ഭാര്യയെ 2 മാസമായി കാണാനില്ല, വീഡിയോ പോസ്റ്റു ചെയ്തു ഭര്ത്താവ് ജീവനൊടുക്കി; മൂന്നാം ദിനം യുവതിയെ കണ്ടെത്തി പൊലീസ്
ആലപ്പുഴ: സാമ്പത്തിക ബാധ്യതയെത്തുടര്ന്ന് വീടുവിട്ട ഭാര്യയെപ്പറ്റി രണ്ടു മാസമായിട്ടും വിവരം ലഭിക്കാതായതോടെ ഭര്ത്താവ് ജീവനൊടുക്കി.
മൂന്നുദിവസം കഴിഞ്ഞ് ഭാര്യയെ കണ്ടെത്തുകയും ചെയ്തു. കണ്ണൂരില് ഹോംനഴ്സായി ജോലി ചെയ്തിരുന്ന ഭാര്യ രഞ്ജിനി(45)യെ ചൊവ്വാഴ്ചയാണ് കായംകുളം പൊലീസ് കണ്ടെത്തിയത്. കണ്ണമ്പള്ളി ഭാഗം വിഷ്ണു ഭവനത്തില് വിനോദ് (49) ആണ് മരിച്ചത്.
ഭാര്യ രഞ്ജിനി കഴിഞ്ഞ ജൂണ് 11നു രാവിലെ ബാങ്കില് പോകുന്നുവെന്നു പറഞ്ഞു വീട്ടില് നിന്നിറങ്ങിയതാണ്. പിന്നീട് ഇവരെക്കുറിച്ചു വിവരമില്ലായിരുന്നു. തുടര്ന്ന് പൊലീസ് നടത്തിയ അന്വേഷണത്തില് ഇവര് ബാങ്കില് പോയില്ലെന്നു കണ്ടെത്തി. ഓട്ടോറിക്ഷയില് കായംകുളത്ത് എത്തി റെയില്വേ സ്റ്റേഷന് റോഡിലൂടെ പോകുന്ന ദൃശ്യങ്ങള് പൊലീസിനു ലഭിച്ചിരുന്നു. ബന്ധുവീടുകളിലും മറ്റും അന്വേഷിച്ചിട്ടും കണ്ടെത്താനായില്ല.
കുടുംബശ്രീ സെക്രട്ടറിയായ രഞ്ജിനിയുടെ യൂണിറ്റ് ഒന്നേകാല് ലക്ഷം രൂപ ബാങ്ക് വായ്പ എടുത്തിരുന്നു. ഇതടക്കം മൂന്നു ലക്ഷത്തോളം രൂപയുടെ ബാധ്യത ഉണ്ടായിരുന്നെന്നു വീട്ടുകാര് പറയുന്നു. രഞ്ജിനിക്കായുള്ള അന്വേഷണങ്ങളെല്ലാം വഴിമുട്ടിയപ്പോള് വിനോദ് കടുത്ത മാനസിക സംഘര്ഷം അനുഭവിച്ചിരുന്നു.
രഞ്ജിനിയെ കാണാതായതോടെ വിനോദ് വിഷമത്തിലായിരുന്നു. വേഗം തിരിച്ചുവരണമെന്നും ബാധ്യത തീര്ക്കാമെന്നും കരഞ്ഞുപറയുന്ന പോസ്റ്റ് ഭാര്യയുടെ ചിത്രം സഹിതം വിനോദ് സാമൂഹികമാധ്യമങ്ങളില് ഇട്ടിരുന്നു. മൊബൈല് ഫോണ് ഉപയോഗിക്കാതിരുന്നതിനാല് രഞ്ജിനി ഇതൊന്നും അറിഞ്ഞിരുന്നില്ല. അതുകണ്ട് കണ്ണൂര് കതിരൂരില് രഞ്ജിനി ഹോംനഴ്സായി ജോലിചെയ്യുന്ന വിവരം ആരോ തിങ്കളാഴ്ച അവിടത്തെ പോലീസില് അറിയിച്ചു. വിവരം കിട്ടിയ കായംകുളം പോലീസ് അവിടേക്കുപോയി ചൊവ്വാഴ്ച രഞ്ജിനിയുമായി മടങ്ങിയെത്തി.
വിനോദ് ജീവനൊടുക്കിയ വിവരം പോലീസ് പറഞ്ഞപ്പോഴാണ് രഞ്ജിനി അറിഞ്ഞത്. കടബാധ്യത തീര്ക്കാനാണ് ജോലിക്കു പോയതെന്ന് ഇവര് പറഞ്ഞതായി പോലീസ് അറിയിച്ചു. ഇവര്ക്ക് രണ്ടു മക്കളുണ്ട്. വിഷ്ണുവും ദേവികയും. കോടതിയില് ഹാജരാക്കിയ രഞ്ജിനിയെ മക്കള്ക്കൊപ്പം വിട്ടു.
