താവളങ്ങളെ ലക്ഷ്യമിട്ടുള്ള പാകിസ്ഥാന്റെ ഡ്രോണ് നുഴഞ്ഞുകയറ്റങ്ങള്ക്കും വ്യോമാക്രമണ ശ്രമങ്ങള്ക്കുമുള്ള ശക്തമായ മറുപടിയായാണ് ഇന്ത്യ ഈ ആക്രമണം നടത്തിയത്.
ഭോലാരി ആക്രമണത്തിന് ഉപയോഗിച്ച ആയുധം ഏതാണെന്ന് ഇന്ത്യന് വ്യോമസേന വ്യക്തമാക്കിയിട്ടില്ലെങ്കിലും ‘ഓപ്പറേഷന് സിന്ദൂര്’ (Operation Sindoor) സമയത്ത് വിവിധ തരം മിസൈലുകള് ഇന്ത്യ ഉപയോഗിച്ചിരുന്നു. റാഫേല് വിമാനങ്ങളില് നിന്നുള്ള ഫ്രഞ്ച് സ്കാല്പ് (SCALP) മിസൈലുകള്, സുഖോയ് 30 എംകെഐയില് നിന്നുള്ള ഇസ്രായേലി റാംപേജ് (Rampage) മിസൈലുകള്, മിറാഷ് 2000-ല് നിന്നുള്ള ക്രിസ്റ്റല് മെയ്സ് (Crystal Maze), ബ്രഹ്മോസ് മിസൈലുകള് എന്നിവ ഇതില് ഉള്പ്പെടാം.
ഭോലാരി ആക്രമണം കഴിഞ്ഞ് മണിക്കൂറുകള്ക്കുള്ളില്, മെയ് 10 വൈകുന്നേരം 3:35-ന് പാകിസ്ഥാന്റെ മിലിട്ടറി ഓപ്പറേഷന്സ് ഡയറക്ടര് ജനറല് (DGMO) മേജര് ജനറല് കാഷിഫ് അബ്ദുള്ള ഇന്ത്യന് ഡിജിഎംഒ ലെഫ്റ്റനന്റ് ജനറല് രാജീവ് ഖായിയെ ഹോട്ട്ലൈന് വഴി ബന്ധപ്പെടുകയും അടിയന്തര വെടിനിര്ത്തലിന് അഭ്യര്ത്ഥിക്കുകയും ചെയ്തു. അന്ന് വൈകുന്നേരം 5 മണി മുതല് വെടിനിര്ത്തല് പ്രാബല്യത്തില് വരുമെന്ന് പ്രതീക്ഷിച്ചിരുന്നെങ്കിലും, നിയന്ത്രണ രേഖയിലും അന്താരാഷ്ട്ര അതിര്ത്തിയിലും സമാധാനം പുനഃസ്ഥാപിക്കാന് 48 മണിക്കൂര് കൂടി എടുത്തു.
പാകിസ്ഥാന് ഇന്ത്യയ്ക്കെതിരെ ആക്രമണം ശക്തമാക്കാന് ഒരുങ്ങുകയാണെന്ന് മെയ് 9-ന് അമേരിക്ക മുന്നറിയിപ്പ് നല്കിയിരുന്നു. അമേരിക്കന് വൈസ് പ്രസിഡന്റ് ജെ.ഡി. വാന്സ് അന്ന് തന്നെ പ്രധാനമന്ത്രി നരേന്ദ്ര മോദിയെ ബന്ധപ്പെടാന് ശ്രമിച്ചിരുന്നു. പാകിസ്ഥാന് വലിയൊരു ആക്രമണത്തിന് പദ്ധതിയിടുന്നതായി ഇന്റലിജന്സ് വിവരം ലഭിച്ചുവെന്ന് വാന്സ് മോദിയെ അറിയിച്ചു. ‘പാകിസ്ഥാന് ഇത്തരമൊരു ആക്രമണത്തിന് മുതിര്ന്നാല് വലിയ വില നല്കേണ്ടി വരും’ എന്ന് താന് വാന്സിനോട് പറഞ്ഞതായി പിന്നീട് പാര്ലമെന്റില് പ്രധാനമന്ത്രി വെളിപ്പെടുത്തി.
യുഎസ് വൈസ് പ്രസിഡന്റുമായുള്ള സംഭാഷണത്തിന് പിന്നാലെ, മെയ് 9-10 രാത്രിയില് തന്നെ പാകിസ്ഥാന്റെ സൈനിക കേന്ദ്രങ്ങള് ആക്രമിക്കാന് ഇന്ത്യ തീരുമാനിച്ചതാവാം. മെയ് 9 രാത്രി ആരംഭിച്ച ആക്രമണത്തില് കുറഞ്ഞത് 10 പാകിസ്ഥാന് താവളങ്ങള് ഇന്ത്യ ലക്ഷ്യമിട്ടു. ചക്ലാല, രഹാവാലി, റഫീഖി, റഹിം യാര് ഖാന്, സുക്കൂര്, മുരീദ്, നയാച്ചോര് എന്നിവിടങ്ങളില് പുലര്ച്ചെ 2-നും 5-നും ഇടയില് ആക്രമണം നടന്നു. രാവിലെ 10 മുതല് 12 വരെ സര്ഗോദ, ഭോലാരി, ജേക്കബാബാദ് എന്നിവിടങ്ങളില് മിസൈല് ആക്രമണം നടത്തി. ഇതേസമയം തന്നെ പാക് വിമാനങ്ങളെ നേരിട്ട ഇന്ത്യന് സേന ഒരു ഇലക്ട്രോണിക് ഇന്റലിജന്സ് വിമാനമോ ഏര്ളി വാണിംഗ് വിമാനമോ വെടിവെച്ചിട്ടതായും കരുതപ്പെടുന്നു.
ഭോലാരിയിലെ ആക്രമണത്തില് ഒരു ഓഫീസര് ഉള്പ്പെടെ ആറ് പാക് വ്യോമസേനാ ഉദ്യോഗസ്ഥര് കൊല്ലപ്പെട്ടതായി സിന്ധ് മുഖ്യമന്ത്രി മുരാദ് അലി ഷാ സ്ഥിരീകരിച്ചിരുന്നു.
Pakistan Air Force (PAF) appears to be in the early phases of reconstructing or repairing the extensive damage to a hangar at its Bholari airbase, which was destroyed in an Indian Air Force (IAF) strike on May 10, 2025, hours before Pakistan came to the ceasefire table that eventually brought an end to the 88-hour war between the two subcontinental neighbours.
