സുരേഷ്ഗോപിയുടെ കലുങ്ക് സംവാദം പുറത്തുകൊണ്ടുവന്നത് ബിജെപിയിലെ ഭിന്നത ; നിവേദനം സ്വീകരിക്കാത്തതെന്തെന്ന് അദ്ദേഹത്തോട് ചോദിക്കണമെന്ന് രാജീവ് ചന്ദ്രശേഖര്, അസൂയ നന്നല്ലെന്ന് സുരേന്ദ്രന്
തൃശൂര്: സുരേഷ്ഗോപിയുടെ കലുങ്ക് സംവാദ പരിപാടിയുമായി ബന്ധപ്പെട്ട് ബിജെപിയില് ഭിന്നത. നേരത്തേ പരോക്ഷ വിമര്ശനം നടത്തി ബിജെപി സംസ്ഥാന അദ്ധ്യക്ഷന് രാജീവ് ചന്ദ്രശേഖര് രംഗത്ത് വരികയും പിന്നാലെ സുരേഷ്ഗോപിക്ക് പിന്തുണയുമായി ബിജെപിയിലെ മുന് സംസ്ഥാന അദ്ധ്യക്ഷന് കെ.സുരേന്ദ്രനും രംഗത്ത് വന്നതോടെ ബിജെപിയിലെ ഭിന്നത മറനീക്കി പുറത്തുവരികയാണ്.
കലുങ്ക് സംവാദത്തില് രണ്ടുപേരുടെ നിവേദനം കേന്ദ്രമന്ത്രി സുരേഷ്ഗോപി തള്ളിയതുമായി ബന്ധപ്പെട്ട് ഉയര്ന്ന വിമര്ശനങ്ങളാണ് പാര്ട്ടിയിലെ നേതാക്കളെ രണ്ടു തട്ടിലാക്കിയത്. സുരേഷ്ഗോപിയെ വിമര്ശിച്ച് രാജീവ് ചന്ദ്രശേഖര് ഇറക്കിയ പ്രസ്താവനയ്ക്ക് എതിരേ പാര്ട്ടിയിലെ അനേകം നേതാക്കളാണ് രംഗത്ത് വന്നത്. കെ സുരേന്ദ്രന് പുറമേ യുവരാജ് ഗോകുലും പരോക്ഷമായി രാജീവ് ചന്ദ്രശേഖറെ വിമര്ശിച്ച് രംഗത്തെത്തിയിട്ടുണ്ട്.
സുരേഷ് ഗോപി എന്തുകൊണ്ടാണ് നിവേദനം സ്വീകരിക്കാത്തതെന്ന് അദ്ദേഹത്തോട് തന്നെ ചോദിക്കണമെന്നുമായിരുന്നു രാജീവ് ചന്ദ്രശേഖറിന്റെ പ്രതികരണം. അദ്ദേഹം എന്തിനത് ചെയ്തു, എങ്ങനെ ചെയ്തു എന്നതിന്റെ സാഹചര്യം തനിക്കറിയില്ല. ബിജെപി 30 ഹെല്പ്പ് ഡെസ്കുകള് രൂപീകരിച്ചിട്ടുണ്ട്. തൃശൂര് ഉള്പ്പെടെ എല്ലാ ജില്ലകളിലും ബിജെപി ഹെല്പ് ഡെസ്കുകളുണ്ട്. അവിടെ പോയി നിവേദനവും പരാതിയുമൊക്കെ കൊടുക്കാമെന്നും രാജീവ് ചന്ദ്രശേഖര് പറഞ്ഞത്.
ഇതിനെതിരേ സഹായിച്ചില്ലെങ്കിലും ഉപദ്രവിക്കാതിരിക്കണമെന്ന് കെ. സുരേന്ദ്രന് ഫേസ്ബുക്കില് കുറിച്ചു. ‘സാധാരണക്കാര്ക്ക് ഉപകാരമാവുന്ന കാര്യങ്ങള് നേടിയെടുക്കാന് മുഖ്യമന്ത്രിയും പ്രതിപക്ഷ നേതാവും ഉള്പ്പെടെയുള്ള മുഴുവന് രാഷ്ട്രീയ നേതാക്കളും സുരേഷ്ഗോപിയെ മാതൃകയാക്കണമെന്നാണ് സുരേന്ദ്രന് പറഞ്ഞത്. കലുങ്ക് സംവാദം പോലെ താഴെതട്ടിലുള്ള ജനങ്ങളുമായി അദ്ദേഹം ഇടപെടുന്നത് കാണുമ്പോള് സ്വാഭാവികമായും ചിലര്ക്ക് ചൊറിച്ചില് വരും. അത് പൊട്ടിയൊലിക്കുന്നതാണ് ഇപ്പോള് കാണുന്നത്. ഇതൊക്കെ നമ്മള് എത്ര കണ്ടതാണ്’, എന്നായിരുന്നു സുരേന്ദ്രന് ഫേസ്ബുക്കില് കുറിച്ചത്.
‘സുരേഷ് ഗോപിയുടെ ജനസമ്പര്ക്കം വല്ലാത്ത തരത്തില് ചില കേന്ദ്രങ്ങളെ വിറളി പിടിപ്പിക്കുന്നുണ്ട്. പെറ്റി ഈഗോ സ്വഭാവം ഒരു വശത്തേക്ക് മാറ്റി വച്ചാല് എല്ലാവര്ക്കും നല്ലത്’, എന്നായിരുന്നു യുവരാജ് ഗോകുലിന്റെ ഫേസ്ബുക്ക് പോസ്റ്റ്.
