ആരോഗ്യസ്ഥിതിയില് ആശങ്ക? യുകെ സന്ദര്ശനത്തിന് മുന്പായി കയ്യില് മേക്കപ്പിട്ട് ട്രംപ്, അതീവ രഹസ്യം ചൂഴ്ന്നെടുത്ത് സോഷ്യല് മീഡിയ
വാഷിംഗ്ടണ്: യുഎസ് പ്രസിഡന്റ് ഡൊണാള്ഡ് ട്രംപ്, പ്രഥമവനിത മെലാനിയ ട്രംപ് എന്നിവര് യുകെ സന്ദര്ശനത്തിനായി ലണ്ടനിലെത്തിയിരിക്കുകയാണ്. വ്യാപാര കരാറുകള്, റഷ്യ-യുക്രെയിന് യുദ്ധം തുടങ്ങിയ ലോകരാഷ്ട്രീയം ചര്ച്ചയുടെ ഭാഗമാകുമെന്നാണ് വിവരം. ഇത് രണ്ടാം തവണയാണ് ട്രംപ് യുകെ സന്ദര്ശനം നടത്തുന്നത്. ട്രംപും മെലാനിയയും സന്ദര്ശനത്തിനായി വാഷിംഗ്ടണില് നിന്ന് പുറപ്പെടുന്നതിന്റെ ചിത്രങ്ങളും വീഡിയോകളും വ്യാപകമായി പ്രചരിച്ചിരുന്നു. ഇതിനിടെ ഒരു ചിത്രം ചൂടേറിയ ചര്ച്ചകള്ക്ക് വഴിതെളിച്ചിരിക്കുകയാണ്.
ട്രംപിന്റെ വലതുകൈപ്പത്തിയില് മേക്കപ്പ് ചെയ്തിരിക്കുന്ന ചിത്രമാണ് ചര്ച്ചയാവുന്നത്. ട്രംപിന്റെ ആരോഗ്യസ്ഥിതിയെക്കുറിച്ചുള്ള ചര്ച്ചകള് ശക്തമാകുന്നതിനിടെയാണ് ചിത്രം ശ്രദ്ധനേടുന്നത്. 79 കാരനായ ട്രംപിന്റെ കൈകളില് മുറിവുകള് ഏറ്റിരിക്കുന്നതിന്റെയും ഇത് കടുത്ത മേക്കപ്പ് കൊണ്ട് മറച്ചിരിക്കുന്നതിന്റെയും ചിത്രങ്ങള് നേരത്തെയും പലരും ശ്രദ്ധിച്ചിരുന്നു. ഓഗസ്റ്റില് ദക്ഷിണ കൊറിയന് പ്രസിഡന്റ് ലീ ജേ മ്യൂംഗുമായുള്ള ചര്ച്ചക്കിടെ ട്രംപിന്റെ വലത് കൈയില് മുറിവേറ്റിരുന്നതും വാര്ത്തയായിരുന്നു. മേജര് ലീഗ് താരമായ റോജര് ക്ലെമന്സുമൊത്തുള്ള ഗോള്ഫ് ഔട്ടിംഗിനിടെയും ട്രംപിന്റെ കൈകളില് സമാനരീതിയില് മുറിവുകളുണ്ടായിരുന്നു.
അതേസമയം, ട്രംപിന് ‘ക്രോണിക് വെനസ് ഇന്സഫിഷ്യന്സി’ എന്ന രോഗാവസ്ഥയാണെന്ന് കഴിഞ്ഞ ഓഗസ്റ്റില് അധികൃതര് വെളിപ്പെടുത്തിയിരുന്നു. ഹൃദയത്തിലേയ്ക്ക് ശരിയായ രീതിയില് രക്തം എത്തിക്കാന് കാലിലെ ഞരമ്പുകള്ക്ക് കഴിയാതെ വരുന്ന അവസ്ഥയാണിത്. പതിവായി ആസ്പിരിന് ഗുളിക കഴിക്കുന്നതും കൈവിറയ്ക്കുന്നതും മൂലം തൊലിപ്പുറത്ത് അസ്വസ്ഥതകള് ഉണ്ടാകുന്നതാണ് ട്രംപിന്റെ കൈകളില് എപ്പോഴും മുറിവുകള് പറ്റുന്നതിന് കാരണമെന്ന് വൈറ്റ് ഹൗസ് പ്രസ് സെക്രട്ടറി കരോലിന് ലെവിറ്റും അടുത്തിടെ വ്യക്തമാക്കിയിരുന്നു. എന്നാല്, ട്രംപിന് കാന്സര് ആണെന്നും ഇതാണ് കൈകളിലെ മുറിവുകള്ക്ക് കാരണമെന്നുമാണ് പലരും അഭിപ്രായപ്പെടുന്നത്.
