മോതിരം വാങ്ങാനെത്തി, ജീവനക്കാരുടെ കണ്ണുവെട്ടിച്ച് മാല കവര്ന്നു, യുവതി സിസിടിവിയില് കുടുങ്ങി
മാഹി: സ്വര്ണ മോതിരം വാങ്ങാനെന്ന വ്യാജേന ജ്വല്ലറിയില് കയറിയ യുവതി, മാല മോഷ്ടിക്കുന്നതിന്റെ സിസിടിവി ദൃശ്യങ്ങള് പുറത്ത്. അഴിയൂര് ഹാജിയാര് പള്ളിക്കു സമീപത്തെ മനാസ് ക്വാര്ട്ടേഴ്സില് താമസിക്കുന്ന ധര്മ്മടം നടുവിലത്തറ എന്. ആയിഷയെ (41) മാഹി പൊലീസ് കഴിഞ്ഞ ദിവസം പിടികൂടിയിരുന്നു. മാഹി ബസലിക്കയ്ക്കു സമീപത്തെ ശ്രീലക്ഷ്മി ജ്വല്ലറിയില്നിന്നു കഴിഞ്ഞ 12നാണ് സ്വര്ണം മോഷ്ടിച്ചത്. 3 ഗ്രാം തൂക്കമുള്ള സ്വര്ണമാല ജീവനക്കാരുടെ കണ്ണുവെട്ടിച്ച് കൈക്കലാക്കി കടന്നുകളയുകയായിരുന്നു.
ജ്വല്ലറി ഉടമ പിലാക്കണ്ടി ശൈലേഷിന്റെ പരാതിയില് സിസിടിവി ദൃശ്യങ്ങള് പരിശോധിച്ച് പൊലീസ് നടത്തിയ അന്വേഷണത്തിലാണ് അഴിയൂരിലെ വീട്ടില്നിന്നും യുവതിയെ പിടികൂടിയത്. എന്നാല്, മാല മാഹിയിലെ കുഞ്ഞിപ്പള്ളി ജ്വല്ലറിയില് വിറ്റുവെന്നാണ് ആയിഷ മൊഴി നല്കിയത്. പിന്നീട് കുഞ്ഞിപ്പള്ളി ജ്വല്ലറിയിലെത്തി മാല പൊലീസ് കണ്ടെടുത്തു. മാഹി കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്ഡ് ചെയ്തു.
